प्रतिनिधि सभा विघटन विरूद्धमा रिट लिएर सर्वोच्च अदालत जाने मनसायमा रहेका सभामुख देवराज घिमिरेलाई राजनीतिक दलहरूले ‘पर्ख र हेर’को अवस्थामा बस्न सुझाव दिएका छन्।
एमाले बाहेकका दलहरूले प्रतिनिधि सभा विघटनविरूद्ध रिट लिएर सर्वोच्च जाने विषयमा सभामुखलाई स्पष्ट धारणा नदिएका हुन्।
सिंहदरबारस्थित आफ्नै कार्यकक्षमा बुधबार सभामुखले दलहरूलाई प्रतिनिधि सभा विघटनबारे पार्टीको धारणासहित उपस्थित हुन आग्रह गरेका थिए।
बैठकको सुरूमा सभामुख घिमिरेले सर्वोच्च अदालतमा प्रतिनिधि सभा विघटनका विरूद्धमा रिट परिसकेको अवस्थाबारे जानकारी गराएका थिए।
‘प्रतिनिधि सभा विघटनको विषयमा सभामुख नै अदालत जानुपर्छ भन्ने कतिपयको धारणा छ’, घिमिरेले बैठकमा भनेका थिए, ‘मलाई जे गरेपनि दलहरुको सल्लाहमा गरौं भन्ने लागेको छ। त्यसैका लागि बोलाएको हुँ।’
त्यसपछि एमालेका नेता महेश बर्तौलाले प्रतिनिधि सभा विघटनविरूद्ध अदालतमा जानुपर्ने धारणा राखेका थिए।
‘प्रतिनिधि सभाको विघटन अलोकतान्त्रिक छ। यो असंवैधानिक छ, प्रतिगमन भएको छ’, बर्तौलाले बैठकमा भने, ‘विघटन फिर्ता हुनुपर्छ, संवैधानिक मार्गबाटै निकाश खोज्नुपर्छ।’
बर्तौलापछि बोलेका नेपाली कांग्रेसका नेता श्याम घिमिरेले प्रतिनिधि सभा विघटनबारे संवैधानिक परीक्षण हुनुपर्ने बताए।
‘कांग्रेस संवैधानिक परीक्षण हुनुपर्छ भन्ने पक्षमा छ। यो जरूरी छ’, घिमिरेले बैठकमा भने, 'सभापतिले केन्द्रीय समितिको बेठकमा प्रतिनिधि सभा विघटन असंवैधानिक छ भनेर बोल्नुभएको छ।’
उनले प्रतिनिधि सभा पुर्नस्थपाना र निर्वाचनका विषयमा पार्टीको केन्द्रीय समितिमा छलफल भएपछि थप स्पष्ट धारणा आउने बताएका थिए। तर उनले सभामुखलाई रिट लिएर सर्वोच्च जाने/नजाने विषयमा धारणा दिएनन्।
एकीकृत समाजवादीका राजेन्द्र पाण्डेले प्रतिनिधि सभा विघटनको विषयमा ‘सर्वोच्च अदालतबाट क्लियर गरेर जानु’उपयुक्त हुने बताए। तर उनले आफ्नो पाटीले चुनावमा जाने निर्णय गरिसकेको ब्रिफिङ बैठकमा गरेका थिए।
‘यो विषयमा सर्वोच्चले क्लियर गर्दा राम्रो हुन्छ। अन्यथा हाम्रो पार्टीले चुनावमा जाने निर्णय गरिसकेका छौं’, पाण्डेले बैठकमा भने, ‘संसद पुर्नस्थापना भयो भने संविधान बाँच्ने थियो।’ तर मुलुक निर्वाचनको बाटोमा अघि बढेको उनले उल्लेख गरेका थिए।
माओवादी केन्द्रका हितराज पाण्डेले प्रतिनिधि सभा विघटन र भदौ २३ र २४ गतेको घटनालाई इतिहासकै दुर्लभ घटना भएको टिप्पणी गरेका थिए।
‘संविधानको किताब हेर्ने हो भने विघटन संविधानसम्म्त छैन’, बैठकमा पाण्डेले भने, ‘तत्काल देखिएको समस्या समाधानका लागि जसरी वातावरण बन्यो। त्यसलाई परिस्थितिले श्रृजना गरेको हो भन्ने हाम्रो बुझाई छ। त्यसैले निर्वाचनको वातावरण बन्छ भने बनाउनुपर्छ।’
बैठकमा राष्ट्रिय स्वतन्त्र पार्टी अनुपस्थित भएको थियो।
राप्रपाका ज्ञानेन्द्र शाहीले अहिलेकै अवस्थामा संसद पुर्नस्थपाना गर्दा झन् ठूलो आन्दोलन हुनसक्ने बताएका थिए।
‘जेजीका माग सम्बोधन गर्ने, प्रत्यक्ष निर्वाचित प्रधानमन्त्री र संघीयता खारेजी लगायतका काम गर्न सक्ने भए जेनजीले पुनर्स्थापना मान्छन्’, शाहीले भने, ‘पुनर्स्थापना गरेर जो जो थियौँ त्यो गएर सरकार चलाउन जाने भए ठिक हुँदैन।’
बैठकको अन्त्यमा सभामुख देवराज घिमिरेले संविधान र संसदीय प्रणालीको रक्षाका लागि आफूले आवश्यक काम गर्ने बताएका थिए। त्यसका लागि सबैसँग छलफल गरेर अघि बढ्ने घिमिरेले बताएका थिए।
सभामुख घिमिरेले बिहीबार नेपाल बार एशोसिएशनका पदाधिकारी र पूर्व महान्यायाधिवक्ताहरू सँग छलफल गर्दैछन्।
1635339834.jpeg)
-1756794700.JPG)
-1746009348.jpg)
