कूटनीतिक नियोगको गाडीमा थर्मल-गन विक्री गर्दै हिँडेको आरोपमा शंकर ग्रुपका मालिक सुलभ अग्रवाल पक्राउ परेका छन्।
तीन हजार मूल्य पर्ने थर्मल-गनलाई १५ हजार रुपैयाँमा बेचेको आरोपमा अग्रवाललाई मंगलबार महानगरीय प्रहरी अपराध महाशाखाको टोलीले पक्राउ गरेको हो।
अग्रवालले कालोबजारी गरेकोले पक्राउ गरिएको महाशाखाका प्रमुख एसएसपी सहकुल थापाले सेतोपाटीलाई बताए।
उनको निलो नम्बर प्लेटको गाडीबाट ६६ थान थर्मल-गन बरामद भएको उनको भनाइ छ।
‘अग्रवालले निलो नम्बर प्लेटकै गाडी प्रयोग गरेर सामान विक्री गर्दै आएका थिए,’ एसएसपी थापाले भने।
अग्रवाल किर्गिस्तानका लागि नेपालका अवैतनिक वाणिज्यदूत हुन्। साथै उनी जगदम्बा स्टिल्स र सिमेन्टका सञ्चालक पनि हुन्।
