सत्तारूढ नेपाल कम्युनिष्ट पार्टी (एकीकृत समाजवादी) ले अतिक्रमणमा परेको नेपाली भूमि लिपुलेकमा भारतले सडक विस्तार गरिरहेको विषयमा आपत्ति जनाएको छ।
सोमबार एक विज्ञप्ति जारी गर्दै पूर्वप्रधानमन्त्री तथा नेकपा (एकीकृत समाजवादी) का विदेश विभाग प्रमुख झलनाथ खनालले भारतले नेपाली भूमि लिपुलेकमा सडक विस्तार जारी राखेको भन्दै विरोध जनाएका हुन्।
खनालले भारतीय प्रधानमन्त्री नरेन्द्र मोदीले केही दिनअघि दिएको अभिव्यक्तिको निन्दा गरेका छन्।
‘भारतीय सरकारले नेपाली भूमि लिपुलेकमा हाम्रो अखण्डतालाई उल्लंघन गर्दै गरेको सडक विस्तार र भारतीय नेताहरूले दिएको उक्साउने अभिव्यक्तिप्रति हाम्रो पार्टी घोर निन्दा गर्दछ,’ उनले विज्ञप्तिमा भनेका छन्, ‘हामी नेपाल सरकारलाई आफ्नो सीमा क्षेत्रको रक्षा गर्न आवश्यक कदम चाल्न अनुरोध गर्न चाहन्छौं।’
भारतीय सरकारलाई लिपुलेक, कालापानी र लिम्पियाधुरा क्षेत्र नेपाली भू-भाग रहेकोबारे राम्रोसँग जानकार रहेको पनि खनालले बताएका छन्। नेपाल सरकारको अनुमतिबिना कुनै पनि काम गर्नु अवैध भएको उनले विज्ञप्तिमा उल्लेख गरेका छन्।
भारतीय प्रधानमन्त्री मोदीले डिसेम्बर ३० तारिखमा उत्तराखण्डको हल्दवानीमा चुनावी सभालाई सम्बोधन गर्दै लिपुलेकमा सडक विस्तारको काम भइरहेको बताएका थिए।
उनले तिब्बतको मानसरोवर जाने लिपुलेक सडकको विस्तार कार्य भइरहेको अभिव्यक्ति दिएका थिए। विगतको सरकारका कारण मानसरोवार जाने बाटो नबनेको पनि बताएका थिए।
भारतले नेपाली भूमि हुँदै सडक निर्माण गरेको भन्दै नेपालले आपत्ति जनाइसकेको छ। तर भारतले उक्त क्षेत्रमा सडक विस्तार कार्य जारी राखेको हो।
यो पनि: लिपुलेकमा सडक विस्तारको काम भइरहेको छ: मोदी (भिडिओ)
-1746009348.jpg)
