गुड फ्राइडे सिनेमा
कलेज जीवन। साथीहरू। प्रेम। झगडा। रमाइलो। अनि बिछोड।
यी सबैको मिश्रणमा बनेको कन्नड फिल्म हो– किरिक पार्टी।
सन् २०१६ मा रिलिज भएको यो दक्षिण भारतीय सिनेमा ऋषभ शेट्टीले निर्देशन गरेका हुन्। ऋषभ तिनै निर्देशक हुन् जसले बनाएको 'कान्तारा' भारतभर र अन्य मुलुकमा समेत सुपरहिट भयो।
त्यसअघि पनि उनले सुपरहिट फिल्महरू बनाएका थिए। तर ती मूलतः दक्षिण भारतमा सीमित भए।
त्यस्तै फिल्म हो किरिक पार्टी।
यो फिल्ममा रक्षित शेट्टी, रश्मिका मन्दाना, संयुक्ता हेगडे, अच्युत कुमार लगायत कलाकारको अभिनय छ। रश्मिका मन्दाना र संयुक्ता हेगडेको यो डेब्यु फिल्म हो।
फिल्मको कथा कर्ण नामको युवकबाट सुरू हुन्छ।
कर्ण कलेजको पहिलो वर्षमा पढिरहेका हुन्छन्। त्यही कलेजमा उनको भेट अन्तिम वर्षकी विद्यार्थी सान्वीसँग हुन्छ। प्रहरी अधिकृतकी छोरी सान्वी कलेजमा लोकप्रिय हुन्छिन्।
तर कर्णसँग उनको सम्बन्ध अरूभन्दा अलि फरक हुन्छ। उनीहरूबीच बिस्तारै गहिरो मित्रता गाँसिन्छ।
सान्वी आफूले व्यक्तिगत रूपमा चिनेकी एक यौनकर्मीको जीवनबारे किताब लेखिरहेकी हुन्छिन्। त्यही क्रममा ती महिलाले बच्चा जन्माउँछिन्। बच्चा जन्माउने क्रममा सान्वी र कर्णले उनलाई सहयोग गर्छन्।
बच्चाको नाम पनि सान्वी राखिन्छ।
यो घटनाले कर्णलाई भित्रैदेखि छोएको हुन्छ। कर्ण र सान्वीको सम्बन्ध पनि बिस्तारै गहिरिँदै जान्छ। उनीहरू सँगै घुम्छन्, समय बिताउँछन्। कलेज जीवनका रमाइला दिन चलिरहेका हुन्छन्।
तर उनीहरूको यो खुसी धेरै लामो समय टिक्दैन।
एउटा पार्टीपछि भएको दुर्घटनाले कर्णलाई निकै ठूलो धक्का लाग्छ। त्यसपछि उनको व्यवहार बदलिन्छ। ऊ जिद्दी र रूखो बन्दै जान्छ। कलेजको अन्तिम वर्षमा पुग्दा साथीहरूसँगको उनको सम्बन्ध पनि पहिले जस्तो रहँदैन।
यहीबीच कलेजमा जुनियर विद्यार्थी आर्याको प्रवेश हुन्छ।
आर्यालाई कर्ण मन पर्न थाल्छ। कर्ण भने आफ्नो विगतबाट बाहिर निस्किन सकिरहेका हुँदैनन्। आर्याले उनलाई पुरानै अवस्थामा फर्काउन सकिन्छ कि भनेर प्रयास गरिरहन्छिन्।
आर्याका कुराले कर्णलाई बिस्तारै सोच्न बाध्य बनाउँछ।
कलेजको अन्तिम दिन साथीहरूसँग बिताएका वर्षहरू सम्झिँदै कर्ण केही पत्र लेख्छन्। ती पत्रमा उनले आफूले गरेका केही गल्तीबारे लेखेका हुन्छन्।
तर एउटा सानो गल्तीले घटनाक्रमलाई अर्कै दिशातर्फ लैजान्छ। कलेजमा यस्तो अवस्था सिर्जना हुन्छ, जसबारे कर्णले सोचेकै हुँदैनन्।
त्यसपछि के हुन्छ, यसका लागि किरिक पार्टी हेर्नुहोला।
रमाइलो कलेज जीवनसँगै प्रेम, बिछोड र आफूलाई बुझ्ने यात्रा प्रस्तुत गरेको किरिक पार्टी वर्षकै सबभन्दा धेरै कमाउने कन्नड फिल्म हो। समीक्षकहरूले पनि यसको धेरै प्रशंसा गरेका थिए। पछि यो फिल्म तमिल भाषामा पनि बन्यो।
यसले डेढ दर्जन हाराहारी अवार्डहरू जितेको छ भने यत्तिकै संख्यामा मनोनीत भएको थियो।
हेर्नुस् किरिक पार्टी हिन्दीमा।
