चार लिटर रक्तचन्दनको तेलसहित प्रहरीले महांकालबाट एक जनालाई पक्राउ गरेको छ।
पक्राउ पर्नेमा सिन्हुपाल्चोक भोटेकोसी गाउँपालिका-४ घर भई हाल काठमाडौं-६ नयाँबस्ती बस्ने ३० वर्षीय छिरिङ शेर्पा छन्।
मंगलबार दिउँसो प्रहरीले उनी सवार बा७च ४११० नम्बरको कारबाट रक्तचन्दनको तेल बरामद भएको महानगरीय प्रहरी वृत्त बौद्धले जनाएको छ।
प्रहरीले केही दिनअघि पनि ३३ लिटर रक्तचन्दनको तलसहित १० जनालाई पक्राउ गरेको थियो।
यो तेल कहाँबाट ल्याइएको हो भन्ने यकिन भइरहेको छैन। प्रहरीले शेर्पालाई तेलसहित जिल्ला वन कार्यालय बुझाउने तयारी गरिरहेको छ।
शेर्पाले भारतीयले तेल नयाँ बसपार्कमा ल्याइदिएको बताएका छन्। उनले ती भारतीयसँग २ लाख ८७ हजारमा किनेको बताएका छन्।
‘तर ती व्यक्ति को थिए भन्ने खुलाएका छैनन्, यसबारे अनुसन्धान भइरहेको छ,’ वृत्तका प्रमुख प्रहरी नायब उपरीक्षक ढुण्डीराज न्यौपानेले भने।