भदौ २३ र २४ गतेको जेनजी आन्दोलनबाट प्रभावित बनेको मधेस प्रदेशको सरकारी कार्यालयको सेवा ३० भदौ आइतबारदेखि सुरू भएको छ। मधेस प्रदेशका ८ जिल्लामा रहेका दर्जनौं सरकारी कार्यालयमा तोडफोड र आगजनी भएका छन्।
संघीय, प्रादेशिक तथा स्थानीय सरकार मातहतका सरकारी कार्यालयसँगै मधेसमा अख्तियार दुरूपयोग अनुसन्धान आयोग तथा विभिन्न आयोजनाका कार्यालयहरू पनि छन्। १ सय ३६ वटा स्थानीय तह रहेको मधेसका कतिपय पालिकाका नयाँ बनेका तथा कतिपयको पुराना कार्यालय भवन र केही वडा कार्यालयमा समेत तोडफोड र आगजनी गरेका छन्। सबै जिल्लामा क्षतिको प्रारम्भिक विवरण संकलन भइरहेको छ। जिन्सी फाँटका कागजात समेत जलेका कार्यालयहरूको क्षति विवरण निकाल्न कठिनाइ भइरहेको छ।
पर्सा जिल्लामा वीरगञ्ज नर्सिङ क्याम्पससहित १०० वटा सरकारी कार्यालय छन्।
जिल्ला प्रशासन कार्यालय पर्साका अनुसार १४ वटा पालिकामध्ये वीरगञ्ज महानगरपालिका र पोखरिया नगरपालिकामा आगजनी र तोडफोड भएको छ। वीरगञ्ज महानगरपालिकाको कार्यालयमा लुटपाट समेत गरिएको छ। महानगरपालिकाको नगर प्रहरीले लुटपाट भएको सामग्री खोजेर फिर्ता ल्याइरहेको छ। आन्तरिक राजस्व कार्यालय, दूरसञ्चार प्राधिकरण नेपाल टेलिकमको घण्टाघरस्थित कार्यालय र पोखरिया नगरपालिकामा क्षति पुगेको छ।
वीरगञ्ज महानगरपालिकाको वडा नं १०, १४ र २७ को कार्यालयमा क्षति पुगेको छ। प्रशासनले दिएको जानकारी अनुसार पर्सामा २७ वटा कार्यालयमा आगजनी र तोडफोड भएको छ।
वीरगञ्ज कारागार, यातयात व्यवस्था कार्यालय, उच्च अदालतको कम्पाउण्डमा सामान्य क्षति पुगेको छ।
जिल्ला प्रहरी कार्यालय पर्साको प्रमुख प्रहरी उपरीक्षक गौतम मिश्रले वडा प्रहरी कार्यालय सुगौली विर्ता सहित ९ वटा प्रहरी कार्यालयमा क्षति भएको जानकारी दिए।
पर्सामा मुख्य सरकारी कार्यालय जोगाइएको उनको भनाइ छ।
‘१३ सयभन्दा बढी कैदीबन्दी भएको वीरगञ्ज कारागार तोड्ने कोसिस गरेका थिए, पर्खालमा प्वाल पारिसके पनि बल प्रयोग गरेर जोगायौं,’ उनले भने, ‘पर्सा जिल्ला अदालत, जिल्ला प्रशासन कार्यालय, जिल्ला प्रहरी कार्यालय, नापी, मालपोत लगायतका कार्यालय सुरक्षित छन्। सेवा दिन थालिसकेका छन्।
जिल्ला प्रहरी कार्यालय बारामा कार्यरत प्रशासकीय अधिकृत छविरमण भट्टराईका अनुसार बारामा ८६ वटा सरकारी कार्यालय छन्। ८ वटा सरकारी कार्यालयमा क्षति भएको छ। १६ वटा पालिकामध्ये जीतपुरसिमरा उपमहानगरपालिका, निजगढ नगरपालिका र विश्रामपुर गाउँपालिकामा बढी क्षति भएको छ। आन्तरिक राजस्व कार्यालय सिमरा र इलाका प्रशासन कार्यालयमा समेत आगजनी र तोडफोड भएको छ।
‘इलाका प्रशासन कार्यालयमा भवन बाहेक केही बचेको छैन, कागजात बाहिर निकालेर जलाइदिएका छन्,’ सहायक प्रमुख जिल्ला अधिकारी भट्टराईले भने, ‘कार्यालय सञ्चालन गर्न सकिएन।’
जिल्ला प्रशासन कार्यालय सर्लाहीको वेबसाइटमा राखिएको विवरण अनुसार २० वटा स्थानीय तह सहित सर्लाहीमा ७५ वटा सरकारी कार्यालय छन्।
आन्दोलनकारीले तोडफोड र आगजनीका कारण ५ वटा पालिकाका कार्यालय पूर्ण रूपमा क्षति पुगेको सहायक प्रमुख जिल्ला अधिकारी शिवहरि पोखरेलले जानकारी दिए।
सदरमुकाम मलंगवामा रहेका भन्दा उत्तरी क्षेत्रका सरकारी कार्यालयहरूमा बढी क्षति पुगेको उनको भनाइ छ। बागमती, लालबन्दी, इश्वरपुर र बरहथवा नगरपालिका तथा चन्द्रपुर गाउँपालिकाको कार्यालयमा पूर्ण क्षति भएको हो।
त्यसैगरी, प्रधानमन्त्री कृषि आधुनिकीकरण आयोजनाको कार्यालयमा पनि क्षति पुगेको छ। हरिवन, हरिपुर र हरपुर्वा नगरपालिकामा आंशिक क्षति पुगेको जिल्ला प्रशासन कार्यालय सर्लाहीले जनाएको छ। क्षतिको पूर्ण विवरण आइसकेको छैन।
१८ वटा पालिका सहित रौतहटमा ८७ वटा सरकारी कार्यालय छन्। जिल्ला प्रशासन कार्यालय रौतहटका प्रशासकीय अधिकृत मनिष झाले कार्यालय प्रमुखहरूसँगको बैठकमा क्षतिको विवरण संकलनका लागि आग्रह गरिसकिएको जानकारी दिए।
उनका अनुसार जेनजीको प्रदर्शनका क्रममा सदरमुकाम गौरमा भन्दा बढी क्षति चन्द्रपुर नगरपालिका क्षेत्रका सरकारी कार्यालयहरू निशानामा परेका छन्।
डिभिजन वन कार्यालय, इलाका प्रहरी कार्यालय चन्द्र निगाहपुर, चन्द्रपुर नगरपालिका, सडक डिभिजन कार्यालय, जिल्ला टाफिक प्रहरी कार्यालय, मालपोत कार्यालय, प्रदेश लेखा कार्यालय र वडा नं ४ वडा कार्यालय गरी ८ वटा कार्यालयमा क्षति पुगेको इलाका प्रहरी कार्यालय चन्द्रपुरको प्रहरी नायब उपरीक्षक रूपा लाबुङले जानकारी दिइन्।
१० वटा पालिका सहित महोत्तरीमा १ सय वटा सरकारी कार्यालय छ। सहायक प्रमुख जिल्ला अधिकारी सञ्जय कुमार पोखरेलले अख्तियार दुरूपयोग अनुसन्धानको बर्दिबास स्थित कार्यालय, पिपरा गाउँपालिकाको कार्यालय र मठियानी गाउँपालिकाको दुई वटा वडा बाहेकका सरकारी कार्यालय सकुशल छ।
८० वटा सरकारी कार्यालय रहेको धनुषामा मधेस प्रदेशको राजधानी जनकपुर समेत पर्छ। सहायक प्रमुख जिल्ला अधिकारी उमेश कुमार दहालका अनुसार ४ वटा सरकारी कार्यालय पूर्ण रूपमा क्षतिग्रस्त छन्।
जनकपुर विमानस्थल भन्सार कार्यालय, आन्तरिक राजस्व कार्यालय, यातायात व्यवस्था कार्यालय र जनकपुरधाम उपमहानगरपालिका पूर्ण क्षति भएको हो। प्रदेश सभा र मन्त्रालयहरूमा पनि आगजनी र तोडफोड भएको छ। मन्त्रालयहरूको भुइँ तल्लामा बढी क्षति छ।
‘जिल्ला प्रशासन कार्यालयको दुई वटा शाखामा क्षति पुगेको छ, कार्यालयले सेवा सुरू गरिसकेको छ,’ सप्रजिअ दहालले भने।
सिरहामा २७ वटा संघीय कार्यालयहरू, १७/१७ वटा प्रादेशिक कार्यालय र स्थानीय तहहरू, संस्थानतर्फ १० र बैंक तथा वित्तीय संस्थातर्फ ११ वटा गरी १२६ वटा कार्यालय छन्। क्षतिको विवरण संकलन भइनसकेको सहायक प्रमुख जिल्ला अधिकारी चेतराज बरालले जानकारी दिए।
सिरहा जिल्ला अदालत, जिल्ला सरकारी कार्यालय, शिक्षा विकास तथा समन्वय इकाई, सिरहा, लहान, सुखीपुर, मिर्चैया, धनगढीमाई, कल्याणपुर, गोलबजार नगरपालिका, नवराजपुर, बरियारपट्टी गाउँपालिका, ईलाका प्रहरी कार्यालय गोलबजार, जिल्ला ट्राफिक प्रहरी कार्यालय लहान, इलाका प्रहरी कार्यालय लहान, आन्तरिक राजश्व कार्यालय, यातायात व्यवस्था कार्यालय लगायतका कार्यालयहरुमा क्षति पुगेको छ।
७१ वटा सरकारी कार्यालय रहेको सप्तरीमा आन्दोलनकारीले ३१ वटामा क्षति पुर्याएका छन्।
सहायक प्रमुख जिल्ला अधिकारी राम बहादुर शाहीले क्षतिको विवरण संकलनका लागि सम्बन्धित कार्यालयलाई निर्देशन दिइसकेको छ।
जिल्ला अदालत, उच्च अदालत जनकपुर राजविराज इजलास सप्तरी, उच्च सरकारी वकिलको कार्यालय, सप्तरी जिल्ला अदालत, सरकारी वकिलको कार्यालय, जिल्ला प्रशासन कार्यालय, जिल्ला प्रहरी कार्यालय, भूमि सुधार कार्यालय, नापी कार्यालय, आन्तरिक राजस्व कार्यालय, जिल्ला हुलाक कार्यालय लगायतका सरकारी कार्यालयमा क्षति पुगेको छ।
-1746009348.jpg)
