दुई दिनदेखिको वर्षातका कारण डोटीमा फोन तथा विद्युत् सेवा अवरुद्ध भएको छ।
जिल्लामा वितरण गरिएको ३३ केभिए प्रसारण लाइनमा रूख परेका कारण यहाँको विद्युत् सेवा अवरुद्ध भएको डोटी साना जलविद्युत् कार्यालय दिपायलले जनाएको छ।
विद्युत् सेवा अवरुद्ध भएसँगै सञ्चारका साधन पनि अवरुद्ध भएका छन्। एनसेल सिमकार्ड भने सञ्चालनमा छ। विद्युत् नभएका कारण नेपाल टेलिकमका ल्यान्डलाइन तथा एफटिटिएच (नेट) सेवा पनि पूर्ण रुपमा अवरुद्ध भएको जिल्ला प्रहरी कार्यालयको सञ्चार शाखाले जनाएको छ।
विद्युत्सहित नेट सेवा दुई दिनदेखि पूर्ण रुपमा अवरुद्ध भएपछि यहाँका सञ्चारकर्मीले आफ्ना सञ्चार माध्यममा समाचार सम्प्रेषण गर्न पाएका छैनन् भने जिल्लामा रहेका चारवटा एफएम रेडियोहरु पनि बन्द भएका घण्टेश्वर एफएम बुडरका स्टेसन मेनेजर शिव ओलीले बताए।
फोन, नेट र विद्युत् सेवा नहुँदा कतिपय रेडियो बन्द भएका छन्, केहीले जेनेटर बालेर खाली बाढी पहिराबाट जोगिन सूचना प्रसारण गरिरहेका छन्।
जिल्ला नै सञ्चार सम्पर्कविहीन भएका कारण कुन ठाउँमा के कति क्षति भयो त्यसका बारेमा जानकारी लिन निकै समस्या भएको प्रमुख जिल्ला अधिकारी शङ्करबहादुर विष्टले बताए।
‘विद्युत्, टेलिफोन सेवा अवरुद्ध छ, धन्न एनसेलको सिमले काम गरेकाले सम्पर्क गर्न सकेका छौँ, क्षतिको विषयमा जानकारी लिनै पाइएको छैन,’ उनले भने।
भारी बर्सातका कारण यहाँका विभिन्न ठाउँमा पहिरो गएको जानकारी आएको जिल्ला प्रहरी कार्यालयका सहप्रवक्ता तथा प्रहरी निरीक्षक रवीन्द्र चन्दले बताए।
उनकाअनुसार वर्सात सँगैको पहिराले यहाँको गैरा, रातुली, पाकरी, जोरायल, बडिकेदार, केआईसिंह लगायतका क्षेत्रमा खेतबारी तथा घरमा सामान्य क्षति भएको छ।
जिल्लामा ठूलो बर्सात भएका कारण यहाँका नदीहरुमा पनि पानीको बहाव बढेकाले नदी तथा तटीय क्षेत्रमा बसोबास गर्ने नागरिकलाई सचेत राख्न तथा विपद् आइपरे उद्धारका लागि नेपाली सेना, नेपाल प्रहरी तथा सशस्त्र प्रहरीको टोलीलाई तयारी अवस्थामा राखिएको जिल्ला प्रशासन कार्यालयले जनाएको छ।
बर्सातका कारण यहाँका किसानले काटेका धान पनि बाढीले बगाएको छ भने केही क्षेत्रका खेतमा पानीले पूरै धान डुबाएको छ। हालसम्म बाढी तथा पहिराले मानवीय क्षति भने नगरेको जिल्ला विपद् व्यवस्थापन समितिले जनाएको छ।
