मधेस प्रदेश सरकारले मन्त्रिपरिषद् विस्तार गरेको छ।
मुख्यमन्त्री कृष्णप्रसाद यादवले चार वटा दलबाट थप ६ जना मन्त्री नियुक्त गरेका हुन्। योसँगै मधेस सरकारको मन्त्रिपरिषद्ले पूर्णता पाएको छ। मुख्यमन्त्री सहित १२ सदस्यीय मन्त्रिमण्डल गठन भएको छ।
उनले नेपाली कांग्रेस र जसपा नेपालबाट २/२ जना तथा जनमत र माओवादी केन्द्रबाट १/१ जना मन्त्री थपेका छन्।
नेपाली कांग्रेसबाट शंकर चौधरी र श्यामप्रसाद पटेल मन्त्री बनेका छन्। उनीहरूलाई क्रमशः वन तथा वातावरण मन्त्री र भूमि व्यवस्था कृषि तथा सहकारी मन्त्रालयको जिम्मेवारी दिइएको छ।
उनीहरू दुवै जना पर्सा जिल्लाबाट निर्वाचित प्रदेश सभा सदस्य हुन्।
शंकर पर्सा क्षेत्र नं ४ को (१) बाट दोस्रो पटक प्रदेश सभा सदस्यमा निर्वाचित भएका थिए भने श्याम प्रसाद पर्सा निर्वाचन क्षेत्र नं २ (१) बाट पहिलो पटक प्रदेश सभा सदस्यमा विजयी भएका थिए।
जसपा नेपालका राजकुमार गुप्तालाई भौतिक पूर्वाधार विकास मन्त्रालय र मनिषकुमार सुमनलाई श्रम तथा यातायात मन्त्रालयको मन्त्री बनाइएको छ।
जनमतबाट वसन्त कुशवाहा खेलकुद तथा समाज कल्याण र नेकपा माओवादी केन्द्रबाट फकिरा महत्व गृह सञ्चार तथा कानुनमन्त्री बनेका छन्।
नवनियुक्त मन्त्रीहरूले आज प्रदेश प्रमुख डा. सुरेन्द्र लाभसँग पद तथा गोपनीयताको शपथ लिएको प्रदेश प्रमुखको कार्यालयका निमित्त सचिव शत्रुध्न यादवले जानकारी दिए।
मंसिर १९ मा नेपाली कांग्रेसका संसदीय दलका नेता कृष्णप्रसाद यादव मुख्यमन्त्री नियुक्त भएका थिए। २१ मंसिरमा पद तथा गोपनीयताको शपथ लिएका उनले सोही दिन तीन जना मन्त्री नियुक्त गरेका थिए। जसमध्ये दुई जना बिना विभागीय थिए।
दोस्रो पटक २९ मंसिरमा मन्त्रिपरिषद् विस्तार गर्दा उनले थप दुई जना मन्त्री नियुक्त गरे। बिना विभागीय मन्त्रीहरूलाई समेत मन्त्रालयको जिम्मेवारी तोकेका थिए।
-1746009348.jpg)
