त्रिभुवन अन्तर्राष्ट्रिय विमानस्थलमा सोमबार बिहान उत्सवको माहोल थियो।
नौमती बाजाको धुनबीच आगन्तुकहरूको स्वागत गर्न लाइनमा उभिएकाहरूले हात हातमा बधाईको ब्यानर, प्लाकार्ड र फूलमाला बोकेका थिए।
यसरी स्वागत गर्न उपस्थित समूहमा दुई जना मन्त्री पनि थिए — सञ्चारमन्त्री विक्रम तिमिल्सिना र संस्कृति तथा पर्यटनमन्त्री गनेश पौडेल।
हामीले कुनै अन्तर्राष्ट्रिय प्रतियोगिताबाट पदक जितेर स्वदेश फर्किरहेका खेलाडीको स्वागतमा खेलकुदमन्त्री विमानस्थल पुगेको धेरैचोटि देख्दै आएका थियौं। त्यो हाम्रा लागि नौलो दृश्य होइन। तर यसपटक विमानस्थलमा खेलाडीहरूको स्वागत हुँदै थिएन।
दुई-दुई जना मन्त्री पुष्पगुच्छासहित विमानस्थलमै पुगेर लामबद्ध भएका थिए, सिनेकर्मीहरूको स्वागतका लागि।
र, यो स्वागत हुँदै थियो अन्तर्राष्ट्रिय महोत्सव 'कान्स फिल्म फेस्टिभल' मा प्रतिष्ठित जुरी अवार्ड जितेर फर्केको नेपाली फिल्म 'एलिफेन्ट्स इन् द फग' का लेखक तथा निर्देशक अविनाशविक्रम शाह, निर्माता अनुप पौडेल र कलाकार पुष्पा थिङ लामाको।
कुनै नेपाली सिनेमाले अन्तर्राष्ट्रिय मञ्चमा पाएको उपलब्धिलाई लिएर राज्यले उच्च तहको सरकारी उपस्थितिसहित सम्मान गरेको सम्भवतः यो पहिलो घटना हो।
'एलिफेन्ट्स इन द फग' ले विश्वप्रसिद्ध कान्स फिल्म फेस्टिभलमा 'अन सर्टेन रिगार्ड' विधाअन्तर्गत प्रतिस्पर्धामा छनौट हुनुका साथै विश्वव्यापी प्रिमियरको अवसर पाएको थियो। कान्सको कुनै प्रतिस्पर्धामा छानिएको यो पहिलो नेपाली फिचर फिल्म हो। यसले त्यही विधाअन्तर्गत जुरी अवार्ड पाएको छ, जसलाई नेपाली सिनेमाले अन्तर्राष्ट्रिय मञ्चमा हासिल गरेको ऐतिहासिक उपलब्धिका रूपमा लिइएको छ।
कान्स महोत्सवको यो विधामा विश्वभरका फरक विषयवस्तु र शैलीका फिल्मलाई स्थान दिइन्छ।
त्यही उपलब्धिमा राज्यको प्रतिनिधित्व गर्दै विमानस्थल पुगेका सञ्चारमन्त्री तिमिल्सिनाले 'फरक धारका सिनेमालाई राज्यले प्रोत्साहन गर्ने' बताएका छन्। उनले कान्स महोत्सवबाट फर्किरहेका सिनेकर्मीहरूको टोलीलाई स्वागत गर्दै नेपाली फिल्म प्रवर्द्धनका लागि राज्यले बजेट छुट्याउने आश्वासन पनि दिएका छन्।
संस्कृति तथा पर्यटनमन्त्री पौडेलले पनि सिनेकर्मीहरूलाई 'अवैतनिक दूत' को संज्ञा दिए।
विमानस्थलमा मन्त्रीहरू स्वयं उपस्थित भएर स्वागत गरेको यो घटनालाई सिनेमाकर्मीहरूले प्रशंसा गरेका छन्। निर्देशक दीपक रौनियारले भविष्यप्रति सकारात्मक अपेक्षा व्यक्त गरेका छन्।
उनले आफ्नो फेसबुकमा दुई जना मन्त्रीले फिल्मको टिमलाई स्वागत गर्दाको तस्बिर साझा गर्दै लेखेका छन्, 'माननीय मन्त्री विक्रम तिमिल्सिनाज्यू, 'एलिफेन्टस् इन द फग' टोलीले कान्स महोत्सवमा पाएको सफलताको अवसरमा विमानस्थलमै पुगेर बधाई दिनुभएकोमा तपाईंको प्रयासको कदर गर्छु। यो नेपाली सिनेमाका लागि गर्वको क्षण हो। हामी सबैले यसलाई सकारात्मक रूपमा लिएका छौं।
उनी अगाडि लेख्छन्, 'अन्तत: सरकारको ध्यान चलचित्र क्षेत्रमा पुगेको छ। आशा छ यो केवल प्रचारको क्षणमा सीमित रहने छैन। कृपया भविष्यलाई ध्यानमा राखेर नयाँ र दिगो चलचित्र कानुन ल्याउन सहयोग गर्नुहोस् र पञ्चायतकालीन पुराना नियम–कानुनबाट उद्योगलाई मुक्त गरिदिनुहोस्।'
अन्य मुलुकहरूसँगको सहकार्यमा फिल्म निर्माण गर्न सहयोग पुग्ने गरी कानुनी ढाँचा र सम्झौताहरू अत्यन्तै आवश्यक रहेको पनि उनले बताएका छन्।
रौनियारको यो स्ट्याटसमा सञ्चारमन्त्री तिमिल्सिनाले जबाफ दिएका छन्।
उनी लेख्छन्, 'तपाईंका आत्मीय शब्दहरू र सोचपूर्ण सन्देशका लागि धन्यवाद। कान्समा प्राप्त यो उपलब्धि केवल उत्सवको क्षणमा सीमित रहनु हुँदैन भन्नेमा म सहमत छु। नेपाली सिनेमाले आधुनिक कानुन, सुदृढ संरचना र परिवर्तनशील विश्व चलचित्र उद्योगसँग मेल खाने नीति पाउनुपर्छ।'
सरकार नेपाली चलचित्र क्षेत्रसँग मिलेर भविष्यका लागि सार्थक सुधारहरू अघि बढाउनका लागि सहकार्य गर्न तत्पर रहेको उनले बताएका छन्।
यसबीच चलचित्र विकास बोर्डले पनि यसै साता 'एलिफेन्ट्स इन द फग' का निर्माता, निर्देशक र कलाकारहरूलाई सम्मान गर्ने भएको छ। फिल्म टोलीलाई राज्यका तर्फबाट साढे दुई लाख रूपैयाँ दिने घोषणा पनि गरेको छ।
सोमबार विमानस्थलमा आयोजित स्वागत कार्यक्रममा मन्त्रीहरू सँगसँगै बोर्डका अध्यक्ष दिनेश डिसी, सिनेमासँग सम्बन्धित विभिन्न संघ-संस्थाका प्रतिनिधि तथा अन्य सिनेमाकर्मीहरूको बाक्लो उपस्थिति थियो। यसले 'एलिफेन्ट्स इन द फग' ले कान्समा पाएको उपलब्धिलाई समग्र नेपाली सिनेमा क्षेत्रको साझा उपलब्धिका रूपमा लिइएको देखिन्थ्यो।
यो अविनाशविक्रम शाहको डेब्यू फिचर फिल्म हो। यसले नेपालको तराई क्षेत्रको परिवेशमा आधारित कथा भन्छ।
समाजको सीमान्तमा रहेका ट्रान्सजेन्डर महिलाहरूको जीवनलाई फिल्मले केन्द्रमा राखेको छ। कथाको मुख्य पात्र 'पिरती' किन्नर समुदायकी अगुवा हुन्, जसले आफूले प्रेम गर्ने व्यक्तिसँग नयाँ जीवन सुरू गर्ने चाहना राखेकी हुन्छिन्। तर समुदायकी एक छोरी हराएपछि उनी व्यक्तिगत चाहना र समुदायप्रतिको जिम्मेवारीबीच संघर्ष गर्न बाध्य हुन्छिन्।
फिल्ममा पुष्पा थिङ, दीपिका यादव, जस्मिन विश्वकर्मा, शान्ति गिरी, गौरी मल्ल, माओत्से गुरूङ, सञ्जय गुप्ता दुरा, महिमा नवबाग र आकांक्षा कार्कीको अभिनय छ।
निर्देशक अविनाशविक्रम शाह यसअघि पनि कान्स पुगेका थिए। उनको सर्ट फिल्म 'लोरी' ले कान्समा विशेष सम्मान प्राप्त गरेको थियो।
