सुनसरीको इटहरी उपमाहानगरपालिका ९ मा रहेको रगंशालामा १ सय बेडको आइसोलेसन वार्डको निर्माण कार्य आजदेखि सुरू भएको छ।
करिब १० दिन भित्रमा काम सम्पन्न गरी सञ्चालनमा ल्याउने गरी काम थालिएको इटहरी उपमहानगरपालिकाका मेयर द्वारिकलाल चौधरीलले जानकारी दिए।
आफूसहित जिल्ला प्रशासन कार्यालय सुनसरीका प्रमुख जिल्ला अधिकारी फणिन्द्र मणी पोखरेल तथा सुरक्षा निकायका पदाधिकारीहरूको बिहीबारको बैठकले सुनसरीका विभिन्न ३ स्थानमा आइसोलेसन वार्ड बनाउने निर्णय गरेको उनले बताए।
'इटहरी, इनरूवा,दुहबी तथा अन्य आसपासका पालिकामा दिनप्रतिदिन समुदायमा कोरोना बढ्दै गएपछि कोरोना संक्रमित राख्न मिल्ने गरी आइसोलेसन बेड बनाउन लागिएको हो। दशदिभित्र सञ्चालनमै आउने गरी बनाउन लागेका हौं,' मेयर चौधरीले भने।
इटहरीलगायत आसपासका पालिकामा पनि आइसोलेसन बेड बनाउन लागिएको छ। जसका लागि सम्बन्धित पालिकाले ३/३ लाख लगानी र प्रदेश सरकारको थप सहयोग पनि भएको सुनसरी प्रमुख जिल्ला अधिकारी पोखरेलले बताए।
इटहरी उपमहानगरको रगंशालामा सय बेड, दुहबी नगरपालिकाको अरूण वनस्पति उद्योगमा ५० बेड र दुहबीकै रमपम उघोग अगाडिको खाली गोदाममा १ सय ५० जना अट्ने क्षमताको आइसोलेसन वार्ड बनाउने समेत निर्णय भएको छ।