ब्रिटेन नेपाल चेम्बर अफ कमर्सको सहकार्यमा लण्डनस्थित नेपाली दूतावासले आयोजना गरेको नेपाल डेभलपमन्ट कन्फरेन्सको चौंथो श्रृंखलामा मंगलबार नेपालको लगानी तथा व्यापारका अवसरहरुबारे छलफल गरिएको छ ।
बेलायत तथा नेपाल सरकारका अधिकारीहरुको साथै नेपालमा लगानी तथा व्यापारमा संलग्न लगानीकर्ता, व्यापारी तथा संघसंस्थाका प्रतिनिधि समेतको सहभागितामा उक्त कार्यक्रम गरिएको थियो ।
कार्यक्रममा नेपालमा विदेशी लगानी तथा व्यापारका लागि रहेका विभिन्न अवसरहरुबारे केहि प्रिजेन्टेसनहरु गर्नुका साथै नेपाल तथा बेलायतका सरकारी अधिकारीले आ आफ्ना धारणा राखेका थिए ।
कार्यक्रमका प्रमुख अतिथि नेपाल सरकारका परराष्ट्र सचिव शंकरदास वैरागीले नेपालमा विदेशी लगानीको लागि चुनौतिरहित उपयुक्त वातावरण रहेको बताए । स्थायी सरकार र राजनीतिक स्थिरताको साथै लगानीमैत्री वातावरण समेत सिर्जना गरिएको भन्दै सचिव वैरागीले विदेशी लगानी बढाउन सरकार प्रतिबद्ध रहेको जनाए ।
नेपालका लागि बेलायती राजदूत रिचर्ड मोरिसले बेलायतले नेपालमा लगानी तथा व्यापारका क्षेत्रमा भएका सकारात्मक परिवर्तनहरुलाई स्वागत गर्ने र सोहिअनुसार आवश्यक सहयोगको लागि तयार रहने बताए ।
बेलायतका लागि नेपाली राजदूत दुर्गाबहादुर सुवेदीले नेपालको वर्तमान सरकारले आर्थिक विकासलाई आफ्नो प्राथमिक लक्ष्य बनाएको तथा व्यापार र लगानीलाई उत्साहित गर्न उदार आर्थिक नीतिहरु ल्याएको जानकारी गराए ।
कार्यक्रममा नेपालको लागि बेलायतको सर्वदलीय संसदीय समितिका उपप्रमुख लर्ड शेख, लर्ड अर्ल अफ स्याण्डविच, बेलायती राजनीतिज्ञ किसन देवानी लगायतले पनि मन्तव्य दिएका थिए ।
कार्यक्रममा ब्रिटेन नेपाल चेम्बर अफ कमर्सका अध्यक्ष राजन कंडेलले नेपालमा व्यापार तथा लगानीका लागि रहेका अवसरहरुबारे प्रिजेन्टेसन गरेका थिए । बेलायती दातृ निकाय डिएफआईडिकी भेरिटी म्याकक्रम, ट्रान्ज रुरल ट्रस्टका ट्रेभर लुसी तथा ईञ्जिनियर रामहरि पौडेलले छुट्टाछुट्टै प्रिजेन्टेसन गरेका थिए
