बुधबार भोजपुर सदरमुकाममा हटियाको दिन थियो। बिहानै सादा पोशाकका प्रहरी हटिया क्षेत्रमा गस्ती निस्केका थिए।
भोजपुरका प्रमुख जिल्ला अधिकारी नुरहरि खतिवडाका अनुसार पाँच जनाको संख्यामा प्रहरी हाट बजार गस्तीमा थिए।
साढे ८ बजे अचानक तिनै प्रहरीमध्ये एक जनामाथि गोली चल्यो। चार-पाँच जनाको संख्यामै रहेका नेत्रविक्रम चन्द विप्लव नेतृत्वको नेपाल कम्यनिष्ट पार्टीका कार्यकर्ताले चलाएको गोली प्रहरी जवान सन्जीव राईलाई लाग्यो।
‘साथीमाथि गोली लागेपछि नजिकै रहेका अर्का प्रहरीले तुरुन्तै गोली चलाउँदा विप्लव कार्यकर्ताको मृत्यु भएको हो,’ प्रजिअ खतिवडाले सेतोपाटीसँग भने।
प्रहरीको गोली लागेर विप्लवका ओखलढुंगा इन्चार्ज नीरकुमार राईको मृत्यु भएको खतिवडाले बताए।
उनका अनुसार प्रहरी जवानलाई पछाडिबाट झुक्याएर गोली हानिएको थियो। अर्का प्रहरीले तुरुन्तै प्रतिकारस्वरूप राईमाथि गोली चलाएका थिए। दुबै जनाको घटनास्थलमै मृत्यु भएको बताइएको छ।
प्रहरीले भोजपुर घटनाबारे औपचारिक जानकारी दिइसकेको छैन। मृतक विप्लव माओवादी कार्यकर्ताबाट एक थान चाइनिज पेस्तोल र त्यसको छ राउन्ड गोली बरामद भएको प्रहरीले जनाएको छ।
गोली हानाहानपछि विप्लवका केही कार्यकर्ता भागेका छन्। तिनीहरुको खोजी भइरहेको प्रहरीले जनाएको छ।
यो पनि,
भोजपुरमा प्रहरी र विप्लव कार्यकर्ताबीच गोली हानाहान हुँदा १ प्रहरीसहित २ जनाको मृत्यु