प्रधानन्यायाधीश चोलेन्द्रशमशेर जबराको राजीनामा र गोलाप्रथाद्वारा पेशी तोक्न माग गर्दै सिरहा र सप्तरी जिल्ला अदालतका वकिलहरू आन्दोलनमा उत्रिएका छन्।
बार एसोसिएसन प्रदेश २ को निर्णय अनुसार आइतबारदेखि सिरहा र सप्तरी जिल्ला अदालतका आकस्मिकबाहेकका सम्पूर्ण काम ठप्प पारिएको छ। एक साताभित्र माग सम्बोधन नभए उच्च अदालत जनकपुरको समेत सम्पूर्ण कामकारबाही ठप्प पार्ने प्रदेश २ बार एसोसिएसनले चेतावनी दिएको छ।
जिल्ला, उच्च र विशेष र सर्वोच्च अदालतमा समेत गोलाप्रथाबाट पेशी व्यवस्थापन र प्रधानन्यायाधीशले राजीनामा नदिउन्जेल आन्दोलन जारी रहने बार एसोसिएसन सप्तरीका अध्यक्ष दोमन साहले बताए।
‘बन्दी प्रत्यक्षीकरण, थुनछेक, रिट निवेदनको सिंगल सुनुवाइ, रोकका निवेदन र फुकुवा निवेदनका कामबाहेक सबै सेवा हामीले ठप्प पारेका छौं,’ अध्यक्ष साहले भने।
बार एसोसिएसनको आन्दोलनले बकपत्र र दैनिक मुद्दा पेशी स्थगित भएको सप्तरी जिल्ला अदालतका सूचना अधिकारी भरतमणि पोखरेलले जानकारी दिए। यी बाहेक अन्य कामहरू नियमितझैं भइरहेको उनले बताए।
वकिलहरूको आन्दोलनले अदालतको आकस्मिकबाहेकका सम्पूर्ण गतिविधि ठप्प रहेको सिरहा जिल्ला अदालतका स्रेस्तेदार जगदीश्वर भट्टराईले बताए। ‘अदालतको लगभग सबै कामहरू स्थगित छ। सामान्य निवेदनहरू दर्ता गर्ने काम मात्र भइरहेको छ,’ उनले भने।
सिरहा र सप्तरी जिल्ला अदालतबाहेक प्रदेश २ का अन्य ६ वटा जिल्लाहरूमा समेत वकिलहरूले धर्ना, प्रदर्शन जारी राखेका छन्। उनीहरूले विहान ११ बजेदेखि १२ बजेसम्म अदालतको गेट अगाडि धर्ना बस्ने गरेका छन्।
यद्यपि, धर्ना प्रदर्शनले खासै प्रभाव नपरेको पर्सा जिल्ला अदालतका सूचना अधिकारी धनिप्रसाद चपाइले बताए। ‘१२ बजेसम्म उहाँहरू धर्ना बस्नुहुन्छ। तर नआए पनि काम रोकिएको छैन। आन्तरिक कामहरू भइराखेकै हुन्छ,’ उनले भने।
वकिलहरूले उच्च अदालत जनकपुर र उच्च अदालत जनकपुरकै वीरगञ्ज इजलासको गेट अगाडि समेत दिनको एक घण्टा आन्दोलन गर्ने गरेका छन्।
एक साताभित्र माग सुनुवाइ नभए उच्च अदालतको समेत काम कारबाही ठप्प पार्ने अल्टिमेटमसहितको पत्र आएको उच्च अदालत जनकपुरका रजिष्ट्रार खड्गराज अधिकारीले बताए।
‘उच्च अदालतको गेट अगाडि उहाँहरूले दैनिक एक घण्टा धर्ना दिइराख्नुभएको छ। अवरोध सिर्जना गरिराख्नुभएको छ,’ उनले भने, ‘धर्ना दिएको समयमा अफिसको आन्तरिक काम भइरहेको छ। अहिलेसम्म खासै केही प्रभाव परेको छैन। तर एक साताभित्र निमयवली संशोधन भएन, सफ्टवेयर चेन्ज भएर आएन भने अनिश्चितकालीन धर्ना दिने कुरा आएको छ।’