तामाङ रिक्रेयसन क्लबको आयोजनामा सञ्चालित एक दिने फुटबल प्रतियोगिताको उपाधि सगरमाथा फुटबल क्लबले जितेको छ।
प्रतिस्पर्धात्मक फाइनल खेलमा ग्रानभिल एफसीलाई सडेनडेथमा २-१ले हराउँदै सगरमाथाले उपाधि सहित चार हजार डलर तथा ट्रफी हात पारेको हो।
अस्ट्रेलियामा रहेका नेपाली मुलका २४ क्लबले सहभागिता जनाएको एक दिने प्रतियोगितामा दोस्रो स्थान हात पारेको स्थानीय ग्रानभिल क्लबले भने ट्रफीसहित एक हजार डलर प्राप्त गरेको छ।
प्रतियोगिताभरको उत्कृष्ट खेलाडीको उपाधि सगरमाथाकै बिमल बस्नेत भए। उनले तीन सय डलरसहित ट्रफी हात पारे।
खेल अवधिभर सर्वाधिक गोलकर्ताको उपाधि भने बेनी एफसीका सन्जिव कार्कीले प्राप्त गरे। उनले खेल अवधिभर चार गोल गरेका थिए।
यस्तै प्रतियोगिताको उत्कृष्ट गोलरक्षकको उपाधि ग्रानिभिलका गोलरक्षक जितेन श्रेष्ठले जिते।
गोलरक्षक र सर्वाीधक गोलकर्तालाई ब्यक्तिगत एक सय डलर र ट्रफी प्रदान गरिएको तामाङ रिक्रेएसन क्लबका सचिब बैकुण्ठ डंगोलले जानकारी दिए।
प्रतियोगिताका विजेता खेलाडीलाई प्रायोजक एक्सपर्ट एजुकेशनका प्रमुख कार्यकारी सन्जिव शर्मा, पूर्व राष्ट्रिय क्रिकेटर सुवास प्रधान, समाजिक अभियन्ता चित्र तुम्बाहम्फे, अस्ट्रेलियन नेप्लीज फुटबल संघका अध्यक्ष विजेन बटाजु लगायतले पदक तथा प्रमाणपत्र बितरण गरेका थिए।
कार्यक्रमका प्रमुख अतिथि आदिवासी जनजाति मञ्च, अस्ट्रेलियाका अध्यक्ष अरूण तामाङले फुटबलको माध्यमवाट युवा जमातलाई गोलबद्ध गर्न र अनुशासनको दायरामा अगाडि बढाउने काममा तामाङ रिक्रेयसन क्लब लागिरहेको बताए।
