मधेस प्रदेशको मुख्यमन्त्रीमा कांग्रेस संसदीय दलका नेता कृष्णप्रसाद यादवको दावी पेस भएको छ।
६ राजनीतिक दलका तर्फबाट उनलाई मुख्यमन्त्री बनाउने गरी दावी पेस गरेको हो।
प्रदेश प्रमुखको कार्यालयका निमित्त सचिव शत्रुधन यादवले ६ दलका तर्फबाट ७७ जना प्रदेश सभा सदस्यको समर्थनमा काँग्रेस दलका नेता कृष्णप्रसाद यादवलाई मुख्यमन्त्री बनाउने गरी दावी पेस भएको जानकारी दिए ।
उनलाई मधेस प्रदेश सभामा प्रतिनिधित्व गर्ने नेपाली कांग्रेस, जसपा नेपाल, जनमत पार्टी, नेकपा माओवादी केन्द्र, नेकपा एकीकृत समाजवादी र लोसपा नेपाल पार्टी गरी ६ राजनीतिक दलका तर्फबाट जम्मा ७७ जना प्रदेश सभा सदस्यको समर्थन रहेको दावी गरिएको छ।
तत्कालीन मुख्यमन्त्री सरोजकुमार यादवले राजीनामा दिएपछि १७ मंसिरमा प्रदेश प्रमुख डा. सुरेन्द्र लाभले नेपालको संविधानको धारा १६८ को उपधारा (२) बमोजिम सरकार गठनका लागि आह्वान गरेका थिए।
उक्त धारामा दुई वा दुई भन्दा बढी दलहरूको समर्थनमा बहुमतको सरकार बनाउन सकिने व्यवस्था छ।
मुख्यमन्त्रीमा दाबी पेस गरिसकेपछि सञ्चारकर्मीसँग प्रतिक्रिया दिँदै कृष्ण प्रसाद यादवले आफ्नो नेतृत्वमा सरकार बनेपछि प्रदेशमा विद्यमान बेथितिलाई थितिमा ल्याउने, सुशासन कायम गर्ने बताएका छन्।
प्रदेश गरिबी र अशिक्षाबाट गुज्रिरहेको बताउँदै उनले गरिबी र अशिक्षा हटाउन प्राथमिकतामा राखेर काम गर्ने बताए।
-1746009348.jpg)
