दाङको तुलसीपुर उपमहानगरपालिकाका प्रमुख प्रशासकीय अधिकृत कृष्णकान्त उपाध्याय स्रोत नखुलेको करिब साढे १४ लाख रकमसहित पक्राउ परेका छन्।
अख्तियार दुरूपयोग अनुसन्धान आयोगको टोलीले उपाध्यायलाई शुक्रबार बेलुकी चन्द्रागिरि नगरपालिका वडा नं. २ नागढुंगाबाट पक्राउ गरेको अख्तियारका प्रवक्ता तारानाथ अधिकारीले सेतोपाटीलाई जानकारी दिए।
प्रमुख प्रशासकीय अधिकृत उपाध्यायको साथबाट एक लाख २४ हजार सात सय ५० नगद, फिक्स डिपोजिट गरेको चार लाख २९ हजारको रसिद र आठ लाख ९५ हजार बिल डिपोजिट गरेको भौचर बरामद भएको अख्यितारका प्रवक्ता अधिकारीले जानकारी दिए।
‘उपाध्यायसँग नगद र भौचर समेत गरि १४ लाख ४८ हजार सात सय ९५ बराबरको नगद र बैंकमा रकम जम्मा गरेको भौचर बरामद भएको छ,’ अख्यितार प्रवक्ता अधिकारीले भने, ‘घुस बापतको अस्वभाविक रकमसहित प्रमुख प्रशासकीय अधिकृत उपाध्याय काठमाडौं आउँदै गरेको भन्ने गोप्य सूचनाको आधारमा हामीले उहाँलाई पक्राउ गरेका हौं।’
बा २ झ ४०९९ नम्बरको सरकारी गाडीबाट काठमाडौं जाँदै गरेका उपाध्यायलाई गोप्य सूचनाको अधारमा अख्तियारको टोलीले पक्राउ गरेको प्रवक्ता अधिकारीले बताए।
घटनाबारे थप अनुसन्धान भइरहेको प्रवक्ता अधिकारीले जानकारी दिए। उपाध्यायले तुलसीपुरका अन्य केही कर्मचारीको समेत नाम लिएको र त्यसबारे अनुसन्धान गर्न बाँकी रहेको स्रोतले बताएको छ।
