नेपाली कांग्रेसको केन्द्रीय समिति बैठक फेरि स्थगित भएको छ। बिहीबार दिउँसो २ बजे बस्ने गरी बोलाइएको बैठक शुक्रबार दिउँसो २ बजेसम्म स्थगित गरिएको हो।
मुख्य सचिव कृष्णप्रसाद पौडेलले विज्ञप्ति निकालेर केन्द्रीय समिति बैठक शुक्रबारसम्म स्थगित गरिएको जानकारी गराएका छन्।
कांग्रेसले असोज २८ देखि केन्द्रीय समिति बैठक गरे पनि महाधिवेशन कार्यतालिकामा मतभेद हुँदा अहिलेसम्म निर्णय लिन सकेको छैन।
कार्यवाहक सभापति पूर्णबहादुर खड्काले बुधबार महामन्त्रीद्वय गगन थापा र विश्वप्रकाश शर्मासँग अनौपचारिक कुराकानी गरेका थिए। उक्त कुराकानीमा महाधिवेशन तिथिमितिबारे सहमति जुट्न नसकेपछि बैठक फेरि स्थगित गरिएको नेताहरूको भनाइ छ।
महामन्त्री थापा र शर्माले पुसभित्रै नियमित महाधिवेशन नगर्ने हो भने अब विशेष महाधिवेशनको विकल्प नहुने अडान राख्दै आएका छन्।
सभापति शेरबहादुर देउवानिकट केही पदाधिकारी र केही पूर्व पदाधिकारीहरूले चुनावपछि वैशाखमा मात्रै महाधिवेशन गर्नुपर्ने अडान राखेका छन्।
यस्तो अवस्थामा कार्यवाहक सभापति खड्काले सर्वसहमतिमै केन्द्रीय समितिबाट निर्णयहरू लिने बताउँदै आएका छन्। सभापति देउवाले पनि महाधिवेशन कार्यतालिकाबारे नेताहरूसँग अनौपचारिक छलफल गरे पनि निकास निस्किएको छैन।
कांग्रेससमा फागुन २१ को चुनावअघि नियमित महाधिवेशन गर्ने कि विशेष महाधिवेशन भन्ने विवाद छ। कतिपय नेताले विशेष महाधिवेशनको विरोध गर्दै वैशाखमा नियमित महाधिवेशन गर्नुपर्ने अडान राखेका छन्।
यसैबीच ५४ प्रतिशत महाधिवेशन प्रतिनिधिहरूले विशेष महाधिवेशन माग गरेका छन्। नेता गुरूराज घिमिरेले कांग्रेस केन्द्रीय समिति बैठक डेढ महिनासम्म चलेर कीर्तिमान कायम राखे पनि महाधिवेशनबाट निर्णय गर्न नसकेको भन्दै आलोचना गरेका छन्।
विशेष महाधिवेशन पक्षधरहरूले विशेष महाधिवेशनका लागि मिति र स्थान तोक्न पनि माग गरिरहेका छन्।
सभापति देउवानिकट नेताहरूले भने नियमित महाधिवेशन नै गर्नुपर्ने भन्दै विभिन्न बैठक तथा भेला गर्दै आएका छन्।
-1746009348.jpg)
