कहिलेकाहीँ एउटा फिल्मले सफलताभन्दा ठूलो उपहार सिकाइ भइदिन्छ। निर्देशक कपिल रिजालका लागि 'ह्यारीकी प्यारी' सम्भवतः त्यस्तै फिल्म बन्यो।
२०७९ सालमा रिलिज यो फिल्मबाट कपिलले निर्देशकका रूपमा डेब्यू गरेका थिए। साम्राज्ञी राज्यलक्ष्मी शाह र जितु नेपाल अभिनीत यो फिल्म बक्स अफिसमा अपेक्षित चलेन।
त्यसको झन्डै साढे तीन वर्षपछि कपिल दोस्रो फिल्म 'गौंथली' लिएर दर्शकमाझ आउँदैछन्। साउन १ गतेदेखि प्रदर्शनमा आउने यो फिल्मप्रति उनी आत्मविश्वासी देखिन्छन्।
पहिलो फिल्ममा उनले दर्शक र समीक्षकबाट धेरै प्रतिक्रिया पाए। ती प्रतिक्रियाले आफूलाई कहाँ सुधार गर्नुपर्ने रहेछ भन्ने सिकाएको र 'गौंथली' मा कमजोरी सुधार गरेको उनी बताउँछन्।
'कहिलेकाहीँ ज्ञान कम हुँदा डर पनि कम हुन्छ। ह्यारीकी प्यारी बनाउँदा मेरो अवस्था त्यस्तै थियो। त्यसैले बनाउने क्रममा सजिलो भयो,' सेतोपाटीसँगको कुराकानीमा उनले भने, 'यद्यपि कतिपय कुरा त्यस बेला मैले बुझ्न सकिनँ। त्यसबाट धेरै कुरा सिकेँ। पहिले भएका कमजोरी गौंथलीमा आउँदा सुधारेँ।'
कपिल 'ह्यारीकी प्यारी' फिल्म प्राविधिक रूपमा कमजोर नभएको दाबी गर्छन्। नेपाली दर्शकको भावनात्मक संवेदनालाई पर्याप्त रूपमा समात्न नसक्नु कमजोरी रहेको समीक्षा गर्छन्।
उनी स्वीकार गर्छन्, 'त्यस बेला मैले जुन विषयमा फिल्म बनाएँ। नेपाली परिवेशमा त्यो खालको कथामा फिल्म बन्दैनथ्यो। टेक्निकल्ली फिल्म राम्रो थियो। तर नेपाली दर्शकले खोज्ने इमोसन कसरी र कहाँ पुर्याउने भन्ने कुरा मैले बुझ्न सकिनँ।'
त्यसपछि निर्माता सुमन गिरीसँगको निकटताले आफ्नो दृष्टिकोण परिवर्तन गरेको बताउँछन्।
उनले सफल नेपाली फिल्महरू हेर्ने, हलभित्र दर्शकको प्रतिक्रिया नियाल्ने, कुन दृश्यमा ताली बज्छ। कुन दृश्यमा दर्शक भावुक हुन्छन् भन्ने बुझ्न थाले। त्यो अभ्यासले उनलाई नयाँ पाठ सिकायो। अनि सुमन गिरीसँगै मिलेर उनले 'गौंथली' बनाए।
'सकेसम्म एउटै बोक्रामा फेरि चिप्लिनु हुँदैन भन्ने सोचेरै गौंथली बनाएको छु। आशा छ दर्शकलाई मनपर्छ,' उनले भने।
कपिल पेसाले भने दन्त चिकित्सक हुन्।
२८ वर्षदेखि बेलायतमा रहेर दन्त चिकित्सामा आबद्ध उनी पछिल्लो समय चिकित्सा र फिल्मलाई एकसाथ अगाडि बढाउन खोजिरहेका छन्।
उनी आफ्नो फिल्मी यात्राको आधार भने बाल्यकालदेखि घरमा पाएको कलात्मक वातावरणलाई मान्छन्। कपिल वरिष्ठ चिकित्सक डा. भोला रिजालका छोरा हुन्।
'प्रतिभा मात्रै भएर हुँदैन, त्यसलाई हुर्काउने वातावरण पनि चाहिन्छ। त्यो अवसर हामीले घरबाट पायौं।'
कपिलका अनुसार सानैदेखि उनको परिवारमा साहित्य, संगीत र नाटकको माहोल थियो। हजुरबुबा कविता लेख्थे। बुबा भोला गीतकार, कथाकार र फिल्म निर्माता समेत हुन्।
बाल्यकालमा आफन्तहरू मिलेर घरमै पर्दा टाँसेर नाटक मञ्चन गर्ने चलनले कपिलको मनमा सिर्जनाप्रतिको मोह जन्माएको थियो। मेडिकल कलेज पढ्दापढ्दै उनले साइलेन्ट सर्ट फिल्म 'द लास्ट नाइट' बनाए। त्यसपछि सर्ट फिल्म, म्युजिक भिडिओ हुँदै उनी फिचर फिल्मसम्म आइपुगेका हुन्।
'ह्यारीकी प्यारी' उनको रोमान्टिक ड्रामा जनराको फिल्म थियो। यसमा उनले 'स्पर्म डोनेसन' (वीर्य दान) को विषयवस्तुलाई प्रस्तुत गरेका थिए।
गौंथली भने एक किशोरीको कथा हो, जसले पढेर आफ्नो भविष्य बनाउन चाहन्छे। तर परिस्थितिले उसको विवाह फरक क्षमता भएका युवकसँग हुन्छ। त्यसपछि सुरू हुन्छ, उसको संघर्ष, आत्मविश्वास र जीवनलाई आफ्नै बलमा अगाडि बढाउने यात्रा।
उसो त गौंथलीको कथा नयाँ होइन। यो डा. भोला रिजालले लगभग २५ वर्षअघि लेखेको कथा हो, जसमा त्यस बेला गीति फिल्म बनेको थियो। र, फिल्म सुपरहिट समेत बनेको थियो। नेपालको पहिलो गीति फिल्मका रूपमा चिनिने गौंथलीको नाममा अहिले पुनः फिल्म बनेको हो।
निर्देशक कपिल रिजाल कथाको समय पुरानो भए पनि त्यसले उठाएका प्रश्न अहिले पनि समाजमा जीवित रहेकाले अहिले पनि उत्तिकै सान्दर्भिक रहेको बताउँछन्।
'महिलाको शिक्षा, बालविवाह, सामाजिक विभेद र फरक क्षमता भएका मानिसप्रतिको हाम्रो दृष्टिकोणका विषय आज पनि उत्तिकै सान्दर्भिक छन्,' कपिलले भने।
उनका अनुसार फिल्मले गौंथलीको संघर्ष मात्र होइन, फरक क्षमता भएका व्यक्तिको दृष्टिबाट संसारलाई हेर्ने प्रयास पनि गरेको छ। यो फिल्मको पटकथामै झन्डै दुई वर्ष मेहनत गरिएको थियो।
'सबभन्दा ठूलो दबाब नै बुबाको कथालाई न्याय गर्ने थियो। त्यसैले फिल्मका लागि दुई वर्ष कागजमै मेहनत गर्यौं,' उनी भन्छन्।
रोचक कुरा, पटकथा लगभग तयार नभएसम्म उनले बुबासँग विस्तृतमा छलफल गरेनन्। अन्तिम स्क्रिप्ट पढेपछि बुबाले सन्तुष्टि व्यक्त गरेका थिए।
कपिललाई कलाकार छनोटमा स्टारडमभन्दा पात्र बढी प्राथमिकतामा पर्छ। 'ह्यारीकी प्यारी' मा जितु नेपाललाई मुख्य अभिनेताका रूपमा प्रस्तुत गरेका उनले गौंथलीमा अरूण क्षेत्री र सिम्रन खड्कालाई शीर्ष कलाकार बनाएका छन्।
'मैले धेरै नाम चलेका कलाकार लिएको भए दर्शकहरूले फलानो भनेर चिन्थे। आज त्यो पात्रलाई गौंथली भनेर चिनेका छन्। म चाहन्छु, दर्शकले सिम्रनलाई उनको पात्र गौंथली र अरूणलाई ठूल' भनेर सम्झिऊन्। त्यो नै मेरो सबभन्दा ठूलो पुरस्कार हुनेछ,' उनले भने।
फिल्मको सफलता व्यापारले मात्रै मापन नहुने धारणा कपिलको छ। दर्शकहरूले हलबाट बाहिरिँदा मनभित्र केही लिएर फर्किए भने त्यो नै ठूलो उपलब्धि हुने उनी बताउँछन्।
यति बेला फिल्मको टिजर, ट्रेलर, गीतसंगीतले दर्शकबाट राम्रो प्रतिक्रिया पाइरहेको छ।
गौंथली रिलिज भएपछि दर्शकहरूबाट कस्तो प्रतिक्रियाको अपेक्षा गरेका होलान् कपिलले?
उनको जबाफ छ, 'फिल्म सकिएपछि दर्शकको मनमा एउटा शुकून रहोस्। केही सोच्न बाध्य बनाओस्। त्यही मेरो चाहना हो।'
रिलिजको दिन नजिकिँदै जाँदा उत्साहसँगै स्वभाविक बेचैनी पनि बढेको छ। काम सबै सकिएको पनि अझै केही छुट्यो कि भन्ने लागिरहन्छ।
'अन्तिम फैसला त दर्शकले नै गर्ने हुन्,' उनी भन्छन्।
बेलायतमा दन्त चिकित्सकको रूपमा सक्रिय रहे पनि अब आफू नेपाली फिल्ममा अझ सक्रिय रहने उनको योजना छ। परिवारको साथले चिकित्सकीय जिम्मेवारी व्यवस्थापन गर्न सहज भएकाले फिल्ममा थप समय दिन सक्ने बताउँछन्।
'अब मेरो सपना राम्रो फिल्म बनाउने मात्र होइन, नेपाली फिल्म उद्योगलाई अझ बलियो बनाउन सकिने वातावरण निर्माणमा पनि योगदान गर्ने हो,' उनी भन्छन्।
आफूहरूसँग थुप्रै कथा रहेको बताउँदै आगामी दिनमा पनि निरन्तर फिल्म ल्याउने उनले बताए।
