फागुन २१ को चुनावअघि महाधिवेशन गर्नुपर्ने माग गरेका आफूनिकट केन्द्रीय सदस्यहरूलाई नेपाली कांग्रेसका सभापति शेरबहादुर देउवाले कार्यवाहक सभापति र महामन्त्रीहरूलाई पनि भेट्न सुझाव दिएका छन्।
१४ औं महाधिवेशनमा देउवा प्यानलमा रहेकामध्ये २८ जना केन्द्रीय सदस्यहरू महाधिवेशन गरेर मात्रै आमचुनावमा जाने पक्षमा छन्। सभापति देउवा पक्षका करिब ८० केन्द्रीय सदस्य भने चुनावपछि मात्रै महाधिवेशन पक्षमा छन्।
चुनावअघि महाधिवेशन गर्ने कि पछि, नियमित कि ५४ प्रतिशत महाधिवेशन प्रतिनिधिको मागअनुसार विशेष महाधिवेशन भन्नेमा विवाद हुँदा केन्द्रीय समिति अनिर्णीत छ। केन्द्रीय समिति बैठक भोलि दिउँसो १ बजे बस्दैछ।
सभापति देउवा पक्षका २८ केन्द्रीय सदस्यहरूले सभापति, कार्यवाहक सभापति, महामन्त्रीद्वय गगन थापा र विश्वप्रकाश शर्मासँग भेटिसकेका छन्।
उनीहरूले आजै नेता शेखर कोइराला र विशेष महाधिवेशन हस्ताक्षर अभियान अगुवाइ गर्ने नेताहरूसँग पनि भेट्नेछन्।
सभापति देउवासँग बिहीबार अपराह्न भेटवार्ता गरिएको केन्द्रीय सदस्य आङगेलु शेर्पाले बताए। १५ औं महाधिवेशन चुनाव भन्दा अघि नै गर्नुपर्ने भएकोले त्यसअनुसार कार्यतालिका ल्याउन आफूहरूले माग राखेको उनको भनाइ छ।
‘हिजो दिउँसो ४ बजेदेखि पौने ५ बजेसम्म सभापतिज्यूलाई निवासमै पुगेर हामीले कुराकानी गर्यौं, चुनावअघि पार्टीको १५ औं महाधिवेशन गर्नुपर्छ भन्ने हाम्रो एजेन्डा सुनायौं,’ उनले सेतोपाटीसँग भने, ‘सभापतिज्यूले मलाई भेट्न आयौं, धन्यवाद छ, मैले उपसभापति पूर्णबहादुर खड्काजीलाई कार्यवाहक दिइसकेको छु, कार्यवाहक र महामन्त्रीजीहरूसँग पनि कुरा गर्नुहोस्।’
सभापति देउवाले आफू चुनावअघि महाधिवेशनका पक्षमा सकारात्मक रहेको बताएका थिए। ‘यो प्रस्ताव मिलनविन्दुजस्तो मलाई लाग्छ, म सकारात्मक छु, पार्टीलाई धेरै ध्रुवीकृत बनाउन हुँदैन, हामी एकताबद्ध रहनुपर्छ, मिलेरै जाने हो, त्यसका लागि तपाईंहरूले पनि पहल लिनुहोला,’ सभापति देउवाले आफूनिकट केन्द्रीय सदस्यहरूसँग भनेका थिए।
आफूहरूसँगको भेटमा सभापति देउवाले सिमरा घटना र अहिलेको परिस्थितिमा चुनावी वातावरण रहे वा नरहेकोबारे पनि बुझ्न खोजेको उनले बताए। ‘सभापतिज्यूले सिमरा घटनाको सन्दर्भ उप्काउनुभयो, चुनावी वातावरण छ कि छैन अहिले भन्ने खालका कुरा बुझ्न खोज्नुभएको थियो,’ उनले भने।
कांग्रेसले प्रतिनिधि सभा विघटन असंवैधानिक भनेको छ। फागुन २१ को चुनावमा जाने विषयमा केन्द्रीय समितिबाट निर्णय भने लिइसकेको अवस्था छैन।
साथै चुनावअघि महाधिवेशन गर्न उपयुक्त हुने बताएका देउवानिकट केन्द्रीय सदस्यहरूले आज कार्यवाहक सभापति खड्का र दुवै महामन्त्रीलाई बेग्लाबेग्लै भेटेका छन्।
कार्यवाहक खड्कालाई निवासमै र महामन्त्रीहरूलाई एक होटलमा उनीहरूले भेटेर चुनावअघि नै १५ औं महाधिवेशन कार्यतालिका ल्याउन जोड दिएका थिए।
‘कार्यवाहक सभापतिज्यूलाई भेटेर नियमित महाधिवेशन कार्यतालिका ल्याउन भन्यौं। चुनावअघि महाधिवेशन गर्नुपर्छ भन्ने हाम्रो माग राख्यौं,’ उनले भने, ‘उहाँले सबैसँग छलफल गरेर केन्द्रीय समितिबाट निर्णय लिइने कुरा गर्नुभयो। केन्द्रीय समिति बैठक धेरै समय चल्यो र निर्णय लिन ढिलाइ भएकोमा बाहिर सन्देश राम्रो गएको छैन भन्ने कुरा उहाँको थियो।’
कार्यवाहक सभापति खड्काले नियमित महाधिवेशन गर्नकै लागि सबै पक्षहरूसँग छलफल गरेको र प्रयास जारी राखेको बताएका थिए।
त्यसपछि केन्द्रीय सदस्यहरूले महामन्त्रीद्वय गगन थापा र विश्वप्रकाश शर्मासँग संयुक्त रूपमा भेटेका थिए।
आफूहरूसँगको भेटमा महामन्त्रीद्वयले पुसभित्रै १५ औं महाधिवेशन गर्न सके राम्रो हुने र त्यसले विशेष महाधिवेशन माग गरेकाहरूलाई पनि सम्बोधन गर्न सक्ने कुरा राखेको उनले बताए।
महामन्त्री थापाले कात्तिक १८ गतेको केन्द्रीय समिति बैठकमा आफूले पुस १६ देखि १९ गतेसम्म १५ औं महाधिवेशन प्रस्तावसमेत पेस गरिसकेको उल्लेख गर्दै सो अवधिमा नियमित महाधिवेशन भए विशेष महाधिवेशन माग गर्नेहरूको भावना पनि समेटिने बताएका थिए। उक्त कार्यतालिकामा आफ्नो पनि समर्थन रहने अर्का महामन्त्री शर्माको भनाइ थियो।
महामन्त्री थापा र शर्माले चुनावअघि नियमित वा विशेष कुनै पनि महाधिवेशन भएन भने आफूहरू चुनाव नलड्नेसमेत बताएका थिए। ‘चुनावअघि महाधिवेशन भएन भने हामी दुवै जना चुनाव लड्दैनौं,’ दुवै महामन्त्रीले सभापति देउवानिकट केन्द्रीय सदस्यहरूसँग भनेका थिए। केन्द्रीय सदस्य शेर्पाले पनि चुनावअघि महाधिवेशन नभए दुवै महामन्त्रीले चुनाव नलड्ने कुरा आफूहरूसँग गरेको बताए।
सभापति देउवा पक्षका केन्द्रीय सदस्यहरू राजेन्द्रकुमार श्रेष्ठ, भरतकुमार शाह, अर्जुनप्रसाद जोशी, पुष्पा भुसाल, कर्णबहादुर बुढा, गणेश लामा, आङगेलु शेर्पा, डिला संग्रौला, उदयशम्शेर राणा, नानु बास्तोला, धना खतिवडा, अब्दुल रज्जाक, देवेन्द्रराज कँडेल, योगेन्द्र चौधरी, गोपाल दहित, बहादुर सिंह लामा, दिलमान पाख्रिन, अब्दुल सत्तार, मोहन आचार्य, अमृत अर्याल, जिपछिरिङ लामा, रामजनम चौधरी, चम्पादेवी खड्का, नारायणबहादुर कार्की, चीनकाजी श्रेष्ठलगायत चुनावअघि महाधिवेशनका पक्षमा छन्।
उनीहरूले नेता शेखर कोइराला र विशेष महाधिवेशन माग गरेका नेताहरूलाई पनि भेट्ने तयारी गरेको शेर्पाले जानकारी दिए। नेता कोइराला पुसभित्रै नियमित महाधिवेशनका पक्षमा छन् भने त्यो अवधिमा नियमित महाधिवेशन हुन नसके केन्द्रीय समितिबाट सर्वसम्मत निर्णय गरी विशेष महाधिवेशनमा जानुपर्नेमा छन्।
विशेष महाधिवेशन पक्षधरले भने हस्ताक्षर सनाखत गरी विशेष महाधिवेशन मिति र स्थान तोक्न माग गर्दै आएका छन्। असोज २९ गते हस्ताक्षर बुझाएकोले पुस २९ गतेभित्रै विशेष महाधिवेशन गर्नुपर्ने माग उनीहरूको छ।
-1746009348.jpg)
