रूपन्देहीको लुम्बिनीस्थित बसपार्कमा रहेका माला पसलमा आगलागी भएको छ। आगलागीबाट टिनको छाप्राबाट बनाइएका १० वटा पसल जलेर नष्ट भएका छन् भने २ वटामा क्षति पुगेको छ।
बिहीबार राति करिब २ बजेदेखि लागेको आगो डेढ घण्टापछि नियन्त्रणमा आएको प्रहरीले जनाएको छ।
नजिकै रहेको लुम्बिनी सांस्कृतिक नगरपालिकामा रहेको दमकल समेत समयमा नआउँदा ठूलो क्षति भएको आगलागी पीडित मनोजध्वज बस्नेतले गुनासो गरे।
आगलागीबाट बसपार्क क्षेत्रमा रहेका माला, कम्प्युटर, रेष्टुरेण्ट, गिफ्ट हाउस, फेन्सी पसल जलेर नष्ट भएका छन्।
समयमा दमकल नपुगेपछि स्थानीय युवाले छाप्रोमा राखिएका टिनका पाता निकालेर आगो नियन्त्रणमा लिएका थिए। त्यसपछि मात्रै भैरहवाबाट दमकल आगलागी भएको ठाउँमा पुगेको थियो।
पीडित पक्ष र प्रहरीको भनाइअनुसार आगलागीबाट करिब ७० लाखको क्षति भएको छ।
आगलागीबाट केही पसल धनीको नगद रुपैयाँसमेत जलेर नष्ट भएको उनीहरूले बताएका छन्।
आगलागी हुनुको कारणबारे प्रहरीले अनुसन्धान गरिरहेको जनाएको छ।
बसपार्कको छेउछाउमा टहरा बनाएर लुम्बिनी विकास कोषले भाडामा लगाएको थियो। यहाँ करिब ३ दर्जन टहरामा फलफूल, माला तथा अन्य विभिन्न व्यवसाय सञ्चालन भइरहेका छन्।
-1746009348.jpg)
