विद्यार्थी संगठनहरूले मेडिकल कलेज सञ्चालकहरूसँग व्यक्तिगत सम्बन्ध स्थापित गर्दै उनीहरूको स्वार्थमा काम गर्ने नेताहरूको भण्डाफोर गर्ने निर्णय गरेका छन्।
आज संयुक्त बैठक बसेर उनीहरूले ‘शैक्षिक र मेडिकल माफियाहरूसँग व्यक्तिगत सम्बन्ध स्थापित गरेर उनीहरूको स्वार्थमा काम गर्ने राजनीतिक पार्टीका नेताहरू’ को भण्डाफोर गर्ने चेतावनी दिएका हुन्।
साथै विद्यार्थी संगठनहरूले विभिन्न कलेजहरूमा भइरहेको आन्दोलनमा ऐक्यवद्धता पनि जनाएका छन्।
चिकित्सा शिक्षा आयोगले तोकेकोभन्दा चर्को शुल्क लिएको विरोधमा विद्यार्थीहरूले विभिन्न कलेजमा आन्दोलन जारी राखेका छन्।
स्वतस्फूर्त रूपमा विभिन्न कलेजहरूमा भएका आन्दोलनप्रति ऐक्यवद्धता जनाउने निर्णयसमेत भएको बैठकमा सहभागी नेविसंघ महामन्त्री दीपक भट्टराईले बताए।
साथै विद्यार्थी संगठनहरूले विराटनगरस्थित नोबल मेडिकल कलेजमा आइतबार विद्यार्थीहरूमाथि आक्रमण भएकोमा विरोध गरेका छन्।
‘नोबेल मेडिकल कलेजमा विद्यार्थीमाथि आक्रमण गर्नेहरू र आक्रमण गर्न लगाउने मेडिकल कलेज सञ्चालकहरूलाई पक्राउ गरी कानुनी कारबाही गर्न माग गर्दछौं,’ बैठकमा सहभागी नेविसंघका अर्का महामन्त्री बलदेव तिमिल्सिनाले भने।
नेविसंघ, अखिल (क्रान्तिकारी), समाजवादी विद्यार्थी युनियनलगायतले बैठक गरेर गृहमन्त्री, शिक्षामन्त्री, चिकित्सा शिक्षा आयोगलगायतमा विद्यार्थीका मागबारे ज्ञापन पत्र बुझाउने निर्णय गरेका छन्।
बैठकमा नेविसंघ अध्यक्ष राजिव ढुंगाना, अखिल (क्रान्तिकारी) अध्यक्ष पञ्चा सिंह, समाजवादी विद्यार्थी युनियनका अध्यक्ष रूपनारायण श्रेष्ठलगायत उपस्थित थिए।
-1746009348.jpg)
