काठमाडौं महानगरपालिकाले माछापोखरी आसपासका सडक किनारा क्षेत्रमा तरकारी बेच्न नदिएपछि तारकेश्वर र नुवाकोटका स्थानीय बासिन्दाहरूले फोहोरका गाडीहरूलाई बाटोमै रोकेका छन्।
काठमाडौं उपत्यकाबाट फोहोर बोकेर गएका गाडीहरू तीनपिप्ले र कागतीगाउँ क्षेत्रमा रोकिएका छन्। माछापोखरी क्षेत्रमा तरकारी बिक्री गर्न रोकेको विरोधमा फोहोर बिसर्जनमा अवरोध पुर्याएको स्थानीय भवनाथ गजुरेलले सेतोपाटीलाई बताए।
‘काठमाडौं महानगरपालिकाले आज बिहानै तरकारी बेच्न माछापोखरी क्षेत्रमा गएका स्थानीयलाई धरपकड गर्ने, बिहानैदेखि त्यस क्षेत्रमा नगर प्रहरी तैनाथ गर्नेजस्ता काम गरेपछि त्यसैको प्रतिक्रियास्वरूप फोहोरका गाडी रोकिएको हो,’ उनले भने, ‘तीनपिप्ले मात्र होइन, कागतीगाउँदेखि नै फोहोरका गाडी अघि बढेको छैन।’
काठमाडौं उपत्यकाबाट दिनहुँ १५ सय टनभन्दा बढी फोहोर बन्चरेडाँडास्थित ल्याण्डफिल साइट जाने गरेको छ। काठमाडौंका सबै स्थानीय तह, ललितपुर महानगर, महालक्ष्मी नगरपालिका, भक्तपुरका भक्तपुरबाहेक स्थानीय तह र बनेपा र धादिङको धुनिवेशी नगरपालिकाको फोहोरसमेत बन्चरेडाँडामै व्यवस्थापन हुन्छ।
ककनी गाउँपालिकाका उपाध्यक्ष मिठ्ठुमाया तामाङले पनि फोहोर बिसर्जनमा स्थानीयले अवरोध पुर्याएको बताइन्।
‘तरकारी बेच्न नदिएकाले हामीले फोहोरको गाडी रोक्यौं भनेर स्थानीयहरूले भन्नुभएको छ। सडक पनि बनाएनन्, बाटोमा झरेका फोहोर पनि टिप्दैनन्, अहिले त हामीलाई तरकारी पनि बेच्न दिइएन भन्ने गुनासो छ,’ उनले भनिन्।
महानगरपालिकाका वातावरण विभाग प्रमुख सरिता राईले फोहोर बिसर्जन कार्य शुक्रबार बिहानैदेखि रोकिएको बताइन्।
‘आज बिहानैदेखि कागती गाउँवासीले फोहोर लैजानै रोकेका छन्। यसबारेमा बालाजुमा छलफल भइरहेको छ,’ उनले भनिन्।
प्रहरी वृत्त बालाजुमा दुवै पक्षबीच छलफल भइरहेको छ।
ककनी गाउँपालिकाका स्थानीय, जनप्रतिनिधि, काठमाडौं महानगरपालिकाका नगर प्रहरी लगायत छलफलमा छन्।
काठमाडौंको फोहोर २०६२ जेठ ५ गतेदेखि नुवाकोटको सिसडोल क्षेत्रमा लगिने गरिएको थियो। २०७९ साल जेठदेखि धादिङ र नुवाकोटको सीमा क्षेत्र बन्चरेडाँडामा फोहोर लैजान थालिएको थियो। त्यहाँ संघीय सरकारले करिब एक अर्ब लागतमा दीर्घकालीन ल्याण्डफिल साइट बनाएको छ।
स्थानीयले फोहोर बिसर्जन गर्दै आएको बन्चरेडाँडा वरपरको करिब तीन किमी क्षेत्रलाई मध्यवर्ती क्षेत्र घोषणा गर्नुपर्ने र मुआब्जा दिनुपर्ने माग गर्दै बेलाबेला फोहोर फाल्न रोक लगाउने गर्दै आएका छन्। यसपटक भने करिब तीन किमी वरै कागती गाउँका स्थानीयले फोहोरका गाडी रोकेका हुन्।
तस्बिरहरू:
