ललितपुर महानगरपालिकाले मापदण्डविपरित घरभन्दा बाहिर राखिएका ट्रस हटाउन सुरू गरेको छ। हावाहुरी आउँदा ट्रस खसेर दुर्घटना हुनसक्ने भन्दै महानगरले टस हटाउन आग्रह गर्दै सूचना निकालेको थियो।
सूचनासँगै हरेक घर-घरमा माइकिङ गर्दै पत्रसमेत पठाएर ट्रस हटाउन आग्रह गरेको थियो।
महानगरपालिकाले यसरी सूचना दिएर पनि अटेर गर्ने घरको ट्रस मंगलबारबाट निकाल्न सुरू गरेको महानगरपालिकाले जानकारी दिएको छ।
‘हामीले ट्रस राख्ने घर धनी व व्यक्तिलाई म्याद दिएर हटाउन आग्रह गर्दै पत्र समेत पठाएका थियौं। महानगरको आग्रहलाई वेवास्था गरेपछि बाध्य भएर हामीले हटाउन सुरू गरेका हौ’, महानगरका नगर प्रहरी प्रमुख सिताराम हाथेछुले भने।
उनले सबै ठाँउमा माईकिङबाट केही दिन अगाडि नै जानकारी गराएर नगरको सौन्दर्यमा ह्रास आउने गरि जथाभावी राखिएको ट्रस हटाउन आग्रह गरेको बताए।
‘हावा हुरीबतास आयो भने सेड खसेर दुर्घटना भईरहेको ।छ। आगामी दिनमा यस्ता दुर्घटना नहोस् भनेर हामीले हटाउन सुरू गरेका हौ’, उनले भने।
ट्रस राखेपछि पसलका सामानहरू अन्य पैदल यात्रुलाई बाधा पर्ने गरी बाहिर राख्ने क्रम बढेको भन्दै त्यस्तो रोक्नका लागि समेत यो निर्णय लिएको उनले बताए।
स्थायी संरचना नभत्काउने भन्दै उनले पछि पसल बिस्तार गर्नका लागि मापदण्ड विपरित राखिएका ट्रस मात्र हटाइएको उनले बताए। ‘हामी स्थायी रूपमा बनेका संरचना हटाउँदैनौ। नक्सा अनुसार घर बनाईसके पछि फेरि थप गरिएको सेडहरू मात्र निकालिरहेका छौ’, उनले भने,‘यसबाट सहरको सौन्दर्य सफा देखिने र पैदल यात्रु निष्फ्रिक्री हिड्न सक्नेछन्।’
घरधनीले भाडामा दिएपछि पसलेले आफूखुसी यस्तो राख्ने गरेको भन्दै महानगरको कामलाई साथ दिएका छन्।
‘घर धनीले पसल भाडामा दिए पनि पसल ठूलो पार्ने र होर्डिङ बोर्ड राख्नका लागि भाडामा लिएका व्यक्तिले नै उक्त ट्रस बनाएको देखियो, घर धनीले पनि आफ्नो घरको स्वरूप बिगारेको भन्दै गुनासा गरेका छन्’, उनले भने,‘यसैलाई हटाउन पनि हामीले यस्तो निर्णय गरेका हौ।
हाथेछुका अनुसार पत्र पाएपछि ६० प्रतिशतले आफैं निकालेका छन्। केहीले थप समय मागेका छन्।
महानगरले यसअघि ललितपुर नगर प्रहरीले महानगरभित्रका विभिन्न स्थानमा अवैधानिक रूपले पार्किङ गर्ने सवारीलाई कारबाही गर्न सुरू गरिसकेको छ।
नगर प्रहरीले महानगरीय ट्राफिक प्रहरी महाशाखासँगको सहकार्यमा ललितपुर महानगर भित्रका पुल्चोक, मंगलबजार, लगनखेल, जावलाखेल, मानभवन, कुमारीपाटी, कुपण्डोल, ग्वार्को, सातदोबाटोलगायतका फुटपाथ क्षेत्रमा अवैध रूपमा पार्किङ गर्ने मोटरसाइकल तथा स्कुटर र चार पाङ्ग्रे सवारी नियन्त्रणमा लिएर कारवाही प्रक्रिया सुरू गरेको हो।
‘नो पार्किङ’ र फुटपाथमा पार्किङ गरि पैदल यात्रु र अन्य सवारीलाई असर गरेका मोटरसाइकल तथा स्कुटर र चार पङ्ग्रे सवारीलाई कारबाही प्रक्रिया अगाडि बढाएको नगर प्रहरी प्रमुख सिताराम हाथेछुले सेतोपाटीलाई जानकारी दिए।
जथाभावी पार्किङ गरेर छोडेका सवारी साधनलाई कारबाही स्वरूप ‘ह्वील लक’ गर्ने, उठाएर ल्याउने र जरीवाना तिराउने काम सुरू गरिएको उनले बताए।
उपत्यकामा हुने अत्यधिक जामलाई व्यवस्थित पार्न र अनाधिकृत पार्किङलाई निरूत्साहित गर्न उक्त सवारी साधनलाई कारबाही गर्दै सचेत गराइएको हाथेँछुले बताए।
-1746009348.jpg)
