जनकपुरका विश्वास उपाध्याय सन् २००८ को सुरूमा अमेरिका गए।
उनले नेपालगन्ज मेडिकल कलेजबाट एमबिबिएस सकेका थिए। अमेरिकामा इलिनोइ विश्वविद्यालयबाट इन्टरनल मेडिसिनमा एमडी सके।
सन् २०१३ मा एमडी सकेका उनले ६ वर्ष नेभाडा विश्वविद्यालयमा काम गरे। उनी त्यहाँ सहायक प्राध्यापक समेत थिए।
त्यसपछि उनी डालस सरे।
त्यसको एक मात्र कारण उनलाई आफैलाई केही गर्न मन थियो।
उनले स्कुले साथी डा. अमित बजाज र अरू केही साथीसँग मिले टेक्सस प्राइमरी एन्ड पिडियाट्रिक केयर क्लिनिक सुरू गरे। पछि अरू साथीहरूले छाडे। त्यसयता बाल रोग विशेषज्ञ रहेका अमित र इन्टरनल मेडिसिन पढेका विश्वास दुई जनाले क्लिनिक चलाए।
'कोभिडको समय भएकाले हामीलाई धेरै गाह्रो पनि भयो। तर हामी धेरैभन्दा धेरै नेपालीसँग जोडिन पायौं,' विश्वासले भने, 'बाहिर निस्किन समेत अप्ठ्यारो भएका बेला धेरै नेपालीहरू हामीसँग आए।
विश्वासका झन्डै चालीस प्रतिशत सेवाग्राही नेपाली समुदायका छन्।
डा. अमितकहाँ आउनेमध्ये बीस प्रतिशत नेपाली हुन्छन्।
'मकहाँ बालबालिका बाहेक सबै उमेर समूहका बिरामी आउँछन्,' डा. विश्वासले भने।
उनीजस्तै अरू थुप्रै चिकित्सक मिलेर टेक्ससमा हिमालयन हेल्थ क्लिनिक पनि चलाएका छन्। यो गैरनाफामूलक क्लिनिक हो। विश्वास मौका मिलेका बेला त्यहाँ जान्छन्।
'स्थापना गर्दा म धेरै जान्थेँ। अहिले पन्ध्र दिनदेखि एक महिनाको बीचमा पुग्छु। यो क्लिनिकमा चिकित्सकले शुल्क लिँदैनन्। ल्याब खर्च न्यून छ। यो क्लिनिक समस्यामा परेकाहरूका लागि हो,' उनले भने।
विश्वास शैक्षिक गतिविधिमा पनि केन्द्रित छन्। नर्थ टेक्सस विश्वविद्यालयका रेजिडेन्ट डाक्टरहरू उनको क्लिनिकमा आउँछन्।
पहिलो क्लिनिकले गति लिएसँगै उनीहरूले सन् २०२६ को सुरूआतदेखि डालसकै सेलिनामा अर्को क्लिनिक सुरू गरेका छन्।
'अस्पतालमा काम गर्दा जागिरेजस्तै भइन्छ। क्लिनिक भए दीर्घकालसम्मका लागि हुन्छ,' उनले भने, 'अनि क्लिनिकबाट नेपालीसँग जोडिन पाइन्छ भन्ने लाग्यो।'
उनले थपे, 'क्लिनिकको सबभन्दा राम्रो अनुभव नेपाली बिरामी हेर्न पाइयो। यसरी भेट्न पाइन्छ भन्ने लागेको थिएन। नेपाली समुदायमा एउटा छाप छोड्न सक्नु नै गर्वको कुरा हो। यो अनुभव जोकोहीले पाउन गाह्रो छ। मलाई त नेपालमै बसेर उपचार गरेको अनुभव हुन्छ।'
नेपाली समुदाय ठूलो भएको ठाउँमा ६ वर्षदेखि क्लिनिक चलाएकाले उनी नेपालीको स्वास्थ्य आनीबानीबारे जानकार छन्।
नेपालीमा मेटाबोलिक डिजिजको समस्या धेरै देखिने उनी बताउँछन्। तनाव र अनिद्राकै बीचमा धेरै दुःख गर्ने तर आराम नगर्दा समस्या भएको उनको भनाइ छ।
'व्यायाम नगर्ने अनि कार्बोहाइड्रेट धेरै खाने भएकाले यस्ता रोग लाग्छ,' उनले भने।
अमेरिकामा क्लिनिक अघि बढाउन सजिलो नभएको उनको अनुभव छ। डालसमै कतिले क्लिनिक सुरू गरेको तर पछि बन्द भएको उनले देखेका छन्।
'हामीले त क्लिनिक चलेन भने के गर्ने भन्ने उपाय नभइकन पनि सुरू गरेका थियौं। तर राम्रै भयो,' विश्वासले भने।
