वीरगञ्जस्थित साउथ सिटी हिमाल अस्पतालमा बुधबार रौतहटबाट एक गर्भवती महिला उपचारका लागि ल्याइयो।
रौतहटको दुर्गाभगवती गाउँपालिका २ की ३० वर्षीया रूबी खातुन तेस्रो सन्तान जन्माउने तरखरमा थिइन्। तर बच्चा नजन्माउँदै उनको मृत्यु भयो।
बुधबार साँझ साढे ६ बजे अस्पतालले उनको मृत्यु भएको घोषणा गरेको थियो। उनका आफन्त र गाउँलेले उपचारमा लापरबाही भएको आरोप लगाउँदै होहल्ला गरे। तनाव बढेपछि बुधबार बेलुकादेखि नै अस्पताल परिसरमा ठूलो संख्यामा प्रहरी परिचालन गरियो।
बिहीबार अस्पतालमा दुर्गाभगवती पालिका वडा नम्बर २ का अध्यक्ष सुरेश चौधरी, पूर्व गाउँपालिका अध्यक्ष अरुण साह, पीडितका आफन्त लगायतको टोली अस्पताल प्रशासनसँग वार्तामा बस्यो। मृतक परिवारलाई ५ लाख रूपैयाँ दिने सहमतिपछि आफन्तले रूबीको शव बुझेर लगेका छन्।
अनौपचारिक कुराकानीमा मृतकका आफन्त र प्रहरी कर्मचारीले मृतकका परिवारलाई ५ लाख रुपैयाँ दिने र अस्पतालमा लागेको खर्च मिनाहा गर्ने सहमति भएको बताएका छन्। तर औपचारिक प्रतिक्रिया दिन भने उनीहरू तयार भएनन्।
अस्पताल प्रशासनले पैसा लेनदेन गर्ने सहमति नभएको दाबी गरेको छ। अस्पताल प्रशासन प्रमुख राकेश यादवले बाटो खर्च दिने मात्रै सहमति भएको बताए।
‘गाउँ समाजको हिसाबले बाटो खर्च दिने सहमति भयो, हामीले गाडीहरूको व्यवस्था गरिदियौं,’ उनले भने, ‘निःशुल्क उपचार गर्ने, क्षतिपूर्ति पनि तिर्ने गर्न सकिँदैन। बरू कानुनी प्रक्रियामा जानुस् भनेर अनुरोध गरेका थियौं।’
प्रहरी अधिकारीले रकम लेनदेन गर्ने गरी सहमति भएकोबारे अनभिज्ञता प्रकट गरेका छन्।
वडा प्रहरी कार्यालय विर्ता र श्रीपुरका प्रहरी निरीक्षकहरू शव आफन्तले बुझेर लैजाँदासम्म अस्पताल परिसरमै थिए। विर्ताका प्रहरी निरीक्षक निरोज चौलागाईंले अस्पतालमा शान्ति सुरक्षा कायम गराउन मात्रै आफूहरू खटिएको जानकारी दिए।
‘अस्पतालमा तोडफोड हुन लागेको सूचना पाएपछि बुधबार रातिदेखि नै सुरक्षाकर्मी परिचालन गरिएको हो। बिहीबार भएको एक चरणको वार्तामा हामी पनि थियौं, हामीसँग छुट्टिएपछि उनीहरू मात्रै वार्तामा बसेका थिए। केके सहमति भयो, हामीलाई थाहा छैन,’ उनले भने।
प्रहरीको रोहबरमा भएको वार्तामा अस्पताल प्रशासनले उपचारमा लापरबाही नभएको भनेर मृतकका आफन्त र जनप्रतिनिधिहरूलाई बुझाउन खोजेको उनको भनाइ छ। शव निकालेर लैजाँदा प्रहरीलाई खबर समेत नगरेको दाबी प्रहरी निरीक्षक चौलागाईंको छ।
वडा अध्यक्ष चौधरीले पीडित पक्ष अस्पतालले उपचार खर्च दिने भनेपछि शव बुझ्न तयार भएको बताए। केके विषयमा सम्झौता भएको हो भनेर कागजात माग गर्दा अस्पताल प्रशासनले यो समाचार तयार पार्दासम्म दिएको छैन।
उपचारमा लापरबाही भएको परिवारजनको आरोप
जनप्रतिनिधि, आफन्तजन र अस्पताल प्रशासनबीच वार्ता चलिरहँदा रूबीकी सासू सगिरा खातुन भावविह्वल अवस्थामा अस्पताल परिसरमै थिइन्।
शव लैजान लागेको थाहा पाएपछि उनी रूँदै अस्पताल बाहिर निस्किइन्। बुहारीको शव राखिएको एम्बुलेन्समा छिर्न जोडबल गर्दा बेहोस भएर उनी भुइँमा बजारिइन्। अन्य आफन्तले अनुहारमा पानी छ्यापेर होसमा ल्याए। उनी शव भएको एम्बुलेन्समै जान जिद्दी गरिरहेकी थिइन्। आफन्त र गाउँलेले सम्झाई बुझाई गरेर अर्को गाडीमा हालेर लगेका छन्।
त्यसअघि सेतोपाटीसँगको कुराकानीमा उनले अस्पतालको लापरबाहीले बुहारी गुमाएको गुनासो गरेकी थिइन्। चिकित्सकलाई शल्यक्रिया मार्फत बच्चा निकाल्न अनुरोध गरे पनि अटेर गरेका कारण बुहारीको ज्यान गएको उनको भनाइ छ।
‘अपरेसन गरेर बच्चा निकालिदेऊ, जे जति खर्च लाग्छ दिन्छु भनेको हो, तर सुनेनन्,’ उनले भनिन्, ‘नर्मल बच्चा गराउँछौं, केही हुन्न भनिरहे। झोलाभरि औषधि मगाए। अन्तिम सुइ दिएपछि बुहारीलाई गाह्रो भयो, अनि संसार छोडेर गइन्।’
बुहारीको मृत्युपछि ५ वर्षीय नाति र ६ वर्षीया नातिनीको बिजोग हुने भन्दै उनी चिन्तित थिइन्। उनीहरू दुवै नर्मल डेलिभरीबाट जन्मेका थिए।
लापरबाही नभएको अस्पतालको दाबी
अस्पतालले भने उपचारमा लापरबाही नभएको दाबी गरेको छ।
यसअघि उपचार गर्न आएका एक बिरामीका आफन्तको सिफारिसमा रूबीलाई अस्पतालमा ल्याइएको थियो। अस्पतालका निर्देशक डा. सन्देश यादवका अनुसार उनको नियमित गर्भजाँच गरिएको थिएन र गर्भवतीले सेवन गर्नुपर्ने आइरन चक्की लगायतका औषधि खाएकी थिइनन्। ३४ हप्तामा एकपटक भारतमा एक पटक जाँच गराएको र क्याल्सियम भिटामिन सेवन गरेको हिस्ट्री थियो।
प्रसूति विभाग प्रमुख प्रसूति रोग विशेषज्ञ डा. प्रिती यादवले बिहान ८ बजे पहिलोपटक चेकजाँच गरेकी थिइन्। नर्मल डेलिभरी गराउन सकिन्छ भन्ने निष्कर्षमा उनी पुगिन्। १० बजे दोस्रो पटक जाँच गर्दा पनि नर्मल नै हुन्छ, प्रगति हुन्छ भनेर उनले अस्पताल प्रशासन र बिरामीका आफन्तलाई जानकारी गराएकी थिइन्।
दिउँसो १ बजेतिर हेर्दा नर्मल डेलिभरीका लागि आवश्यक पर्ने घर नखुलेको पाएपछि बेथा लाग्ने औषधि चलाइएको थियो । त्यसपछि उनलाई बेथा लाग्न सुरू भयो। घर खुल्न थालेपछि उनलाई लेवर रूममा लगियो। त्यहाँ उनी अचानक बेहोस भइन्। अक्सिजन र ब्लड प्रेसर दुवै घट्यो।
एनेस्थेसिया डाक्टर समेत रहेका निर्देशक सन्देशले भने, ‘अक्सिजन र ब्लड प्रेसर बढाउने औषधि चलायौं। झण्डै डेढ घण्टा सिपिआर गर्यौं तर पनि बचाउन सकेनौं,’ बच्चालाई शल्यक्रिया गरेर निकाल्दा बाँच्ने सम्भावना १/२ प्रतिशत रहन्छ भनेर आग्रह गर्दा रूबीका परिवारजनले सहमति नदिएको उनको भनाइ छ।
-1746009348.jpg)
