नेकपा एमालेले सांसदहरूलाई हस्ताक्षर गराउन थालेको छ।
प्रतिनिधिसभा विघटन भएकाले एमाले सांसदहरू अहिले जिल्ला बाहिर छन्। काठमाडौंमा उपलब्ध रहेका सांसदहरूको हस्ताक्षर गराइरहेको एक प्रतिनिधिसभा सदस्यले बताए।
उनका अनुसार पार्टीले संकलन गरिरहेको सांसदहरूको हस्ताक्षरको प्रयोजन खुलाइएको छैन।
एमालेले पछिल्लो समय प्रतिनिधिसभा पुनः स्थापनाको वकालत गर्दै आएको छ। सुशीला कार्की नेतृत्वको मौजुदा सरकारले चुनाव गराउने सम्भावना नरहेको र वर्तमान सरकार चुनाव गराउनेतिर अग्रसर पनि नभएको भन्दै एमालेले प्रतिनिधिसभा पुनः स्थापनामा जानुपर्ने निष्कर्ष निकालेको छ।
यसअघि बसेको सचिवालय र केन्द्रीय कमिटी बैठकले पनि पुनः स्थापनाबारे नै निर्णय गरेको थियो। त्यसैलाई मातहतका कमिटीमा पुर्याउन जारी गरिएको अन्तरपार्टी निर्देशन (अपानि) मा पनि एमालेले वडा तहदेखि केन्द्रैसम्म पार्टीका नेता–कार्यकर्तालाई पुनः स्थापनाका लागि परिचालित हुन पनि भनेको छ।
एमालेले आगामी कात्तिक २२ गते वडा भेला गर्दैछ। कात्तिक २५ गते पालिका भेला र कात्तिक २९ गते जिल्ला तहमा जनसभा गर्दैछ। केन्द्रमा भने मंसिर ६ गते जनसभा हुनेछ।
यी जनप्रदर्शनमार्फत् प्रतिनिधिसभा पुनः स्थापनाको पक्षमा जनदबाब सिर्जना गर्ने तयारी गरेको एमालेले सांसदहरूको हस्ताक्षर संकलन पनि सुरू गरेको छ।
प्रतिनिधिसभा पुनः स्थापनाको रिट लिएर जान सांसदहरूको हस्ताक्षर बटुलेको चर्चा भइरहँदा एमालेको निवर्तमान प्रतिनिधिसभामा प्रमुख सचेतक महेश बर्तौलाले पनि सांसदहरूको हस्ताक्षर संकलन गरेको स्वीकार गरे।
उनले पहिलाको हस्ताक्षर जलेको हुनाले सांसदहरूसँग छलफल भइरहेको बताए।
'पहिलाको हस्ताक्षर सबै जलिहाल्यो। अहिले पार्टीले पुनः स्थापनामा जाने भनेर निर्णय गरेको छ। तर तिमीहरू खै कानुनी उपचारमा गएको भन्ने प्रश्न उठिरहेको छ। यहीबारे छलफल गरेका हौं। संसदीय दल नै छैन। त्यस कारण संसदीय दलका तर्फबाट गरेको भन्ने होइन,' उनले भने, 'हामीले छलफल गरेका छौं।'
उनले कहिले रिट लिएर जाने वा नजाने भनेर यकिन भने नभइसकेको बताए।
'कहिले रिट लिएर जान्छौं, त्यो छलफलमै छ। हामी एमालेभित्र मात्रै होइन अन्य दलसँग पनि छलफलमै छौं,' उनले भने।
निवर्तमान सचेतक सुनीता बरालले पनि प्रतिनिधिसभा पुनः स्थापनाबारे सांसदहरूसँग छलफल भइरहेको बताइन्। उनले पनि दलले नै बोलाएर हस्ताक्षर नगरेको बताइन्।
'संसदीय दलले नै बोलाएको भन्ने छैन। सांसद पार्टीका नेता पनि छन्। म पनि पार्टी केन्द्रीय सदस्य हुँ, हामीबीच छलफल भइरहेको छ। अलिअलि सांसदहरूसँग छलफल भइरहेको छ,' उनले भनिन्।
आफ्ना आवश्यकताका विषयमा छलफल भएको भन्दै उनले पनि हस्ताक्षरबारे स्वीकार गरिन्।
'संस्थागत आह्वान नै भने गरेका छैनौं,' उनले भनिन्।
एमाले सांसद ठाकुर गैरेले पार्टीका नेताहरूले 'कता हुनुहुन्छ' भनेर सोधखोज गरेको जानकारी दिए।
प्रतिनिधि पुनः स्थापनाका लागि अदालत जानेबारे छलफल भइरहेको आफूले बुझेको र हस्ताक्षर भने नगरेको उनले बताए।
'म पार्टी कामले पाल्पा आइपुगेको छु। कता हुनुहुन्छ भनेर नेताहरूले सोधखोज गर्नुभएको थियो,' उनले भने, 'तुरून्तै आइहाल्नुहोस् भन्नेजस्तो कुरा त बुझेको छैन।'
अर्का एक सांसदले बहुमत सांसदको हस्ताक्षर लिएर अदालत जाने कुरा भइरहेको बताए। उनले एमालेका सांसद मात्र नभइ नेपाली कांग्रेस र अन्य पुनः स्थापना पक्षधरहरू समेतको हस्ताक्षरसँगै रिट लिएर जानेबारे कुराकानी भइरहेको बुझेको दाबी गरे।
-ink-1756887189.jpeg)
-1746009348.jpg)
