नेपाली कांग्रेसका नेता शेखर कोइरालाले महाधिवेशन गरेर नयाँ नेतृत्व लिएर चुनावमा जानुपर्ने बताएका छन्।
फागुन २१ गते सरकारले प्रतिनिधि सभा निर्वाचन घोषणा गरेको छ। त्यसअघि नै १५ औं महाधिवेशन गरेर जानुपर्ने पक्षमा कोइराला उभिएका हुन्।
‘आउँदो आम निर्वाचनभन्दा पहिले महाधिवेशन सम्पन्न गरी नयाँ र ताजा नेतृत्वमा चुनावमा जानुपर्छ,’ विशालनगरस्थित आफ्नो सम्पर्क कार्यालयमा आफूनिकट केन्द्रीय सदस्य र जिल्ला सभापतिहरूसँग शुक्रबार बिहानको भेटका क्रममा कोइरालाले भने।
१५ औं महाधिवेशन २०८२ मंसिर मसान्तभित्रै सम्पन्न गर्नुपर्ने विषयमा धेरै पहिलेदेखि नै आफूले बोल्दै आएको बताएका कोइरालाले अहिले समयको चाप, अवस्था आदिका कारण मंसिर मसान्तमा महाधिवेशन गर्न नसकिए कुनै पनि हालतमा २०८२ पुस मसान्तसम्म महाधिवेशन गरिसक्नुपर्ने बताए।
‘पुस मसान्तसम्मको तालिका बनाँउदा निर्वाचन आयोगको निर्वाचनले प्रकाशित गरेको तालिकासँग नबाझिने गरी बनाउनुपर्छ,’ उनले भने। केन्द्रीय समितिमा महामन्त्री गगन थापाले पुस १६ देखि १९ गतेसम्म महाधिवेशन गर्ने प्रस्ताव पेस गरेका छन्।
साथै कोइरालाले कांग्रेस अहिले एकतावद्ध, गम्भीर, जिम्मेवार, संयम भएर अघि बढ्नुपर्ने बताए।
‘पार्टीसँग सम्बद्ध सबैले राष्ट्र, जनता र लोकतन्त्रलाई प्राथमिकतामा राख्नुपर्छ,’ उनले भने, ‘विगतमा पार्टीले थुप्रै आरोह-अवरोह ब्यहोरेकोले आगामी दिनमा एकता नै बल हो भन्ने भावनानुसार एक हुनैपर्छ र कसैले पनि मेरो गोरूको बाह्रै टक्का भन्ने सोच राख्नु हुन्न।’
उनले आफू पार्टीमा एकता, मेलमिलाप चाहने पनि बताए।
‘गुट, उपगुट र फुटको अन्त्य गर्न चाहन्छु।कोही कसैप्रति आग्रह-पूर्वाग्रह नराखी हामी अघि बढ्नै पर्छ,’ उनले भने, ‘देशभरका इमान्दार, निष्ठावान र निरन्तर क्रियाशील रहेका साथीहरूले पार्टीलाई बचाइरहनु भएको छ।’
उनले पार्टीका लाखौँ शुभेच्छुक र बाह्य सबै पक्षले अहिले कांग्रेसको निर्णय पर्खिरहेको बताए। असोज २८ गतेदेखि केन्द्रीय समिति बैठक सुरू भए पनि अहिलेसम्म महाधिवेशन कार्यतालिका पारित भएको छैन।
-1746009348.jpg)
