मधेस प्रदेशका नवनियुक्त मुख्यमन्त्री जितेन्द्र सोनल र दुई मन्त्रीले पद तथा गोपनीयताको शपथ लिएका छन्।
मुख्यमन्त्री सोनल सहित जनमतबाट महेश यादव र नेकपा एसबाट कनिश पटेल बिना विभागीय मन्त्रीको रूपमा शपथ लिएका हुन्।
उनीहरूलाई प्रदेश प्रमुख सुमित्रा सुवेदी भण्डारीले पद तथा गोपनीयताको शपथ गराएको प्रदेश प्रमुखको कार्यालयका निमित्त सचिव सत्रुधन यादवले जानकारी दिए।
लोकतान्त्रिक समाजवादी पार्टी (लोसपा) का नेता सोनल जनता समाजवादी पार्टी नेपाल, जनमत पार्टी, नेकपा माओवादी केन्द्र, लोकतान्त्रिक समाजवादी पार्टी नेपाल, नेकपा एकीकृत समाजवादी सहित पाँच राजनीतिक दलका ५६ जना प्रदेश सभा सदस्यहरूको समर्थनमा बुधबार मुख्यमन्त्री नियुक्त भएका थिए। उनलाई एक सिटको नागरिक उन्मुक्ति पार्टीले पनि समर्थन गरेको छ।
सोनललाई समर्थन रहेको भनिएका जनमत पार्टीका १३ जना सदस्य मध्य निवर्तमान मुख्यमन्त्री सतिश कुमार सिंह र पूर्वमन्त्री त्रिभुवन साहले जनस्वराज पार्टीमा सनाखत गरेका छन्।
प्रदेश प्रमुख भण्डारीले मुख्यमन्त्रीमा सोनललाई नियुक्त गरेपछि कांग्रेस, एमालेका नेताहरूले भने विरोध जनाउँदै आएका छन्।
कांग्रेस, एमाले र जनमत तीन दलको सहमतीमा ५८ जना सदस्यको समर्थनमा प्रदेश प्रमुख समक्ष दाबी प्रस्तुत गरे पनि बेवास्ता गरेको आरोप उनीहरूको छ।
जनमत पार्टी फुटेर केही सदस्य जनस्वराज पार्टीमा गइसकेको अवस्थामा ५६ जनाको समर्थन कायम गरेर मुख्यमन्त्री नियुक्त गर्नु असंवैधानिक भएकोले तत्काल बदर हुनुपर्ने माग उनीहरूले राखेका छन्।
प्रदेश प्रमुखको कार्यालयका निमित्त सचिव यादवले भने जनमतका संसदीय दलका नेता महेश यादवले आधारिक समर्थन सोनललाई रहेको पत्र दिएकोले उनैलाई मुख्यमन्त्रीमा नियुक्त गरिएको जानकारी दिए।
जनमत पार्टी फुटिसकेको अवस्था छ त्यसले कुनै असर पार्दैन? सेतापाटीले गरेको प्रश्नको उत्तर दिँदै निमित्त सचिव यादवले भने, ‘पार्टी फुटेको आधिकारिक जानकारी आएको छैन, कसैले दाबी विरोध पनि गरेको छैन।’
1635339834.jpeg)
-1746009348.jpg)
