मधेस प्रदेशमा जनता समाजवादी पार्टी (नेपाल) का प्रमुख सचेतक राम अशिष राय यादव सभामुखमा निर्वाचित भएका छन्।
सभामुखमा निर्वाचित राम आशिष धनुषा निर्वाचन क्षेत्र नम्बर २ (ख) बाट दोस्रो पटक प्रत्यक्ष निर्वाचित प्रदेश सभा सदस्य हुन्।
सभामुख चयनका लागि डाकिएको प्रदेश सभा बैठकमा आइतबार ९६ जना प्रदेश सभा सदस्यको उपस्थिति रहेको थियो। जसमध्ये ७२ जनाले राम आशिषलाई मत दिएर सभामुखमा निर्वाचित गराएका हुन् भने उनको विपक्षमा २४ मत खसेको छ।
उपसभामुख बबिता कुमारी राउत ईशरले संविधानको धारा १८२ को उपधारा ३ बमोजिम तथा प्रदेश सभा कार्य सञ्चालन नियमावली २०७५ को नियम ७ को उपनियम ५ बमोजिम राम आशिष यादव सभामुखमा निर्वाचित भएको सदनलाई जानकारी दिइन्।
‘माननीय वीरेन्द्र प्रसाद सिंहले माननीय राम आशिष यादवलाई मधेश प्रदेश सभाको सभामुख पदमा निर्वाचित गरियोस् भनी राख्नुभएको प्रस्तावको पक्षमा अर्थात् हुन्छ भन्ने पक्षमा ७२ मत परेको र उक्त संख्या मधेस प्रदेश सभामा तत्काल कायम रहेको सम्पूर्ण सदस्य संख्या १०७ को बहुमत अर्थात् सदस्य संख्या ५४ भन्दा बढी भएकोले माननीय वीरेन्द्र प्रसाद सिंहको प्रस्ताव अनुसार माननीय राम आशिष यादव मधेस प्रदेश सभाको सभामुखमा निर्वाचित भएको घोषणा गर्दछु,’ उनले भनिन्।
उनलाई सत्तारूढ ७ दलीय गठनबन्धनको समर्थन थियो।
आइतबार बसेको गठबन्धनको बैठकले राम आशिषलाई उम्मेदवार बनाउने सहमति समेत गरेको थियो।
आइतबार बसेको प्रदेश सभा बैठकमा नेपाली कांग्रेसका प्रदेश सभा सदस्य वीरेन्द्र प्रसाद सिंहले प्रदेश सभा कार्य सञ्चालन नियमावली २०७५ नियम ७ को उपनियम ४ बमोजिम राम आशिषलाई सभामुख पदमा निर्वाचित गरियोस् भनेर प्रस्ताव पेस गरेका थिए भने नेकपा माओवादी केन्द्रका फकिरा महतोले समर्थन जनाएका थिए।
एमाले तर्फबाट प्रदेश सभा सदस्य शारदा थापाले त्रिलोकी प्रसादलाई सभामुख पदमा निर्वाचित गरियोस् भनेर प्रस्ताव राखेकी थिइन्। जयचन्द्र प्रसाद पटेलले उक्त प्रस्तावमा समर्थन जनाएका थिए।
तत्कालीन सभामुख रामचन्द्र मण्डललाई पदमुक्त गरिएपछि पद खाली थियो।
उपसभामुख बबिता कुमारीले नै सभामुखको हैसियतमा प्रदेश सभा सञ्चालन गर्दै आएकी थिइन्।
पदअनुकूलको आचरण नगरेको अभियोगमा निवर्तमान सभामुख रामचन्द्रलाई ७ दलीय गठबन्धनले मंसिर ३ गते दुई तिहाइ बहुमतबाट पदमुक्त गरेको थियो।
-1746009348.jpg)
