नेपाली कांग्रेसका नेता रामचन्द्र पौडेलले सत्तारूढ गठबन्धनले बनाएको राजनीतिक समन्वय समितिको बैठकमा १३ एजेन्डा छलफलका लागि राखेका छन्। उक्त समिति संयोजक पौडेल छन्।
राष्ट्रिय सभा निर्वाचनमा संयुक्त अभियान सञ्चालन गर्नेदेखि एमसिसीबारे धारणा तय गरिनुपर्ने विषय उनले राखेका हुन्।
गत बिहीबार र शुक्रबार बालुवाटारमा बसेको बैठकमा पौडेलले १३ बुँदा छलफलका लागि पेश गरेका थिए।
उनले आसन्न राष्ट्रिय सभा निर्वाचनमा संयुक्त अभियान सञ्चालन गर्ने, क्षेत्र विभाजन गर्ने र जिम्मेवारी निर्धारण गरिनुपर्ने विषय राखेका थिए।
माघ १२ मा राष्ट्रिय सभा निर्वाचन हुँदैछ। रिक्त १९ पदका लागि गठबन्धनका पाँच दलले भागबन्डा गरेर उम्मेदवार उठाएका छन् भने नेकपा एमालेलगायत अन्य दलबाट गरी ४३ जना उम्मेदवार छन्।
पौडेलले राखेका अर्को एजेन्डा संसदको गतिरोध अन्त्य गर्ने हो। उक्त बैठकमा भएको छलफलअनुसार गत शनिबार प्रधानमन्त्री शेरबहादुर देउवा प्रमुख प्रतिपक्षी दल नेकपा एमालेका अध्यक्ष केपी शर्मा ओलीलाई भेट्न बालकोटमै पुगेका थिए।
एमालेले लामो समयदेखि संसद बैठक अवरूद्ध गर्दै आएको छ।
साथै लामो समयदेखि सर्वोच्च अदालतमा पनि प्रधानन्यायाधीश चोलेन्द्रशम्शेर राणाको राजीनामा माग हुँदै आएको छ। सर्वोच्चमा देखिएको गतिरोध पनि अन्त्य गर्न पहल लिनुपर्ने पौडेल बताउँछन्।
एमसिसी अनुमोदनबारे गठबन्धनबाट प्रष्ट धारणा आउनुपर्ने पौडेल बताउँछन्। एमसिसीबारे अध्ययन गर्न पूर्वप्रधानमन्त्री झलनाथ खनालको नेतृत्वमा गठबन्धनले तीन सदस्यीय समिति नै बनाएको थियो।
नेता पौडेलले नारायणहिटी दरबार परिसरभित्र कुनै संरचना निर्माण गर्न नदिई त्यसलाई प्राकृतिक मोहर पार्कमा परिणत गरिनुपर्ने एजेन्डा पनि बैठकमा राखेका थिए।
अरू सरकारी जमिन, नदी किनाराका जमिन तथा राष्ट्रिय सम्पत्ति खोजविन गरी रेकर्ड तन्दुरुस्त राख्न लगाउने र तिनको उचित उपयोग र संरक्षण गराउनुपर्ने पनि उनको भनाइ थियो।
निजगढ विमानस्थल निर्माण, बूढीगण्डकी, अपर कर्णाली, सुनकोशी डाइभर्सन, भेरी डाइभर्सन, मेलम्ची र जनकपुर रेल संञ्चालन लगायतका राष्ट्रिय आयोजनाको गतिरोध हटाई कार्यान्वयन अघि बढाउनुपर्ने पनि संयोजक पौडेलले बताएका थिए।
कृषि मलको आपूर्ति व्यवस्था स्थायी रुपमा नै गर्नुपर्ने, उखु किसानको बाँकी वक्यौता उखु मिलका मालिकबाट भुक्तानी गराउने, भूमि आयोगको पूर्णता र कार्यन्वयन सम्वन्धमा, नागरिकता विधेयक अघि बढाउने, संघीय निजामति ऐन अघि बढाउने, आगामी स्थानीय र राष्ट्रिय चुनावबारे छलफल गर्न संयोजक पौडेलले एजेन्डा पेश गरेका थिए।
यीमध्ये संसदको गतिरोध अन्त्य गर्न प्रधानमन्त्री देउवाले नै पहल गरेका छन् भने राष्ट्रिय सभा सदस्य निर्वाचनमा पनि सत्तारूढ गठबन्धनको ध्यान छ। अन्य एजेन्डामा भने खासै छलफल अगाडि बढेको छैन।
सत्तारूढ गठबन्धनभित्र दुई-दुई महिनाको अन्तरालमा राजनीतिक समन्वय समितिको संयोजक परिवर्तन गर्ने सहमति छ। समितिमा ५ दलबाट ११ जना सदस्य छन्।
-1746009348.jpg)
