खुले ठमेलका होटल-रेष्टुरेन्ट, छैनन् ग्राहक (तस्बिरहरू)

नारायण महर्जन

काठमाडौं, साउन १५

सरकारको निर्णयअनुसार बिहीबारदेखि देशभरिका होटल तथा रेष्टुरेन्टहरू खुलेका छन्। गत चैत ११ गते लकडाउन भएयता पहिलो दिन आज होटल र रेष्टुरेन्ट खुलेका हुन्।

होटल र रेष्टुरेन्ट खुले पनि ग्राहक भने आएका छैनन्। राजधानीको प्रमुख पर्यटकीय क्षेत्र ठमेलमा बिहीबार दिउँसो पुग्दा प्राय: रेष्टुरेन्ट खुलेका थिए। तर ग्राहक भने फाट्टफुट्टमात्र थिए।

ला बेला क्याफे एन्ड एक्वा क्याफेका सिनियर वेटर प्रज्वल अधिकारीले ग्राहक नै नआएको बताए।

‘होटल रेष्टुरेन्टमा आउने मान्छे त परको कुरा ठमेलका सडकमै मान्छे छैनन्,’ उनले भने,‘अझै ग्राहक आउन निकै कठिन छ।’

ठमेलको एक रेष्टुरेन्टमा मेक्सिकोका अब्राहम मोरालस थिए। उनी लकडाउन सुरू हुनुअघि नै नेपाल आएका हुन्। लुम्बिनी, पोखरा घुमेपछि लकडाउन भयो। उनी यतै अड्किए।

उनको भिसा सकिएको दुई महिना भइसक्यो। अब अन्तर्राष्ट्रिय उडान खुल्नासाथ उनीजस्ता पर्यटक फिर्ता जानु पर्नेछ।