शिक्षा, विज्ञान तथा प्रविधि मन्त्रालयले विद्यार्थीलाई व्यवहारिक सीप र कार्य अनुभव दिलाउन भन्दै प्रशिक्षार्थी (इन्टर्न) राख्नेसम्बन्धी कार्यविधि बनाएको छ।
मन्त्रीस्तरीय निर्णयबाट मन्त्रालयले सुशासन (व्यवस्थापन तथा सञ्चालन) नियमावली २०६५ को नियम ९ को उपनियम १ ले दिएको अधिकार प्रयोग गरी कार्यविधि बनाएको हो।
मन्त्रालयले आफ्नो आन्तरिक प्रक्रियालाई व्यवस्थित गर्न यो कार्यविधि बनाइएको उल्लेख गरेको छ।
विश्वविद्यालय वा प्रतिष्ठानमा अध्ययनरत तथा उच्च शैक्षिक उपाधि (स्नातक वा सोभन्दा माथि) प्रतिक्षारत विद्यार्थीहरूलाई शिक्षा मन्त्रालय तथा मातहत निकायबाट सम्पादित हुने कार्य र सेवाका विषयमा सीप र अनुभव दिलाउन आवश्यक भएको भन्दै मन्त्रालयले कार्यविधि बनाएको हो।
इन्टर्नको कार्यक्षेत्र पहिचान गरी सिफारिस गर्न मन्त्रालयले उच्च शिक्षा महाशाखाका सहसचिव संयोजक रहने गरी तीन सदस्यीय समिति बनाउनेछ। मन्त्रालय तथा मातहत निकायमा एक पटकमा बढीमा २० जनासम्मलाई इन्टर्नमा समावेश गर्ने तयारी छ।
मन्त्रालयले सूचना निकालेर इन्टर्न रहेर काम गर्न इच्छुकलाई आह्वान गर्नेछ। स्नातक वा स्नातकोत्तर अध्ययन गरी उपाधिका लागि प्रतिक्षारत रहेको र निवेदकबाट उच्च शैक्षिक संस्थाको सिफारिस संलग्न राख्नु पर्ने कार्यविधिमा उल्लेख छ।
इन्टर्नको कार्यअवधि विद्यार्थीको परीक्षण अवधि बढीमा तीन महिनासम्म हुनेछ। तर विश्वविद्यालयको पाठ्यक्रमबमोजिम इन्टर्नसीपमा आबद्ध हुने इन्टर्नको हकमा तीन महिनाभन्दा बढी इन्टर्नसीप गराउन बाधा पर्ने छैन भन्ने कार्यविधिमा व्यवस्था छ।
यस्तो छ कार्यविधि:
-1746009348.jpg)
