नेपाल प्रिमियर लिग (एनपिएल) मा पाकिस्तानी खेलाडीहरूको सहभागिता अन्योलमा परेको छ। पाकिस्तान क्रिकेट बोर्ड (पिसिबी) ले खेलाडीलाई प्रतियोगितामा सहभागी हुन आवश्यक पर्ने प्रमाणपत्र (एनओसी) दिने प्रक्रिया रोकेपछि उनीहरूको सहभागितामाथि प्रश्न उठेको हो।
क्रिकेटसम्बन्धी चर्चित मिडिया क्रिकइन्फोका अनुसार एनपिएलसँग सम्बन्धित विभिन्न व्यक्तिहरूले पाकिस्तानी खेलाडीको एनओसी रोकिएको पुष्टि गरेका छन्। यसअघि एनओसी पाइसकेका खेलाडीलाई समेत प्रतियोगितामा खेल्ने अनुमति तत्कालका लागि रोकिएको जानकारी दिइएको छ।
यस विषयमा नेपाल क्रिकेट संघ (क्यान) का सचिव पारस खड्काले पनि आफूहरूले त्यस्तै सुनेको बताएका छन्। तर एनओसीका लागि आफूहरुले केही गर्न नसक्ने तथा सम्बन्धित बोर्डको निर्णय भएको बताएका छन्। साथै एनओसीबिना खेलाडीले एनपिएल खेल्न नपाउने पनि पारसले आइतबार त्रिवि मैदानमा बताए।
एनपिएलसँग सम्बन्धित केही व्यक्तिका अनुसार पीसीबीले प्रत्येक पाकिस्तानी खेलाडीको एनओसीका लागि करिब २५ हजार अमेरिकी डलर शुल्क मागेको हुन सक्ने बताइएको छ। तर, पीसीबीले यस्तो माग लिखित रूपमा गरेको हो वा होइन भन्ने कुरा पुष्टि भएको छैन। एनओसी रोक्नुको मुख्य कारण यही शुल्क हो वा अन्य कुनै विषय हो भन्ने पनि स्पष्ट भइसकेको छैन।
यस वर्षको एनपिएल अक्टोबर २६ देखि नोभेम्बर २१ सम्म सञ्चालन हुँदैछ। आठ टोली सहभागी हुने प्रतियोगिताका खेल काठमाडौंमा आयोजना हुनेछन्।
एनपिएल खेल्न आउने केही पाकिस्तानी खेलाडी काठमाडौं आइसकेका छन्। त्यस्तै, नेपाल आउन तयारी गरिरहेका अन्य खेलाडीले भने समस्या समाधान नभएसम्म आफ्नो यात्रा स्थगित गरेको बुझिएको छ।
यस विषयमा पीसीबीले तत्काल प्रतिक्रिया दिएको छैन।
को-को छन् एनपिएल खेल्ने पाकिस्तानी खेलाडी?
एनपिएलमा सहभागी हुने पाकिस्तानी खेलाडीको सूचीमा पाकिस्तानका टी-२० कप्तान साहिबजादा फरहानसहित हैदर अली, हुनेन शाह, हुसेन तलात, इफ्तिखार अहमद, हसन अली र उसामा मिर छन्।
यीमध्ये कुनै पनि खेलाडी एनपिएल सञ्चालन हुने मितिसँग जुध्ने पाकिस्तानको राष्ट्रिय टोलीको कार्यक्रममा समावेश छैनन्।
टी-२० लिग खेल्न पाउने नयाँ व्यवस्थाको अवस्था के छ?
यसै वर्ष पीसीबीले केन्द्रीय सम्झौताको नयाँ संरचना सार्वजनिक गरेको थियो। उक्त संरचनामा एकदिवसीय र टी-२० तथा टेस्ट क्रिकेटका खेलाडीलाई छुट्टाछुट्टै वर्गमा राखिएको थियो।
त्यसमा ‘फर्म्याट ट्र्याक डी’ नामको श्रेणी पनि समावेश थियो, जसअन्तर्गतका खेलाडीलाई टी-२० विशेषज्ञ मानिने व्यवस्था थियो। सैद्धान्तिक रूपमा यस श्रेणीका खेलाडीले पीसीबीले तोकेको अन्तर्राष्ट्रिय जिम्मेवारीसँग नजुध्ने गरी आफूले चाहेका विभिन्न टी-२० लिग खेल्न पाउने अपेक्षा गरिएको थियो।
तर, पीसीबीले अहिलेसम्म कुन खेलाडी कुन श्रेणीमा पर्छन् भन्ने सार्वजनिक गरेको छैन। नयाँ सम्झौता संरचना पूर्ण रूपमा कार्यान्वयनमा आइसकेको छ वा छैन भन्ने पनि स्पष्ट छैन।
एनपिएल खेल्न लागेका कुनै पनि पाकिस्तानी खेलाडी अहिले पाकिस्तानको टेस्ट वा एकदिवसीय टोलीको योजनामा छैनन्। त्यसैले अन्तर्राष्ट्रिय खेल तालिकासँग जुधेको विषयभन्दा पनि एनओसी रोक्नुको वास्तविक कारण र शुल्कसम्बन्धी चर्चाले अहिले उनीहरूको सहभागितालाई अन्योलमा पारेको छ।
