बुटवलको सुप्रिम सहकारीका पीडितहरुले एमाले उपाध्यक्ष एवं पूर्व उपप्रधानमन्त्री विष्णु पौडेललाई आफ्नो बचत रकम फिर्ता गर्न पहल गरिदिन आग्रह गरेका छन्।
शुक्रबार एमाले रूपन्देहीको नवनिर्वाचित जिल्ला कमिटिको पदस्थापनका लागि बुटवल आएका पौडेललाई सुप्रिम सहकारीबाट पीडित बचतकर्ताहरूले भेट गरि उक्त आग्रह गरेका हुन्।
बालबच्चाको गाँस काटेर बचत गरेको रकम सहकारीका सञ्चालकहरूले ठगी गरेको बचतकर्ताहरूले बताए।
यस्तै, सुप्रिम सहकारीका अध्यक्ष जिवी राईले बुटवलका ८ हजारभन्दा बढि बचतकर्ताको १ अर्ब तीन करोड बचत रकम संकलन भागेको बताए। त्यसरी सम्पर्कविहीन हुँदा राज्यका नियमन निकाय मौन बसेको गुनासो गरे।
पौडेललाई बचतकर्ताहरूले ज्ञापनपत्र समेत बुझाएका थिए। यस्तै, सरकारले छानबिन समिति गठन गरेता पनि आफूहरूले न्याय पाउनेमा शंका उत्पन्न भएको बताए।
'सहकारी पीडितहरूका समस्याप्रति जानकार छु,' ज्ञापनपत्र बुझ्दै पौडेलले भने, 'जो जसले सहकारीको रकम हिनामिना गरेर भागेको भएपनि कानुनी दायरामा आउने छ।'
पौडेलले सहकारीका समस्या अध्ययन र अनुसन्धान गर्न संसदीय छानबिन समिति बनेको र उक्त समितिको प्रतिवेदन तयार हुँदासम्म धैर्य गर्न आग्रह गरे।
