दाङको तुलसीपुरबाट सल्यानतर्फ जाँदै गरेको ट्रक दुर्घटनामा परेको छ।
बुधबार बेलुकी ६ बजेर १० मिनेट जाँदा रा १ ख २५०१ नम्बरको ट्रक तुलसीपुर उपमहानगरपालिका–३ स्थित राम्री भीरबाट खसेको इलाका प्रहरी कार्यालय तुलसीपुरका प्रवक्ता प्रहरी निरीक्षक नवचन्द्र मल्लले जानकारी दिए।
उनका अनुसार ट्रक झन्डै डेढ सय मिटर तल खसेको छ।
ट्रकधनी तुलसीपुर-३ का टीकाराम भुसाल र चालक नारायण सार्की मात्रै सवार थिए। दुवै जना सकुशल रहेको उनले बताए।
‘उकालोमा चढ्दै गरेको ट्रकको पट्टा एकाएक भाँचिएपछि ट्रक ब्याक भएको रहेछ,’ मल्लले भने, ‘भित्तामा ठोक्काएर जोगाउने प्रयास गर्दा सम्भव नभएपछि दुवै हाम फाली ज्यान जोगाएका रहेछन्।’
तुलसीपुरबाट तरकारी ल्याउन भनेर सल्यानको कपुरकोटतर्फ जाँदै गरेको ट्रक दुर्घटनामा परेको हो।
