सहिद स्मारक ए डिभिजन लिगमा त्रिभुवन आर्मी फुटबल क्लबले पहिलो जित हात पारेको छ। सुरूवाती दुई खेलमा बराबरी खेलेको आर्मीले आफ्नो तेस्रो खेलमा भने जित निकाल्न सफल भयो।
आइतबार साँझ आर्मीले पहिलो जित हात पार्ने क्रममा ब्रिगेड ब्वाइज क्लब (बिबिसी) लाई १-० गोलले पराजित गर्यो।
आर्मीलाई गोल गर्न खेलको ८१ मिनेटसम्म कुर्नु परेको थियो। आर्मीका लागि कप्तान भरत खवासले उत्कृष्ट फिनिसिङ गरेका थिए। मध्यभागबाट सन्तोष तामाङले बिबिसीका डिफेन्डरलाई कटाउँदै दिएको पासमा भारतले गोल गरेका थिए।
पहिलो खेलमा आर्मीले नेपाल पुलिससँग १-१ गोल र दोस्रो खेलमा मछिन्द्रसँग गोलरहित बराबरी खेलको थियो।
बिबिसीको भने यो पहिलो हार हो। पहिलो खेलमा एपिएफलाई ३-२ ले हराएको बिबिसीले दोस्रो खेलमा न्युरोड टिम (एनआरटी) सँग गोलरहित बराबरी खेलेको थियो।
लिगको अंक तालिकामा आर्मी तीन खेलबाट पाँच अंक जोड्दै चौथो स्थानमा उक्लिएको छ। पाँचौ स्थानमा रहेको बिबिसीको चार अंक छ।
लिगमा अब बुधबार तेस्रो चरणका अन्तिम दुई खेल हुनेछन्। पहिलो खेलमा हिमालयन शेर्पा र नेपाल पुलिस तथा दोस्रो खेलमा जावलाखेल युथ क्लब र मछिन्द्रबीच प्रतिस्पर्धा हुनेछ।
