राष्ट्रिय प्रजातन्त्र पार्टी सुदूरपश्चिमका नेता कार्यकर्ताले केन्द्रीय नेतृत्व परिवर्तन भएपछि उत्साहित भएको बताएका छन् ।
बुधबार धनगढीमा आयोजित विस्तारित बैठकमा बोल्ने विभिन्न जिल्लाका नेता तथा कार्यकर्ताले यस्तो बताएका हुन्।
अध्यक्षमा राजेन्द्र लिङ्देन चुनिएपछि राप्रपामा नयाँ जनलहर आउन सुरूआत भएको उनीहरूको ठम्याइ छ।
उक्त पार्टीका कञ्चनपुर जिल्ला अध्यक्ष गजेन्द्र चन्दले हिजो राप्रपा भनेर खुम्चिनुपर्ने अवस्था फेरिएर टाउको ठाडो पार्न सक्नेसम्म भएको बताए।
‘कार्यकर्ताको शिर झुक्न दिने छैन भन्ने अध्यक्षको बोली छ, यसले हामीलाई उत्साहित बनाएको छ,’ उनले भने।
यस्तै डडेल्धुरा जिल्ला अध्यक्ष राजेन्द्र भण्डारीले कार्यकर्ताको मनोबल बढाउन नेतृत्वले काम गर्नुपर्ने बताए।
उनले प्रशिक्षण नभएर कार्यकर्ता कमजोर हुनुपरेको बताए।
‘राप्रपाका मतदाता, शुभचिन्तक छँदैछन् भ्रष्टाचारबाट आजित भएर कहाँ जाऊँ भन्ने अवस्थामा पुगेका अरू दलका कार्यकर्ता पनि हामीसँग छन्,’ उनले भने।
राप्रपाका प्रतिनिधिहरूले केन्द्रीय नेतृत्वलाई जिल्लामा पनि आग्रह गरेका छन्।
केन्द्रीय कमिटीका सदस्यहरूले जिल्लाका लागि समय दिनसक्नुपर्ने उनीहरूको भनाइ छ।
बझाङ जिल्ला अध्यक्ष धिरजविक्रम सिंहले विगतका केन्द्रीय नेतृत्वको कारणले पार्टी कमजोर बन्नुपरेको बताए।
बिहीबार धनगढीमा राप्रपाको आमसभा हुँदैछ। त्यसको अघिल्लो दिन राप्रपा अध्यक्षसहितको केन्द्रीय टोली धनगढीमा छ।
-1746009348.jpg)
