नेकपा एमालेका वरिष्ठ उपाध्यक्ष ईश्वर पोखरेलले अध्यक्षमा उम्मेदवारी घोषणा गरेका छन्।
आसन्न ११औं महाधिवेशनका लागि उनले मंगलबार लामो वक्तव्य जारी गर्दै अध्यक्षमा उम्मेदवारी घोषणा गरेका हुन्।
पहिले वरिष्ठ उपाध्यक्ष पोखरेलले पूर्वराष्ट्रपति विद्यादेवी भण्डारीकै उपस्थितिमा उम्मेदवारी घोषणा गर्ने तयारी थियो। तर यो प्रक्रिया केही दिनलाई थाती राखेर उनी एक्लैले विज्ञप्तिमार्फत् आफ्नो उम्मेदवारी घोषणा गरेका हुन्।
'राष्ट्र, जनता र पार्टीलाई सदैव शिरमा राखेको छु। जीवनका उचारचढावहरूमा इमान र निष्ठालाई कहिल्यै डगमगाउन दिएको छैन। यो नै मैले आर्जन गरेको नैतिक बल हो। शक्तिमा होइन, म विधि, समन्वय, सामूहिकता र सहकार्यमा विश्वास राख्छु। पार्टी निर्माणसम्बन्धी माथि उल्लिखित विचारको आधारमा ११औं राष्ट्रिय महाधिवेशनमा पार्टी अध्यक्ष पदको उम्मेदवारका रूपमा प्रस्तुत हुने निष्कर्षमा पुगेको छु। पार्टी पुनर्गठन र रूपान्तरणका लागि देशभरिका साथीहरूले गर्नुभएको आग्रह र सुझावलाई स्वीकार गरेर अध्यक्ष पदमा उम्मेदवारी घोषणा गरेको हुँ,' उनले विज्ञप्तिमा भनेका छन्।
ईश्वर पोखरेल कोअर्डिनेसन केन्द्रदेखि नै पार्टी आन्दोलनमा लागेका हुन्।
उनी २०३५ सालमा मोरङको डिफु गाउँमा नेकपा (माले) गठन गर्दाका संस्थापक केन्द्रीय सदस्य हुन्। त्यति बेला मालेको १२ सदस्य केन्द्रीय कमिटी थियो। मालेको चौथौ, मार्क्सवादीसँग एकता भएपछि पाचौं हुँदै लगातार केन्द्रीय कमिटीमा रहेका पोखरेल २०६५ मा बुटवलमा भएको आठौं महाधिवेशनबाट महासचिव निर्वाचित भएका थिए।
नवौंमा पनि महासचिव निर्वाचित भएका पोखरेल माओवादी केन्द्रसँग एकतापछि महासचिव हटाइएका थिए। दसौंपछि वरिष्ठ उपाध्यक्ष बनेका पोखरेल पार्टीभित्रका कुशल संगठक पनि मानिन्छन्। उनले लामो समय जनकपुर बसेर तराई–मधेसमा आन्दोलन विस्तार गर्न भूमिका खेलेका थिए।
२०५६ सालमा काठमाडौं ३ बाट निर्वाचित पोखरेल २०६४ र २०७० सालमा काठमाडौं–५ बाट पराजित भएका थिए। २०७४ सालमा उनी काठमाडौं–५ बाटै निर्वाचित भएका थिए।
२०७९ सालमा भने उनी चुनाव जित्न सकेनन्। नेपाली कांग्रेसका प्रदीप पौडेलसँग पराजित भएका थिए। २०५१ सालमा एमालेका तत्कालीन अध्यक्ष मनमोहन अधिकारी प्रधानमन्त्री हुँदा उनी प्रमुख सल्लाहकार थिए।
११औं महाधिवेशनमा उनले अध्यक्षमा उम्मेदवारी दिने गरी तयारी गरेका छन्। एमाले निर्वाचन आयोगले प्यानलगत प्रतिस्पर्धा गर्न, चुनावअगाडि प्यानल घोषणा गर्न बन्देज लगाएको छ। तथापि केन्द्रीय महाधिवेशनबाटै यसको उल्लंघन हुँदै आएको छ। दसौं महाधिवेशनमा यही निर्देशनका बाबजुद संस्थापन पक्षले नै प्यानल बनाएर चिट बाँडेको थियो।
वरिष्ठ उपाध्यक्ष पोखरेल समूहमा उपाध्यक्ष सुरेन्द्र पाण्डे, अष्टलक्ष्मी शाक्य, युवराज ज्ञवाली, सचिवहरू गोकर्ण विष्ट र योगेश भट्टराई लगायत छन्।
उनीहरूले उपाध्यक्ष विष्णु पौडेल र उपमहासचिव पृथ्वीसुब्बा गुरूङलाई पनि आफ्नो समूहमा जोड्ने प्रयत्न गरिरहेका छन्। यीमध्येलाई समेटेर टिम बनाउने तयारीमा पोखरेल छन्।
-1735893183.jpeg)
-1746009348.jpg)
