प्रमुख प्रतिपक्षी दल नेपाली कांग्रेसका सांसद मिनेन्द्र रिजालले अर्थमन्त्रालयले नेतृत्वदायी भूमिका निर्वाह गर्न नसकेको टिप्पणी गरेका छन्।
प्रतिनिधिसभाको मंगलबारको बैठकमा ‘विनियोजन विधेयक २०७६ अन्तर्गत अर्थमन्त्रालय शिर्षकको खर्च रकममा उल्लेखित खर्च रकम घटाइयोस्’ भनि खर्च कटौतीको प्रस्ताव प्रस्तुत गर्दै उनले अर्थमन्त्रालयले जिम्मेवार ढंगले नेतृत्वदायी भूमिका निर्वाह गर्न नसकेको बताएका हुन्।
अर्थमन्त्रालयले ‘म केही पनि काम गर्न सक्दिनँ’ भनेर प्रधानमन्त्रीलाई नै सबै जिम्मेवारी लगाउने काम गरेको टिप्पणी गरे।
उनले साढे ८ प्रतिशत आर्थिक वृद्धिका लागि बलियो आधारबाट योजना निर्माण गर्नुपर्ने जिम्मेवारी अर्थमन्त्रालयले बहन गर्न नसकेको बताए।
प्रमुख प्रतिपक्षी दल नेपाली कांग्रेसका छाया अर्थमन्त्री समेत रहेका सांसद रिजालले विदेशी मुलुकले विगतमा अवलम्बन गरेको आर्थिक नीति र तिनले भोग्नुपरेको परिणामको चर्चा गर्दै सरकारलाई विश्व इतिहासलाई सम्झन आग्रह गरे।
अधिकारको केन्द्रीकरणले सोभियत युनियन इतिहासको पन्नामा सीमित भएको भन्दै उनले अधिकारको केन्द्रीकरणले मुलुकलाई विकासको बाटोमा नभई पतनको बाटोमा डोर्याउने दाबी गरे।
तन्द्रामा बसेर मुलुकको विकास नहुने भन्दै उनले वस्तुस्थितिको विश्लेषण गर्नुपर्नेमा जोड दिए।
उनले भने, ‘आँखा चिम्लेर चुल्हाचुल्हामा नालीबाट ग्यास आउँछ। ग्यासको सिलिण्डर नै किन्नु पर्दैन भन्ने जस्ता तन्द्रामा हिँडेर देशको विकास हुँदैन। तन्द्रामा बसेर नेपालमा स्टीमर मात्र होइन नेपालमा ठूला-ठूला पानी जहाज चलाउँछु अनि हिन्द महासागरसम्म अघि गएकै वर्षमा पुर्याउँछु भनेर तन्द्रा बोलेर विकास हुँदैन।’
उनले अर्थमन्त्रालयका लागि चालू खर्चमा विनियोजन भएको बजेटबाट ४ करोड ८६ लाख घटाइ अघिल्लो वर्षकै बराबर राख्न प्रस्ताव गरे।
गुठी सम्बन्धी विधेयकको सन्दर्भमा उनले धर्म निरपेक्ष भनेको धार्मिक स्वतन्त्रता भएको भन्दै त्यसलाई भत्काउने काम नगर्न सरकारलाई सचेत गराए।
उनले भने, ‘कुनै समय ठूलै नेताले इन्द्रजात्राको खर्च कटाउनुभो। ठूलो विरोध भयो। पछि त्यो इन्द्रजात्राको खर्च फिर्ता गर्नुपर्यो। काठमाडौंको र हाम्रो मुलुकको रितिथिति, संस्कृति र परम्परालाई भत्काउने गरी गुठीसम्बन्धी विधेयक बोकेर नआउनुहोस्।’