सिराहाको कल्याणपुर नगरपालिकाकी २१ वर्षीया कञ्चन मण्डललाई पतिले आगो लगाएर हत्या गर्ने कोशिश गरेका छन्। उनका पति चेतन मण्डल अहिले फरार रहेको प्रहरीले जनाएको छ। बिहीबार बिहान भान्छामा काम गरिरहेकी कञ्चनलाई आगो लगाएर उनी फरार भएको अनुमान प्रहरीले गरेको छ।
उनलाई आगो लगाएर मार्ने कोशिश गरेको भन्दै प्रहरीले सासू सुर्जी खत्वेलाई पक्राउ गरेको छ। कञ्चनलाई भने उपचारका लागि पहिले विपी कोइराला मेमोरियल अस्पताल धरान र त्यसपछि काठमाडौंको कीर्तिपुर अस्पताल लगिएको छ।
उनको पूरा शरीरको लगभग पहिलो पत्रको छाला जलेको मिर्चैया इलाका प्रहरी कार्यालयका डिएसपी शुकदेव खनालले बताए।
भान्छामा काम गरिरहेका बेला शरीरमा पछाडिबाट आगो लगाइदिएको बयान कञ्चनले प्रहरीलाई दिएकी छन्।
'म भान्छामा काम गरिरहेकी थिएँ। आगो लागेपछि थाहा भयो। मलाई मेरो पति र सासूले यस्तो अप्ठ्यारोमा पारे,' कञ्चनलाई उद्धृत गर्दै डिएसपी शुकदेव खनालले सेतोपाटीसँग भने।
कञ्चनलाई जलाएको थाहा भएपछि छिमेकीले प्रहरी बोलाएका थिए। प्रहरी र गाउँले मिलेर उनको उद्धार गरेको खनालले बताए। कञ्चनकी डेढ वर्षीया छोरी छन्।
सासूलाई पक्राउ गरे पनि अहिलेसम्म उनले केही कुरा नखोलेको प्रहरीले जनाएको छ।
'कञ्चनकी सासूसँग हामीले बयान लिएका छौं तर उनी केही बोल्दिनन्। त्यसैले मौकामा पीडितसँगै लिएको बयानका आधारमा हामीले अनुसन्धान अघि बढाएका छौं,' डिएसपी खनालले भने, 'उनका पतिलाई पनि हामीले खोजी गरिरहेका छौं।'
प्रकाशित मिति: शुक्रबार, वैशाख १३, २०७६, ०४:०७:००
.jpg)
