कैलालीको गेटामा मेडिकल विश्वविद्यालय बनाउने निर्णयबाट सरकार पछि हट्न नहुने भन्दै आन्दोलन जारी छ।
गेटा मेडिकल विश्वविद्यालय संघर्ष समितले उक्त माग राख्दै आन्दोलन गरिरहेको हो। शुक्रबार संघर्ष समितिले सुदूरपश्चिममा मुख्यमन्त्री कमलबहादुर शाहलाई ज्ञापनपत्र बुझाएको छ।
गेटामा मेडिकल विश्वविद्यालयको ठाउँमा प्रतिष्ठान र एक सय शय्याको अस्पताल सञ्चालन गर्न खोजेकोले यसतर्फ सुदूरपश्चिम सरकारले ध्यान दिनुपर्ने माग राख्दै समितिले मुख्यमन्त्री शाहलाई ज्ञापनपत्र बुझाएको हो।
यस्तै, कैलालीका प्रमुख जिल्ला अधिकारी युवराज कटेललाई पनि ज्ञापनपत्र बुझाइएको छ।
उक्त ज्ञापनपत्र बुझ्दै मुख्यमन्त्री शाहले आफ्नो तर्फबाट हुने सक्दो प्रयास गर्ने बताए।
माग पूरा गर्नतर्फ सरकारले ध्यान नदिए सुदूरपश्चिम प्रदेशमा बन्दको घोषणा गर्ने तयारी रहेको संघर्ष समितिका संयोजक लोकराज पाण्डेले बताए।
सरकारले गेटामा दशरथचन्द मेडिकल विश्वविद्यालय स्थापना गर्ने गत माघ २९ गते निर्णय गरेको थियो।
तर जेठ १५ गतेको बजेट भाषणमा प्रतिष्ठान बनाउने भनेपछि विवाद उत्पन्न भएको हो। मन्त्रिपरिषदकै निर्णय कार्यान्वयन गर्नुपर्ने भन्दै विद्यार्थी, राजनीतिक दल, कार्यकर्ता, सर्वसाधारण आन्दोलनमा उत्रिएका छन्।
गेटा मेडिकल विश्वविद्यालय संघर्ष समितिले बिहीबार अत्तरियामा एक घण्टा चक्काजाम गरेको थियो।
मन्त्रिपरिषद्ले निर्णय गरेपछि नीति तथा कार्यक्रममा समेत समावेश भए पनि बजेटमा नसमेटिएपछि विरोध गर्न बाध्य भएको पाण्डेको भनाइ छ।
नीतिगत रूपमै सरकारलाई प्रभावमा पारेर माफियाहरूले मेडिकल विश्वविद्यालय बन्नबाट रोक्न खोजेको नेकपा माओवादी केन्द्रका केन्द्रीय सदस्य लक्षिराम आचार्यले बताए।
यो विषय सुदूरपश्चिम प्रदेश सभामा पनि प्रवेश पाएको छ।
सांसदहरूले सुदूरपश्चिममा मेडिकल विश्वविद्यालय बनाउने निर्णय कार्यान्वयन गर्नुपर्ने बताएका छन्।
सुुरूमा गेटामा मेडिकल कलेज बनाउने भनेर २५ वर्षदेखि कुरा चल्दै आएको थियो। देशभर २५ बढी स्वास्थ्य विज्ञान प्रतिष्ठान हुँदा पनि सुदूरपश्चिममा एउटा पनि छैन।
