बलिउड सुपरस्टार सलमान खानको होम प्रोडक्सनमा बनेको फिल्म 'मातृभूमि' को ट्रेलर सार्वजनिक भएपछि एक जना कलाकारको चर्चा चुलिएको छ।
उनी हुन्, नेपाली अभिनेता अनुपविक्रम शाही।
केही दिनअघि सार्वजनिक साढे चार मिनेट लामो ट्रेलरमा अनुप पटक पटक सलमान खानसँग आमनेसामने देखिन्छन्। चिनियाँ सेनाका मेजरको भूमिकामा रहेका उनी सलमानसँग भिडिरहेका छन्। एक्सन दृश्यहरूमा उनको उपस्थिति दमदार देखिन्छ।
बलिउडमा नेपाली कलाकारको उपस्थिति नौलो होइन। मनीषा कोइरालाले त्यहाँ स्थापित अभिनेत्रीका रूपमा लामो यात्रा तय गरेकी छन्। तर मनीषापछि बलिउडको यति ठूलो ब्यानरमा, त्यो पनि सलमानको 'अपोजिट' भूमिकासहित प्रवेश गर्ने अवसर नेपाली कलाकारले विरलै पाएका छन्।
यसअघि यो फिल्ममा अनुपको भूमिका छोटो होला भन्ने अनुमान थियो। ट्रेलरले भने उनी सामान्य अतिथि कलाकारका रूपमा नभई कथाको महत्त्वपूर्ण पात्रका रूपमा देखिने संकेत गरेको छ। सलमान र अनुपबीच करिब १३ मिनेट लामो एक्सन दृश्य रहेको दाबीसहित भारतीय सञ्चारमाध्यममा समाचार समेत आएका छन्।
अनुप आफै भने आफ्नो भूमिका कति लामो छ भन्ने खुलाउन चाहँदैनन्।
'यति मिनेट, उति मिनेट भन्दिनँ। सलमान सर र मेरो एउटा मात्रै होइन, धेरै फाइट सिन छन्,' अनुपले सेतोपाटीसँगको कुराकानीमा भने, 'मेरो जति पनि सिन छ, त्यसमा ८० प्रतिशत सिन सलमान सरसँगै छ।'
नेपाली फिल्ममा 'ह्यान्डसम भिलेन' को परिचय बनाएका अनुप यो अवसरले आफ्नो 'ठूलो सपना पूरा भएको' बताउँछन्।
यो अवसर कसरी आयो? सलमानसँग उनको पहिलो भेट कस्तो रह्यो? वर्षौंदेखि पर्दामा हेर्दै आएका सुपरस्टारसँग एक्सन दृश्य खिच्दा कस्तो अनुभव भयो?
सेतोपाटीसँगको कुराकानीमा अनुपले बलिउडसम्म पुग्न गरेको संघर्षदेखि 'मातृभूमि' को छायांकनका रोचक अनुभव सुनाएका छन्।
कुराकानी क्रममा उनी सबभन्दा पहिले लद्दाखको चिसो मौसममा भएको एउटा छायांकन सम्झन्छन्।
त्यहाँ सलमान खानसँग उनको एक्सन दृश्य खिच्ने तयारी भइरहेको थियो।
एकातिर बलिउडका 'सुल्तान' सलमान खान थिए। अर्कातिर उनीसँग भिड्न तयार थिए, नेपाली फिल्मका 'ह्यान्डसम भिलेन' अनुपविक्रम शाही।
अनुपका लागि त्यो एउटा फिल्मको एक्सन दृश्य मात्र थिएन। वर्षौंदेखि देखेको सपना साकार भइरहेको क्षण थियो।
त्यसअघि त्यही छायांकन सेटमा सलमानसँग उनको पहिलो भेट भएको थियो। सानैदेखि पर्दामा हेर्दै आएका सुपरस्टारसँग पहिलो पटक आमनेसामने हुँदा उनी निकै नर्भस थिए।
तर सलमानको व्यवहारले उनलाई धेरै बेर असहज हुन दिएन।
सलमानले पहिलेदेखि चिनेजस्तै आत्मीयताका साथ कुरा गरे। लन्चका लागि निम्तो दिए। सुटिङ सुरू हुनुअघि नै उनलाई सहज महसुस गराए।
'म उहाँलाई भेट्दा निकै नर्भस थिएँ। अकमक्क नै परेको थिएँ। सानैदेखि उहाँका फिल्म हेरेर हुर्किएको मान्छे। उहाँलाई देखेरै ज्यान बनाएको हुँ भन्दा पनि हुन्छ,' अनुपले सलमानसँगको पहिलो भेट सम्झँदै भने, 'उहाँले मसँग पहिलेदेखि चिनेको मान्छेजस्तै व्यवहार गर्नुभयो। लन्चका लागि अफर गर्नुभयो। कम्फर्ट जोनमा ल्याउनुभयो।'
सलमानको त्यो आत्मीयता त्यसपछि पनि कायम रहेको उनी बताउँछन्।
खासगरी सलमानसँग एक्सन दृश्य गर्नुपर्ने भएपछि अनुपको मनमा केही संकोच थियो। आफूभन्दा सिनियर कलाकारलाई 'किक' र 'पन्च' हान्नुपर्ने दृश्यमा उनी नर्भस थिए।
सलमानले उनलाई यसमा पनि सहज बनाइदिए।
अनुप भन्छन्, 'उहाँले मलाई भन्नुभयो, आई एम योर फ्रेन्ड ब्रो, मलाई हान, केही फरक पर्दैन। म तिम्रो दुश्मन हुँ भन्ने सोच। त्यसपछि मात्रै राम्रो एक्सन आउँछ। उहाँको त्यो व्यवहारले मलाई निकै सहज बनायो।'
सलमानसँग काम गरिरहेको छु भन्नेमा सुरूमा आफूलाई विश्वास गर्नै गाह्रो भएको अनुप सम्झन्छन्।
'सुरूमा त बिलिभ नै भइरहेको थिएन। म साँच्चै सलमान सरसँग काम गरिरहेको छु भन्ने कुरा सपनाजस्तै लागिरहेको थियो,' उनले भने।
विश्वभरिका कलाकारको अडिसनबाट छानिए अनुप
सलमान खानसँग काम गर्ने अनुपको सपना पूरा हुनुमा एउटा रोचक संयोग छ।
'मातृभूमि' का लागि निर्माण टोलीले विश्वभरिबाट कलाकार खोजिरहेको थियो। फिल्मको एउटा विशेष चरित्रका लागि धेरै कलाकारले अडिसन दिएका थिए।
त्यही प्रतिस्पर्धाबाट अनुप छानिएका हुन्।
केही दिनअघि मुम्बईमा आयोजित फिल्मको ट्रेलर सार्वजनिक कार्यक्रममा निर्देशक अपूर्व लाखियाले यसको खुलासा गरेका थिए।
कार्यक्रममा अनुपलाई भारतीय सञ्चारमाध्यमसामु चिनाउँदै लाखियाले भनेका थिए, 'अनुप नेपालका हुन्। उनी नेपालका निकै चर्चित कलाकार हुन्। यो फिल्मका लागि हामीलाई एउटा खास पात्र चाहिएको थियो। त्यसका लागि विश्वभरिबाट कास्टिङ गरिएको थियो। धेरैले यसका लागि अडिसन दिए। त्यसमध्येबाट हामीले अनुपलाई छान्यौं।'
आफू छनोट भएको खबर अनुपका लागि अप्रत्यासित खुसी थियो।
सलमान खान फिल्म्स (एसकेएफ) को टिमबाट खबर पाएको दुई–तीन दिनमै उनी मुम्बई पुगे। त्यहाँ निर्देशक अपूर्व लाखियासँग भेट भयो। त्यसअघि नै लेखकले उनलाई चरित्रबारे सामान्य जानकारी गराइसकेका थिए।
'सलमान सरसँग काम गर्न पाउनु मात्रै पनि ठूलो भाग्यको कुरा हो। उहाँको अपोजिट एउटा महत्त्वपूर्ण चरित्र छ भन्ने सुन्दा म निकै खुसी भएको थिएँ,' अनुप भन्छन्।
तर यो खुसीसम्म आइपुग्नुअघि उनले थुप्रै असफलता भोगेका थिए।
'यसअघि पनि बलिउडका धेरै फिल्मका लागि अडिसन दिएको थिएँ। तर छनोट हुन सकेको थिइनँ। सायद आफ्नो भाग्यमा भएको कुरा समय आएपछि पाइँदो रहेछ,' उनले भने।
अनुप भाग्यमा विश्वास गर्छन्। मेहनतलाई पनि उत्तिकै महत्त्व दिन्छन्। त्यसैले 'मातृभूमि' मा पाएको अवसरलाई उनी भाग्यको उपलब्धि मात्र मान्दैनन्।
फिल्ममा उनको चरित्र चिनियाँ सेनाका मेजरको छ। यसअघि नेपाली फिल्ममा धेरै किसिमका भूमिका निर्वाह गरे पनि यो चरित्र उनका लागि नयाँ थियो। त्यसैले उनले विशेष तयारी गर्नुपर्यो।
सेनाको शारीरिक हाउभाउ कस्तो हुन्छ? उनीहरू कसरी हिँड्छन्, उठ्छन्, बस्छन् र बोल्छन्? उनीहरूको सोच्ने शैली कस्तो हुन्छ?
अनुपले यी सबै पक्ष बुझ्ने प्रयास गरे।
'आफू कुन चरित्र निर्वाह गर्दैछु भन्ने कुरा कलाकारलाई राम्रोसँग थाहा हुनुपर्छ। आर्मी कसरी उठ्छ, कसरी बस्छ, कसरी बोल्छ, उसको सोच कस्तो हुन्छ, बडी ल्याङ्वेज कस्तो हुन्छ भन्ने कुरा बुझ्नुपर्छ,' उनले भने, 'त्यसका लागि मैले होमवर्क गरेँ। नयाँ चरित्र थियो, चुनौती पनि थियो। तर असम्भव थिएन।'
अस्वीकृत हुँदा एक्लै बसेर रोएका दिन
आज सलमान खानसँग स्क्रिन सेयर गरिरहेका अनुपका लागि बलिउडको यात्रा सजिलो थिएन।
निरन्तर अडिसन दिएर बारम्बार अस्वीकृत हुँदा उनी कहिलेकाहीँ आफ्नै क्षमतामाथि प्रश्न गर्थे — मसँग के कमी छ? मैले किन अवसर पाइरहेको छैन?
यी प्रश्नले उनलाई निकै सताउँथे।
कतिपय असफलताले त एक्लै बसेर रूनुपर्ने अवस्थासम्म पुर्याएको उनी सुनाउँछन्।
'मलाई लाग्छ, धेरै रिजेक्सन भोग्ने कलाकारमध्ये म पनि पर्छु होला। कतिपय अवस्थामा एक्लै बसेर रोएको छु। आफूमै केही कमी छ कि भन्ने लाग्थ्यो,' अनुप सम्झन्छन्।
तर ती असफलताले उनलाई प्रयास गर्नबाट रोकेनन्।
'म सजिलै गिभअप गर्दिनँ। कुनै कुरा प्राप्त गर्छु भनेर लागेपछि त्यसका लागि प्रयास गरिरहन्छु,' उनी मुस्कुराउँदै भन्छन्।
त्यसबीच बलिउडबाट उनलाई प्रस्ताव नै नआएका होइनन्। पछिल्ला तीन–चार वर्षदेखि विभिन्न वेब सिरिजका प्रस्ताव आइरहेका थिए। केहीमा राम्रा चरित्र पनि थिए। तर अनुपको लक्ष्य अर्कै थियो।
उनी बलिउडमा फिल्मबाटै डेब्यू गर्न चाहन्थे। त्यसैले वेब सिरिजका प्रस्ताव स्वीकार गरेनन्।
'फिल्मबाट गएपछि सिरिजमा जान सकिन्छ, तर सिरिजबाट फिल्ममा आउन गाह्रो हुन सक्छ भन्ने लाग्थ्यो,' उनले भने, 'म आफ्नो लक्ष्यमा स्पष्ट थिएँ।'
अन्ततः उनको प्रतीक्षा सलमान खानको फिल्मबाट टुंगियो।
वर्षौंसम्म अडिसन दिँदा नपाएको अवसर उनले 'मातृभूमि' मा पाए।
सलमानबाट सिकेको सबभन्दा ठूलो कुरा
'मातृभूमि' मा काम गर्दा अनुपले सलमान खानको अभिनय र स्टारडम नजिकबाट देख्न पाए। उनलाई सबभन्दा बढी प्रभावित पारेको कुरा सलमानको अभिनयभन्दा उनको व्यवहार हो।
सलमानको स्टारडम जति ठूलो छ, व्यवहार त्यति नै सरल रहेको अनुपको अनुभव छ।
उनीहरूबीच पहिलो भेटमै बनेको आत्मीयता छायांकन अवधिभर कायम रह्यो।
सलमानले आफूभन्दा सिनियर कलाकारलाई सम्मान गर्ने, साथीहरूसँग आत्मीय व्यवहार गर्ने र जुनियर कलाकारलाई सहयोग गर्ने शैलीबाट आफू प्रभावित भएको उनी बताउँछन्।
'उहाँबाट मैले सिकेको सबभन्दा ठूलो कुरा संस्कार हो। आफूभन्दा सिनियरलाई सम्मान गर्ने, आफ्ना साथीलाई अंगालो मारेर हिँड्ने र आफूभन्दा जुनियरलाई हात समातेर अगाडि बढाउने,' अनुप भन्छन्, 'यति ठूलो ग्लोबल स्टार भएर पनि उहाँमा घमण्ड छैन।'
सलमानको निर्माण टोलीले गरेको व्यवहार पनि उनी विशेष रूपमा सम्झन्छन्।
एउटा नेपाली कलाकारका रूपमा बलिउडको ठूलो ब्यानरमा काम गर्न जाँदा आफूले कुनै अप्ठ्यारो महसुस गर्नुनपरेको उनको भनाइ छ।
बस्ने ठाउँदेखि यातायात र छायांकनका अन्य व्यवस्थासम्म निर्माण टोलीले राम्रो ध्यान दिएको उनी बताउँछन्।
'मलाई कुनै कुराको कमी हुन दिनुभएन। बस्ने ठाउँ, ट्रान्सपोर्टेसनदेखि हरेक कुरामा ध्यान दिनुभयो,' उनले भने, 'बलिउडका अरू कलाकारलाई भन्दा पनि बढी सम्मान दिएर राख्नुभएको महसुस भयो। मलाई कहिल्यै बाहिर गएको जस्तो लागेन।'
निर्देशक अपूर्व लाखियाको व्यवहारबाट पनि उनी उत्तिकै प्रभावित छन्।
हलिउड र बलिउडमा काम गरिसकेका अनुभवी निर्देशकले हरेक दृश्यमा आफूलाई राम्रो गर्न प्रोत्साहित गरेको अनुप सुनाउँछन्।
छायांकन क्रममा लाखियाले उनलाई निरन्तर सुझाव दिन्थे। हरेक दृश्यलाई अझ राम्रो बनाउन प्रेरित गर्थे।
'अपूर्व सरले मलाई जहिले पनि यस्तो गर, उस्तो गर भनेर सिकाउनुहुन्थ्यो,' अनुप भन्छन्, 'उहाँले मलाई कहिल्यै एक्लो महसुस हुन दिनुभएन। त्यति अनुभवी निर्देशकसँग काम गर्न पाउनु पनि मेरो लागि ठूलो भाग्य हो।'
नेपाली फिल्मका 'ह्यान्डसम भिलेन' को यात्रा
काठमाडौंमै जन्मे–हुर्केका अनुपको कलाकारिता यात्रा फिल्मबाट सुरू भएको होइन। उनले सुरूमा मोडलिङ रोजेका थिए।
सन् २०१३ मा 'म्यानहन्ट इन्टरनेसनल नेपाल' को उपाधि जितेपछि उनी मोडलिङ क्षेत्रमा चर्चामा आए।
सन् २०१६ मा चीनको सेन्जेनमा आयोजित अन्तर्राष्ट्रिय प्रतियोगितामा नेपालको प्रतिनिधित्व गरे। त्यहाँ 'बेस्ट टिभी मोडल' को अवार्ड समेत जिते।
यसबीच उनी फिल्म क्षेत्रमा प्रवेश गरिसकेका थिए।
सन् २०१३ मा प्रदर्शन भएको 'सौर्य' उनको पहिलो फिल्म थियो। तर त्यसको अर्को वर्ष आएको 'हँसिया' ले उनलाई विशेष चर्चा दिलायो।
त्यसपछि 'वीरविक्रम', 'किङ', 'कृ', 'लिलीबिली', 'जय शम्भु', 'पुरानो बुलेट', 'पासवर्ड', 'लप्पन छप्पन २', 'जार' लगायत दुई दर्जनभन्दा बढी फिल्ममा काम गरे।
टेलिभिजन कार्यक्रम 'हिमालयन रोडिज' मा ग्याङ लिडरका रूपमा देखिएपछि उनको परिचय फिल्मका दर्शकमाझ मात्र सीमित रहेन।
विशेषगरी खलनायकको भूमिकामा अनुपको व्यक्तित्व र पर्दामा देखिने प्रभावशाली उपस्थितिले दर्शकको ध्यान तान्यो।
उनलाई 'ह्यान्डसम भिलेन' र 'मोस्ट स्टाइलिस स्टार' जस्ता उपनाम दिइयो।
अनुप आफै भने कलाकारलाई हिरो र भिलेन भनेर विभाजन गर्ने पक्षमा छैनन्।
उनका लागि कलाकारको काम चरित्रलाई जीवन्त बनाउनु हो। त्यो चरित्र नायकको होस् वा खलनायकको, त्यसले कलाकारको पहिचान सीमित गर्नु हुँदैन भन्ने उनको बुझाइ छ।
भारतीय फिल्ममा स्थापित नायकहरूले समेत खलपात्रको भूमिका निर्वाह गरिरहेको उदाहरण दिँदै उनी नेपाली फिल्म क्षेत्रमा पनि यस्तो सोच परिवर्तन हुनुपर्ने बताउँछन्।
'हामी कलाकार हौं। यहाँ कोही हिरो छैन, कोही भिलेन छैन। हामीले आफ्नो चरित्रलाई जीवन्त बनाउने हो,' अनुप भन्छन्, 'भारतमा यो सोच धेरै हदसम्म हटिसकेको छ। नेपालमा पनि कलाकारलाई हिरो र भिलेन भनेर छुट्याउने सोचबाट बाहिर आउनुपर्छ।'
उनलाई प्रेमकथाभन्दा डार्क, ग्याङस्टर र सस्पेन्स थ्रिलर फिल्म बढी मन पर्छन्।
पछिल्ला वर्ष आफूले छानेका फिल्म र चरित्रमा पनि यही रूचि झल्किने उनी बताउँछन्।
नेपाली र बलिउड फिल्ममा कति फरक?
अनुपले नेपाली फिल्ममा एक दशकभन्दा बढी समय बिताइसकेका छन्। अब बलिउडको ठूलो निर्माण टोलीसँग काम गर्ने अनुभव पनि बटुलेका छन्।
दुई फिल्म उद्योगबीच उनले के फरक पाए?
अनुपका अनुसार कलाकारले गर्ने काम र फिल्म निर्माणको आधारभूत प्रक्रियामा धेरै भिन्नता छैन।
फरक मुख्यतः बजेट, निर्माणको स्केल र व्यवस्थापनमा छ।
बलिउडमा ठूलो बजेट हुने भएकाले फिल्मको निर्माण दायरा फराकिलो हुन्छ। तर कलाकारका रूपमा आफ्नो चरित्रलाई न्याय गर्न गर्नुपर्ने मेहनत दुवैतिर उस्तै हुने उनको बुझाइ छ।
यसअघि एउटा विज्ञापनमा भारतीय टोलीसँग काम गरिसकेकाले पनि उनलाई 'मातृभूमि' को टोलीसँग घुलमिल हुन सहज भयो।
त्यसमाथि सलमान खान फिल्म्सले गरेको व्यवस्थापन र दिएको सम्मानले नयाँ वातावरणमा काम गरिरहेको अनुभूति हुन दिएन।
'सबैको आ–आफ्नो अनुभव हुन्छ। कसैलाई गाह्रो हुन सक्छ, कसैलाई सहज। तर मलाई चाहिँ मातृभूमिमा काम गर्दा कहिल्यै गाह्रो भएन,' उनी भन्छन्, 'सलमान सरको ब्यानरबाट काम गरेकाले पनि होला, कुनै कुराको कमी महसुस गर्नुपरेन। एकदम सम्मान दिनुभयो।'
अनुपका लागि भने नेपाली र बलिउड फिल्मको अन्तर केवल निर्माणको आकारमा सीमित छैन। उनले यसलाई नेपाली कलाकारको सम्भावनासँग पनि जोडेर हेरेका छन्।
उनको बुझाइमा राम्रो तयारी र अवसर पाए नेपाली कलाकारले पनि अन्तर्राष्ट्रिय स्तरका ठूला फिल्ममा आफ्नो क्षमता देखाउन सक्छन्।
'मातृभूमि' को ट्रेलर सार्वजनिक भएपछि आफूले पाएको प्रतिक्रियालाई उनी त्यसैको एउटा संकेत मान्छन्।
भारतीय सञ्चारमाध्यममा आफ्नो चर्चा हुँदा उनी व्यक्तिगत रूपमा खुसी छन्। सँगसँगै देशको प्रतिनिधित्व गरिरहेको अनुभूति पनि गर्छन्।
'म अन्तर्राष्ट्रिय प्लेटफर्ममा जाँदा मेरो छातीमा एउटा ट्याग हुन्छ— नेपाली कलाकार,' अनुप भन्छन्, 'मलाई अनुपविक्रम शाही भनेर मात्र होइन, नेपाली एक्टर फ्रम नेपाल भनेर चिनिन्छ। त्यो कुराले मलाई गर्व महसुस हुन्छ।'
यही परिचयले उनीमाथि जिम्मेवारी पनि थपेको छ।
'मैले नेपालको नाक राख्नुपर्छ, नेपालको इज्जत राख्नुपर्छ भन्ने सोचेर काम गर्छु,' उनी भन्छन्।
सलमान खान फिल्म्सले आफूलाई दिएको अवसरलाई उनी व्यक्तिगत सफलतामा मात्र सीमित राख्न चाहँदैनन्। उनका लागि यो नेपाली कलाकारप्रति गरिएको विश्वास पनि हो।
'नेपाली कलाकारले पनि यति ठूलो प्लेटफर्ममा काम गर्न सक्छन् भन्ने कुरा प्रमाणित भएको छ। एसकेएफ ब्यानरले मलाई जुन स्थान दिएको छ, त्यो एउटा विश्वास हो,' अनुप भन्छन्, 'मलाई सम्मान दिनु भनेको सिंगो नेपाललाई सम्मान दिनु हो भन्ने लाग्छ।'
निर्माण टोलीको त्यो विश्वास कम हुन नदिने गरी काम गरेको उनी बताउँछन्।
सलमान खान आफ्नो कामबाट खुसी रहेको उनको भनाइ छ। तर आफ्नो अभिनय कस्तो भयो भन्ने मूल्यांकन अहिले नै गर्न चाहँदैनन्।
'कामलाई लिएर सलमान सर खुसी हुनुहुन्छ। मैले धेरै बोल्नुभन्दा अब फिल्मले नै बोल्नेछ,' उनले भने।
'मातृभूमि' को कथा के हो?
'मातृभूमि' मा अनुप चिनियाँ सेनाका मेजरको भूमिकामा छन्। ट्रेलरमा भारतीय र चिनियाँ सेनाबीचको द्वन्द्व र एक्सन दृश्य देखिएका छन्।
तर अनुपका अनुसार यो कुनै देशविरूद्ध लक्षित फिल्म होइन।
फिल्मले युद्ध मात्र सबै समस्याको समाधान होइन भन्ने सन्देश दिन खोजेको उनी बताउँछन्।
उनका अनुसार कथाको मूल भावना भ्रातृत्व अर्थात् 'ब्रदरहुड' सँग जोडिएको छ।
'यो कुनै पनि देशलाई हानि नपुग्ने गरी बनाइएको ब्रदरहुडको फिल्म हो। युद्ध मात्रै सबै कुराको समाधान होइन भन्ने कुरा यसले देखाउन खोजेको छ,' अनुप भन्छन्, 'तर हरेक देशका लागि आफ्नो राष्ट्र पहिलो प्राथमिकतामा हुन्छ भन्ने विषय पनि फिल्ममा प्रस्तुत गरिएको छ।'
फिल्मको 'मे वार रेस्ट इन पिस' भन्ने स्लोगनले पनि युद्ध नै समस्याको अन्तिम समाधान होइन भन्ने सन्देश दिने उनको बुझाइ छ।
फिल्ममा कुनै देशलाई नराम्रो देखाउने वा कुनै देशका व्यक्तिलाई व्यक्तिगत रूपमा आक्षेप लगाउने काम नगरिएको उनको दाबी छ।
उनका अनुसार फिल्मले चीन र भारत दुवै देशबाट सेन्सरका क्रममा सकारात्मक संकेत पाएको छ।
आगामी डिसेम्बर ४ (मंसिर १८) देखि प्रदर्शन हुने तय भएको यो फिल्मप्रति अनुप निकै उत्साहित छन्।
आफूले वर्षौंदेखि देखेको सपना पर्दामा कस्तो देखिन्छ भन्ने हेर्न उनी पनि दर्शकजत्तिकै उत्सुक छन्।
बलिउडबाट नयाँ प्रस्ताव, तर नेपाली फिल्म नछाड्ने
'मातृभूमि' को ट्रेलर सार्वजनिक भएपछि अनुपका लागि बलिउडमा थप अवसरका ढोका खुल्न थालेका छन्। उनका अनुसार अहिले नयाँ फिल्म, वेब सिरिज र विभिन्न ब्रान्डका प्रस्ताव आइरहेका छन्। केही फिल्मबारे कुराकानी समेत भएको छ।
उनी भने तत्काल अर्को फिल्ममा काम गर्ने निर्णय गर्न हतारिएका छैनन्। अहिले उनको ध्यान 'मातृभूमि' कै प्रदर्शनमा छ।
'दुई–तीनवटा फिल्मको कुरा भएको छ। अफरहरू आइरहेका छन्। वेब सिरिज र ब्रान्डका प्रस्ताव पनि छन्,' अनुप भन्छन्, 'तर मेरो ध्यान 'मातृभूमि' रिलिज होस् भन्नेमा छ। पहिले यो फिल्म आउनुपर्छ भन्नेमा स्पष्ट छु।'
बलिउडमा अवसर बढ्दै गए पनि नेपाली फिल्मसँगको सम्बन्ध कहिल्यै नटुट्ने उनी बताउँछन्।
उनका लागि नेपाली फिल्म उद्योग केवल काम गर्ने ठाउँ होइन, आफूलाई कलाकारका रूपमा स्थापित गराउने आधार हो। त्यसैले बलिउड पुगेपछि नेपाली फिल्म छाड्ने सोच उनले बनाएका छैनन्।
'नेपाली फिल्म इन्डस्ट्री मेरो मन्दिर हो। यही उद्योगले मलाई पहिचान दिएको हो,' उनी भन्छन्, 'आज म बलिउडसम्म पुगेको छु भने त्यसमा नेपाली फिल्म उद्योगको ठूलो योगदान छ।'
आफू जहाँ पुगे पनि सुरूआती दिन बिर्सन नहुने उनको मान्यता छ।
'आफ्नो जरा कहिल्यै बिर्सनु हुँदैन। जति माथि पुगे पनि आफू कहाँबाट आएको हो भन्ने कुरा सम्झनुपर्छ,' उनी भन्छन्।
पछिल्लो समय उनी नेपाल, भारत र भुटानको सहकार्यमा निर्माण भएको फिल्म 'टनेल २६' मा पनि जोडिएका छन्। यसमा व्यवसायी निर्वाण चौधरी र भुटानका अभिनेता तथा निर्माता साङ्गे पनि संलग्न छन्।
विभिन्न देशका निर्माता र कलाकारबीच सहकार्य बढाउन सकिए नेपाली फिल्मको बजार विस्तार गर्न सहयोग पुग्ने उनको बुझाइ छ। यस्तो सहकार्यले ठूलो बजेटमा फिल्म बनाउन र दर्शकको दायरा फराकिलो पार्न सकिने उनी बताउँछन्।
वर्षौंसम्म अडिसन दिँदा अस्वीकृत भएका, कतिपय असफलतामा एक्लै बसेर रोएका अनुप आज बलिउडका ठूला स्टारसँग काम गरेको अनुभव सुनाइरहेका छन्। तर उनी यसलाई आफ्नो यात्राको अन्तिम उपलब्धि मान्दैनन्।
बरू सुरूआत ठान्छन्।
आफ्नो उपस्थितिले भोलि बलिउड पुग्न चाहने अरू नेपाली कलाकारका लागि पनि सम्भावनाको ढोका खोल्न सक्ने उनको विश्वास छ।
अनुपको चाहना पनि यही हो।
***
