प्रमुख प्रतिपक्ष दल नेपाली कांग्रेसका नेता एवम् पूर्वमन्त्री मीनबहादुर विश्वकर्माले पुष्पकमल दाहाल नेतृत्वको सरकारलाई विश्वासको मत लिन नै कठिन हुने दाबी गरेका छन्।
कांग्रेसजस्तो लचिलो पार्टीलाई त मिलाएर जान नसक्ने प्रधानमन्त्री दाहालले ७ वटा राजनीतिक पार्टीहरूलाई मिलाएर विश्वासको मत लिन कठिन हुने उनको तर्क थियो।
मंगलबार काठमाडौंमा आयोजित साक्षात्कार कार्यक्रममा बोल्दै नेता विश्वकर्माले ३० दिनभित्र विश्वास मत लियो भने दाहाल नेतृत्वको सरकार २ वर्षसम्म चल्ने अनुमान समेत गरे।
संघीयता नै नचाहिने राष्ट्रिय स्वतन्त्र पार्टी, राजा आऊ भन्ने राप्रपा लगायतका राजनीतिक दलहरू रहेको वर्तमान गठबन्धन सरकार टिक्न गाह्रो हुने पनि उनले बताए।
नेता विश्वकर्माले भने, ‘अब उहाँसँगको सिट संख्याले अहिले त १६९ पुगेको छ। तर त्यो १६९ को आधार हेर्ने हो भने सात वटा दल छन्। ७ वटा दलको दाबी त बाहिर आएकै छैन। त्यो दाबी सुन्नै पाएका छैनौं। भर्खरै सुनें–राष्ट्रिय प्रजातन्त्र पार्टीले हाम्रा पनि केही सर्त छन्। ती सर्त पूरा हुने लक्षण देखिएमात्रै सरकारमा जान्छौं। उहाँहरूको राजा आऊ, देश बचाऊ होला। यसैगरी फेरि राष्ट्रिय स्वतन्त्र पार्टी त सरकारमा गइहाल्यो। अब उहाँहरूले प्रदेशमा उम्मेदवारी उठाउनु भएको छैन। किनभने उहाँहरूलाई प्रदेश सरकारप्रति विश्वास छैन। संघीयताप्रति भरोसा नै छैन। यत्रो ८/९ सय सांसद कहाँ पाल्न सकिन्छ? भन्ने चिन्ताले मैले त्यतातिर उम्मेदवारी नदिएको रवि लामिछानेले भन्नुभएको छ। यसको अर्थ उहाँलाई संघीयताप्रति विश्वास छैन।’
उनले अगाडि भने, ‘राप्रपालाई गणतन्त्रप्रति विश्वास छैन। अनि अरू दलहरू पनि त्यस्तै त्यस्तै क्षेत्रीय दलहरू छन्। अब ती सबै दलहरूलाई मिलाएर लिएर जानलाई यसको जिम्मेवारी त फेरि पनि प्रचण्डजीमै जान्छ। प्रचण्डजीले आफूलाई केन्द्रमा राखेर कांग्रेस जस्तो लचिलो पार्टी त मिलाउन सक्नु भएन भने यी सबै दलहरू कसरी मिल्लान् ? र, मिलेनन् भने हामीले चाहेको राजनीतिक स्थायित्व आउँछ कि आउँदैन? राजनीतिक स्थायित्व आउनलाई निकै कठिन छ। त्यसैले मलाई यो ३० दिनभित्र विश्वासको मत लिनुपर्ने परिस्थिति हाम्रो संविधानले सुनिश्चित गरेको छ। ३० दिनभित्रको विश्वासको मतसम्म यो सरकार कसरी पुग्छ ? त्यसैले ३० दिन कट्यो भने सरकार राम्ररी २ वर्ष जान्छ।’
नेता विश्वकर्माले प्रधानमन्त्री दाहाललाई गठबन्धन अड्याएर अघि बढ्न मुस्किल हुने पटक/पटक दोहोर्याए।
‘हिजो त आकस्मिक रूपले गठबन्धन तोड्नु थियो, तोडियो। त्यसमा प्रचण्डजीको महत्वकांक्षालाई सबैले साथ दिएकै हो। आइहाल्यो गरिदिऊँ भन्ने कुरा हो। ओलीजीलाई पनि गज्जब भो। जो मान्छे भाँडभैलो मच्चाएर बालकोटबाट निस्केको थियो। त्यो मान्छे खात्राकखुत्रुक परेर शरण परेपछि म भए पनि त्यही गर्थें। उहाँले त्यही गर्नु भयो। तर प्रचण्डजीको बारेमा भने समस्या हुन्छ।’
