पर्सा क्षेत्र नं ३ बाट राष्ट्रिय स्वतन्त्र पार्टीका ५७ वर्षीय रामाकान्त चौरसिया प्रतिनिधिसभा सदस्यमा निर्वाचित भएका छन्। अनुभवी राजनीतिज्ञ नेपाली कांग्रेसका ६८ वर्षीय सुरेन्द्र प्रसाद चौधरीलाई पराजित गर्दै उनले सांसद पद हासिल गरेका हुन्।
पहिलो पटक संसदीय निर्वाचनमा होमिएका रामाकान्तले २९ हजार ६७९ मत पाएर निर्वाचित भए।
निकटतम प्रतिस्पर्धी सुरेन्द्रको १६ हजार ३ सय ६६ मत आयो।
नेपाली कांग्रेसका केन्द्रीय सदस्य सुरेन्द्र ४ पटक सांसद र दुई पटक मन्त्री भएका व्यक्ति हुन्।
विज्ञान तथा प्रविधि मन्त्रालय र वाणिज्य तथा आपूर्ति मन्त्रालयको जिम्मेवारी सम्हालिसकेका सुरेन्द्र वि.स. २०४८ सालयता निरन्तर चुनाव लडिरहेका छन्।
०७९ को निर्वाचनमा पर्सा ३ बाट नेकपा एमालेका राजकुमार गुप्ता निर्वाचित हुँदा सुरेन्द्र १६७ मतान्तरले दोस्रो भए।
पोखराको लिचीबारी भ्रष्टाचार प्रकरणमा दोषी ठहर भएपछि राजकुमार थुनामा छन्। उनको विकल्पमा एमालेले ४९ वर्षीय रुपेश कुमार पाण्डेयलाई उठाएको थियो। उनी ११ हजार ९१४ मत सहित तेस्रो स्थानमा छन्।
नेकपाका उम्मेदवार ४९ वर्षीय छोटेलाल २ हजार १३७ मत सहित चौथो स्थानमा रहे। निर्वाचनमा पराजित भएपछि छोटेलाले पार्टी परित्याग गरेको घोषणा गरिसकेका छन्।
‘नेपाली कम्युनिस्ट पार्टी परित्याग गर्दै नयाँ युगान्तकारी परिवर्तनलाई स्वागत गर्दछु,’ उनले सामाजिक सञ्जाल फेसबुकमा लेखेका छन्।
०७९ मा रास्वपाले अशोक कँडेललाई पर्सा–३ मा उम्मेदवार बनाएको थियो। उनले ९२३ मत ल्याएका थिए। यसपटक बालेनको प्रवेशपछि रास्वपामा देखिएको देशव्यापी लहरको लाभ रामाकान्तले लिए।
कांग्रेस छोडेर रास्वपा रोजे, सांसद बने
रामाकान्त वीरगञ्ज महानगरपालिका १९ विन्दवासिनी, वर्वागोगमा जन्मिएका हुन्। हाल उनको बसोबास वीरगञ्ज महानगरपालिका १० मा छ। उनले भारतबाट दश कक्षासम्मको अध्ययन पूरा गरेका छन्। भारत रक्सौलमा आइएस्सी अध्ययनका लागि भर्ना गरेको भए पनि उनले अध्ययनलाई निरन्तरता दिन सकेनन्।
खेती किसानीसँगै रामाकान्तको बुवा गया प्रसाद चौरसियाले वीरगञ्जमा धान चामलको कारोबार गर्न सुरू गरेका थिए। उनले १३ वर्षको उमेरदेखि नै बुवालाई सघाउन थाले। ०४२ सालतिर उनीहरूले हार्डवेयर व्यवसाय सञ्चालनमा ल्याए।
काका मुकेश चौरसियासँग मिलेर रामाकान्तले ०५६ सालदेखि मोना कन्स्ट्रक्सन कम्पनी सञ्चालनमा ल्याए। मुकेश नेपाली कांग्रेसका तर्फबाट वीरगञ्ज महानगरपालिका वडा नं १९ मा वडा अध्यक्ष छन्।
रामाकान्त ०४६ सालदेखि नै कांग्रेससँग नजिकिएका हुन्। कांग्रेसका नेताहरू आत्मराम ओझा, रामचन्द्र कुशवाहा भूमिगत हुँदा रक्सौलमा उनीहरूसँग भेट भएको रामाकान्त बताउँछन्। तर संगठित सदस्यता भने उनले पछि मात्रै लिए। उनले कांग्रेसमा प्रदेश समिति सदस्य एवं निर्माण तथा यातायात विभाग प्रदेश संयोजकको जिम्मेवारी निर्वाह गरे।
त्यसबाहेक उनले निर्माण व्यवसायी संघ पर्साको अध्यक्ष भएर ९ वर्षसम्म नेतृत्व गरे। निर्माण व्यवसायी महासंघको सदस्य समेत बने। चौरसिया (बरई) सेवा समिति, पर्साको ६ वर्ष नेतृत्व गरेको अनुभव उनीसँग छ। उनकै पहलमा वीरगञ्ज १० मा चौरसिया धर्मशाला निर्माण भएको छ। धर्मशालाका लागि उनले डेढ कठ्ठा जग्गा दान गरेका थिए।
रामाकान्तले सामाजिक कार्यहरूमा समेत योगदान दिँदै आएका छन्। विन्दवासिनीको तत्कालीन उपस्वास्थ्य चौकी भवनमा दुई वटा कोठा निर्माण गरिदिएका थिए। पछि स्वास्थ्य संस्थाको भवन बनाउन जापानबाट सहयोग आउने भएपछि रामाकान्तले ५ कठ्ठा जग्गा किनेर दिएका थिए।
गाउँ समाजमा मठ मन्दिर निर्माणमा उनले निरन्तर सहयोग गर्दै आएका छन्। राम जन्मभूमि भारतको अयोध्यामा समेत अतिथि सदन र मन्दिर जिर्णोद्धार गराएको उनी बताउँछन्।
भदौ २३ र २४ को जेन्जी आन्दोलन पछि मुलुकमा फागुन २१ गते निर्वाचनको मिति घोषणा भयो। परिवर्तनको लहर चलेको महसुस भएपछि आफूले नेपाली कांग्रेस ल्यागेर रास्वपामा प्रवेश गरेको रामाकान्त बताउँछन्।
‘बालबच्चा पढाइ सकेर आइसकेका छन्, निर्माण व्यवसाय सम्हाल्न सक्छन्,’ उनले भने, ‘देश विकासका लागि केही गर्न सकिन्छ कि भनेर संसदीय राजनीतिमा आएको हुँ।’
रास्वपाले उनलाई पर्सा क्षेत्र नं ३ बाट प्रतिनिधिसभा सदस्य उम्मेदवार बनायो। मधेसमा देखिएको ‘बालेन क्रेज’ उनलाई फलदायी बन्यो, मतदाताले सबभन्दा बढी मत दिएर उनलाई संसदमा पुर्याएका छन्।
‘काम गर्ने मान्छे हो, भाषण गर्न खासै आउँदैन, मतदाता समक्ष खासै वाचा गरेको छैन। क्षेत्र घुम्दा शिक्षा, कृषि, शिक्षा लगायत हरेक क्षेत्रमा विकास गर्नुपर्ने देखेको छु। गाउँमा ३० वर्ष अघिको जस्तै सडक छ,’ उनले भने, ‘जनतामा परिवर्तन हुन्छ भन्ने आश छ, पहिलेको जसरी चलेर काम छैन, परिवर्तनको अनुभूति हुनेगरी काम गर्छु।’
क्षेत्र नं ३ को उत्तरी क्षेत्रमा सयौं जनता अझै पनि ऐलानी जमिनमा बसोबास गरिरहेको बताउँदै उनले जनतालाई जमिन दिलाउन सक्दो प्रयास गर्ने बताए।
-1773146057.jpg)
-1746009348.jpg)
