आर्थिक वर्ष २०८०/०८१ को बजेटमा स्वतन्त्र रेडियोहरूलाई बेवास्ता गरिएको भन्दै अर्थमन्त्री प्रकाशशरण महत र सञ्चार मन्त्री रेखा शर्मालाई ध्यानाकर्षण गराइएको छ।
सामुदायिक रेडियो प्रसारक संघ (अकोराब) र ब्रोडकाष्टिङ एशोसिएसन अफ नेपाल (बान) का पदाधिकारीहरूले अर्थमन्त्री र सञ्चार मन्त्रीलाई बेग्लाबेग्लै भेटेर बजेटमा सम्बोधन हुनुपर्ने विषयबारे ध्यानाकर्षण गराएका हुन्।
अकोराबका अध्यक्ष अर्जुन गिरीले बजेटमा सम्बोधन गर्नुपर्ने विषयबारे लिखित रूपमा मन्त्रीहरूलाई ध्यानाकर्षण गरिएको जानकारी दिए।
‘सरकारले स्वतन्त्र रेडियोहरूलाई बेवास्ता गरे आन्दोलन गर्नुको विकल्प हुँदैन,’ उनले भने।
बानका अध्यक्ष कुमार भट्टराईले रेडियोहरूको नवीकरण र रोयल्टी शुल्कमा छुट गर्न आग्रह गरेका थिए। यो विषयलाई आफूहरूले गम्भीरताका साथ लिएको मन्त्रीहरूले बताएका थिए।
