वीरगन्जका सुनचाँदी व्यवसायी अभिषेक सर्राफको घरबाट दुई किलो सुन तथा सुनका गहना बरामद भएको छ। करिब ११ किलो चाँदी र चाँदीका गरगहना पनि बरामद गरिएको छ।
सुनचाँदी व्यवसायी संघ, पर्साले उपलब्ध गराएको तथ्यांक अनुसार ग्राहकले बन्धकी राखेको सुन १ किलो ९९५ ग्राम, चाँदी ६ किलो ९०८ ग्राम, घरमा रहेको सुनका गरगहना २८८ ग्राम १०० मिलिग्राम, ३ किलो ९२६ ग्राम चाँदीका गरगहना, सुनजस्तो देखिने सामान ६३०.९५० ग्राम, चाँदीजस्तो देखिने सामान ५५५.८४० ग्राम बरामद गरेर राजस्वले लगेको छ।
त्यसैगरी नगद नेपाली रूपैयाँ एक लाख ९ हजार र भारतीय रूपैयाँ ४१ हजार ६० पनि राजस्वले छापा मार्ने क्रममा फेला पारेको छ।
सोमबार राजस्व अनुसन्धान कार्यालय, पथलैयाले सुनचाँदी व्यवसायी अभिषेकको घरमा छापा मारेको थियो। राजस्व चुहावटको विशेष सूचनाको आधारमा छापा मारिएको राजस्वले बताएको छ।
राजस्व अनुसन्धान कार्यालयले प्राप्त सूचनाको आधारमा राजस्व चुहावट नियन्त्रणका लागि खानतलासी गर्न र आवश्यक प्रमाण संकलन गर्ने अधिकार राख्छ। अभिषेकविरूद्ध राजस्व चुहावट (अनुसन्धान तथा नियन्त्रण) ऐन, २०५२ बमोजिम कारबाही प्रक्रिया अघि बढाइने छ।
राजस्वले बरामद गरेको सुनचाँदी लगायतका सामग्री सुनचाँदी व्यवसायी संघ, पर्साको कार्यालयमा तौलेर लगिएको थियो।
संघ पर्साका अध्यक्ष भुलन सर्राफले जेनजी आन्दोलनका बेला दुर्घटना नहोस् भनेर घरमा जोगाएर राखिएको सामग्री राजस्वले बरामद गरेर लगेको बताए।
'जेनजी आन्दोलनका बेला लुटपाट हुने डरले व्यवसायीले पसलबाट सामान लुकाएर घरमा राखेका रहेछन्। ग्राहकले कसैले मर्मतका लागि, कसैले अर्डर दिएका, कसैले सफाइका लागि दिएका सामान त्यसमा छन्। सबैमा नाम पनि लेखिएको रहेछ,' उनले भने, 'अलिकति सुनचाँदी छ, त्यसको बिलबिजक उहाँसँग छँदैछ।'
कानुनी प्रक्रिया अनुसार बिलबिजक हेरेर सामान फिर्ता दिन र गैरकानुनी भए आवश्यक कारबाही प्रक्रिया अघि बढाउन राजस्वसँग आग्रह गरिएको उनले बताए।
अभिषेकलाई राजस्वले नियन्त्रणमा लिन खोजे पनि व्यवसायीको विरोधपछि संघको जिम्मामा छोडिएको छ।
'मुचुल्का उठाएपछि सामान र मानिस दुवै लिएर जान्छु भनेका थिए। हामीले आफैले उपस्थित गराउने अडान लिएर लैजान दिएनौं। अभिषेकलाई लगेर उपस्थित गराएर ल्याएको छु,' अध्यक्ष भुलनले भने।
राजस्वले बयानका लागि अभिषेकलाई बुधबार पनि उपस्थित गराउन भनेको उनले बताए।
राजस्वले भने अनुसन्धान जारी रहेsfले थप विवरण खुलाउन नमिल्ने बताएको छ। कार्यालयका सूचना अधिकारी पुष्पराज कोइरालाले 'वीरगन्ज अपरेसन' को अनुसन्धान जारी रहेको बताए।
'सामग्री बरामद भएर आएको छ, व्यवसायीहरूले केही सक्कली केही नक्कली भनेर दाबी गरिरहेका छन्। उनीहरूको दाबीका आधारमा हामीले बोल्न मिल्दैन। राति अबेर मात्रै अपरेसन सिद्धिएको हो। सामग्रीबारे आधिकारिक निकायबाट परीक्षणको क्रम जारी छ,' उनले भने।
बरामद सुनचाँदी तथा गरगहना सक्कली वा नक्कली छुट्ट्याएर, सुनचाँदी व्यवसायी संघ, पर्साले प्रमाणित गरेर पत्र पठाइसकेपछि मात्र वास्तविकता पत्ता लाग्ने उनको भनाइ छ।
1635339834.jpeg)
-1756794700.JPG)
-1746009348.jpg)
