प्रमुख प्रतिपक्ष दल नेकपा (एमाले) का अध्यक्ष एवम् पूर्वप्रधानमन्त्री केपी शर्मा ओलीले माओवादी केन्द्रका अध्यक्ष पुष्पकमल दाहाल र नेकपा (एकीकृत समाजवादी)का अध्यक्ष माधवकुमार नेपाललाई कांग्रेसरूपी बञ्चरोको बिँडको संज्ञा दिएका छन्।
दाहाल र नेपालले आफ्नो पार्टीलाई ढाल्नका लागि कांग्रेसको बिँड बनेको अध्यक्ष ओलीको आरोप थियो।
पार्टीको प्रदेश कमिटी १ ले शनिबार पार्टी केन्द्रीय कार्यालय च्यासलमा आयोजना गरेको प्रशिक्षण कार्यक्रममा बोल्दै उनले २३ सिटमा खुम्चिएको कांग्रेसले सोझो आँखाले पनि आफ्नो पार्टीलाई हेर्न नसक्ने अवस्था भए पनि दाहाल–नेपालले मुलुकबाट वामपन्थी शक्ति सिध्याउने गरी कांग्रेसलाई साथ दिएको जिकिर समेत गरे।
अध्यक्ष ओलीले भने, ‘संघ निर्वाचन र प्रदेशसभाको निर्वाचन मंसिरमा एकैचोटी हुँदैछ। बञ्चरो लिएर ढाँल्न थालेछन् एउटा रूख काटेर। वरतिर, परतिरको रूखहरू बर्बर आँशु झारेर रूँन थालेछ। अनि अरू रूखहरूले सोधे–किन यसरी आँसु खसाएर रोएको? आखिर ढल्नु त छँदैछ, मर्नु त छँदैछ। बीचमा केही पनि भएन भने पनि २३ सिटमा पुर्याएको कांग्रेसले हामीतिर लड्ने त होइन, लड्ने कुरा छाडिदिऊँ, सोझो हेर्ने अवस्था पनि थिएन। यिनै बिँडले कम्युनिष्ट आन्दोलन भाँडेर, सरकार फुटाएर, अदालत गएर कम्युनिष्ट सरकार ढालीपाऊँ, दक्षिणपन्थी सरकार गठन गरी पाऊँ भनेका हुन्।’
उनले अगाडि भने, ‘कांग्रेसको बिँड हेर्नुस् त कस्ता छन्? एमाले सिध्याउने, भनेका बिँड कस्ता छन्। के–के नामका छन्? बञ्चरोले मात्रै रूख ढाल्न सक्दै सक्दैन। माओवादी र माधव नेपालका पछि लागेकालाई कांग्रेसको बिँड नभई आफ्नो पार्टी आउन आग्रह गर्दछु। कांग्रेसको बिँड भएर कम्युनिष्ट आन्दोलनलाई ढाल्दै जाने र समाजवाद निर्माण गर्ने भूलभूलैयामा नफस्नुस्। वामपन्थी आन्दोलन सफल पारौं।’
ओलीले आफ्नो पार्टीलाई देश बनाउनका लागि आगामी प्रदेशसभा र प्रतिनिधिसभा निर्वाचनमा बहुमत चाहिएको पनि दोहोर्याए।
मुलुकको शान्ति, समृद्धि र विकास आफ्नो पार्टीले मात्रै गर्न सक्ने दाबी गर्दै उनले त्यसका लागि निर्वाचनमा बहुमत ल्याउने गरी चुनावको तयारी गर्न पनि पार्टीको सिंगो पंक्तिलाई सचेत गराए।
-1746009348.jpg)
