नेपाली कांग्रेसमा विशेष महाधिवेशन माग गरेका नेताहरूले राष्ट्रपति रामचन्द्र पौडेललाई भेटेर कुराकानी गरेका छन्।
शीतल निवासमा सोमबार विशेष महाधिवेशन पक्षधर नेताहरू र राष्ट्रपति पौडेलबीच करिब सवा घन्टा छलफल भएको हो।
राष्ट्रपतिसँगको छलफलमा समसामयिक राजनीतिक घटनाक्रम, आगामी चुनाव र दलहरूले खेल्नुपर्ने भूमिका बारेमा चर्चा भएको थियो।
‘देशको वर्तमान परिस्थिति, दलहरूले खेल्नुपर्ने भूमिका र अपनाउनुपर्ने संयमता लगायतका विषयमा राष्ट्रपतिज्यूसँग हाम्रो कुराकानी भएको हो,’ नेता गुरूराज घिमिरेले भने, ‘यी सबै कुराका लागि दलका नेताहरूलाई भेटघाटका लागि मैले आग्रह गरेको छु भनेर राष्ट्रपतिज्यूले भन्नुभयो।’
राष्ट्रपति पौडेलले प्रजातन्त्रलाई आफ्नो मार्गमा फर्काउनुपर्ने सबैभन्दा ठूलो दायित्व रहेको बताएका थिए।
‘प्रजातन्त्रलाई ट्र्याकमा फर्काउनुपर्ने दायित्व छ, संविधान सुचारू गर्न र लोकतान्त्रिक शासन प्रणालीलाई अघि बढाउन निर्वाचनमार्फत् गठन हुने सरकार आजको आवश्यकता हो, नेपाली कांग्रेसले निर्वाचनमा भाग लिने निर्णय गरेर सकारात्मक पहलकदमी लिएको छ,’ राष्ट्रपति पौडेलले कांग्रेसका नेताहरूसँग भनेका थिए।
साथै राष्ट्रपतिले एकताबद्ध भएर दलहरू निर्वाचनकै निम्ति तयारी र काम गर्नुपर्नेमा जोड दिएका थिए।
‘सबैजसो राजनीतिक दलहरूसँग र सरकारसँग म निरन्तर संवाद र सल्लाहमै छु, निर्वाचनका निम्ति केही प्रतिकूलताहरू देखिए पनि त्यसलाई हामी अनुकूलतामा बदल्छौं, अन्तर्राष्ट्रिय समुदायबाट पनि हामीलाई सकारात्मक सहयोग प्राप्त हुने विश्वास छ,’ राष्ट्रपतिले भनेका थिए।
यसपछि भने कांग्रेसको आन्तरिक विषयले छलफलमा प्रवेश पाएको थियो।
पार्टीमा १५ औं महाधिवेशनको प्रक्रिया समयमै अघि बढ्न नसकेकोले विशेष महाधिवेशन माग गर्नुपर्ने अवस्था देखिएको कुरा नेताहरूले राष्ट्रपतिसमक्ष सुनाएका थिए।
‘समयमै १५ औं महाधिवेशन नहुने देखेर हामी ५४ प्रतिशतले विशेष महाधिवेशनको माग राखेका छौं, यो पार्टीको विधान भित्रकै व्यवस्थाअनुसार राखेको माग हो भन्ने कुरा हामीले राष्ट्रपतिज्यूसमक्ष राख्यौं,’ उनले भने, ‘यो झगडा र द्वन्द्वको भन्दा पनि विधानकै व्यवस्था हो।’
विशेष महाधिवेशन गर्न ५४ प्रतिशत महाधिवेशन प्रतिनिधिको हस्ताक्षर रहेको र अझै धेरै महाधिवेशन प्रतिनिधिको समर्थन रहेको कुरा पनि आफूहरूले राखेको उनले जानकारी दिए।
विशेष परिस्थितिमा पार्टीलाई निकास दिन विकल्पका रूपमा विशेष महाधिवेशन माग गरिएको नेताहरूको भनाइ छ।
‘यो विशेष महाधिवेशन हाम्रा नेताहरू बिपी कोइराला र सुवर्ण शम्शेरले पनि अख्तियार गरेको बाटो हो, यो कुनै झगडा, द्वन्द्व, विभाजन र विखण्डनको बाटो होइन,’ नेताहरूले राष्ट्रपतिसमक्ष भनेका छन्।
नेता बलदेव तिमल्सिनाले नियमित महाधिवेशन गर्ने अवस्था नदेखिएकोले कांग्रेसमा विशेष महाधिवेशन सान्दर्भिक बन्दै गइरहेको कुरा राखिएको बताए।
‘मंसिर मसान्तसम्म यो कार्यसमितिको चार वर्षे कार्यकाल छ, त्यसपछि म्याद थप गर्न हुँदैन, अहिले नियमित महाधिवेशन हुने अवस्था देखिन्न, त्यसैले विशेष महाधिवेशन माग सान्दर्भिक बन्दै गइरहेको छ,’ नेता तिमल्सिनाले भने, ‘अहिलेको नीति र नेतृत्व बदलेनौं भने हामीले राम्रो नतिजा ल्याउन सक्दैनौं भन्ने कुरा हामीले राख्यौं।’
आमकार्यकर्ता, नेता र मतदाताको चाहनाअनुसार नीति र नेतृत्व परिवर्तन गर्न विशेष महाधिवेशन आयोजना गर्न असोज २९ गते नै कार्यवाहक सभापति पूर्णबहादुर खड्कालाई हस्ताक्षर बुझाइएको कुरा नेताहरूले राष्ट्रपतिलाई सुनाएका थिए।
विशेष महाधिवेशन माग गरेका नेताहरूको यति कुरा सुनेपछि राष्ट्रपति पौडेलले यसबारे पनि केही बोलेका थिए।
‘कुनै पनि पार्टी भित्रको आन्तरिक विषयमा मैले बोल्न मिल्दैन, पक्ष वा विपक्ष लिन पनि मिल्दैन, तपाईंहरू आपसी सल्लाह गरेर उपयुक्त बाटो के हुन्छ, जे ठिक लाग्छ त्यसअनुसार अघि बढ्नु,’ राष्ट्रपति पौडेलका भनाइ उद्धृत गर्दै तिमल्सिनाले भने, ‘पार्टीभित्र सबैसँग सल्लाह गर्नुस्, त्यसअनुसार अघि बढ्नुहोस्, विग्रहलाई प्राथमिकता नदिनुहोस्।’
राष्ट्रपति पौडेलले पार्टीभित्रका विषय टुंग्याएर निर्वाचनमा केन्द्रित हुन पनि कांग्रेसका नेताहरूलाई आग्रह गरेका थिए।
कांग्रेसले एक महिनाभन्दा लामो समयसम्म केन्द्रीय समिति बैठकमा छलफल गरे पनि चुनावअघि वा पछि कहिले महाधिवेशन गर्ने, नियमित वा विशेष कुन महाधिवेशन गर्ने भन्ने निष्कर्ष निकाल्न सकेको छैन। त्यसका लागि निर्णय गर्न भन्दै मंसिर ११ गतेका लागि केन्द्रीय समिति बैठक बोलाइएको छ।
यसबीचमा महामन्त्रीद्वय गगन थापा र विश्वप्रकाश शर्माले पुसभित्र नियमित महाधिवेशन गर्न नसक्ने हो भने विशेष महाधिवेशनको विकल्प नहुने बताइरहेका छन्। नेता शेखर कोइरालाले पनि केन्द्रीय समितिबाट सर्वसम्मत निर्णय गरेर विशेष महाधिवेशनमा जान सकिने बताएका छन्।
तर सभापति शेरबहादुर देउवा पक्ष महाधिवेशन मितिबारे एकमत छैन। देउवानिकट २७ जना केन्द्रीय सदस्य चुनावअघि महाधिवेशन गर्नुपर्ने पक्षमा छन् भने ८० जनाभन्दा बढी केन्द्रीय सदस्य चुनावपछि वैशाखमा महाधिवेशनका पक्षमा छन्।
आज फेसबुकमा पोस्ट गर्दै महामन्त्री गगन थापाले अब विशेष महाधिवेशन हुने बताएका छन्।
केन्द्रीय समिति बैठक स्थगित गरेर कार्यवाहक सभापति खड्काले सहमति प्रयास गरिरहेका छन्।
सभापति देउवा पक्षका २७ केन्द्रीय सदस्यले आज विशेष महाधिवेशन पक्षधरसँग कुराकानी गरेका थिए भने ८० बढी केन्द्रीय सदस्य धुम्बाराहीमा छलफलमा जुटेका थिए।
विशेष महाधिवेशन पक्षधरले मंसिर १० गते काठमाडौंमा भेला बोलाएका छन्।
-1763886130.jpeg)
-1746009348.jpg)
