नेपाल धितोपत्र बोर्डले निजी स्टक एक्सचेन्जका लागि गरेको मागमा हिमालयन स्टक एक्सचेन्ज, नेसनल स्टक एक्सचेन्ज र अन्नपूर्ण स्टक एक्सचेन्जले धितोपत्र बोर्डमा आवेदन दिएका हुन्।
तर २०६६ सालमा समेत हिमालयन स्टक एक्सचेन्जको नामको अर्को कम्पनीले समेत स्टक एक्सचेन्जको लागि आवेदन दिएको थियो। यसमा एसियन लाइफ इन्स्योरेन्स, महालक्ष्मी विकास बैंक लगायतका संस्था थिए।
हाल आवेदन दिएको हिमालयनमा भने शंकरलाल अग्रवाल, शेखर गोल्छा, पशुपति मुरारका, भवानी राणा, राजेन्द्र खेतान, लक्की ग्रुपका सतिशलाल मोरलगायतको लगानी छ।
पुरानो आवेदनको टुंगो नलगाई उही नामबाट नयाँ कम्पनीलाई आवेदन दिएको विषयमा पुरानो कम्पनीका लगानीकर्ताहरूले प्रश्न गर्न थालेका हुन्।
'२०६६ मंसिर १५ गते हामी १७ वटा कम्पनी मिलेर हिमालयन स्टक एक्सचेन्ज लिमिटेडको नाममा आवेदन दिएका थियौं। तोकेको सम्पूर्ण कागजात र २५ हजार रूपैयाँ धरौटीसहित कानुनी रूपमा बोर्डमा दर्ता गरेका थियौं,' सो समयका एक लगानीकर्ता रमेश कुमार भट्टराईले भने।
उनको प्रतिप्रश्न छ, 'हाम्रो कारबाही नटुंग्याई, धरौटी फिर्ता नगरी यही नाममा कसरी नयाँ निवेदन लिन मिल्छ?'
धितोपत्र बोर्डले भने यसमा कुनै प्रतिक्रिया दिन चाहेन। निकै अघिदेखि नयाँ स्टक एक्सचेन्ज ल्याउने प्रयास भएपनि पटक/पटक यो अवरुद्ध हुँदै आएको छ।
पछिल्लो समय बोर्डले चुक्ता पुँजी लगायत नयाँ नीतिगत व्यवस्था सहित नयाँ स्टक एक्सचेन्ज खोल्ने प्रयास गरेको हो।
असोजमै नयाँ स्टक एक्सचेन्ज खोल्ने प्रक्रिया सुरू गरिएकोमा सर्वोच्च अदालतमा मुद्दा परेसँगै रोकिएको थियो।
सर्वोच्च अदालतका न्यायाधीश अनिलकुमार सिन्हा र सुष्मालता माथेमाको इजलासले स्टक एक्सचेन्ज खोल्ने बाटो खुला गरिदिएसँगै प्रक्रिया अगाडि बढेको हो।
-copy-1745411477.jpg)
-1746009348.jpg)
