सर्लाहीको सागरनाथ वन विकास परियोजनाका वन संरक्षक ५२ वर्षीय रामेश्वर महतो कोइरीको पुस १९ गते हत्या भयो।
बञ्चरोले घाँटी काटेर उनको वीभत्स हत्या गरिएको थियो।
वन संरक्षणका क्रममा मृत्युवरण गरेका कारण उनलाई संरक्षण सहिद घोषणा गर्नुपर्ने माग सरोकारवालाले अघि सारेका छन्।
ईश्वरपुर नगरपालिका वडा नं. २ राइटरखोर टोलका रामेश्वर सागरनाथ वन विकास परियोजनामा ज्यालादारीमा चौकीदार पदमा कार्यरत थिए।
पारिवारिक स्रोतका अनुसार वन क्षेत्रमा कसैले रूख काटेको सुनेपछि बिहान ५ बजे उनी घरबाट निस्केका थिए। साइकलमा निस्केका उनी भक्तिपुरको प्लट नं.१० को जंगलमा एक्लै गस्ती गर्न पुगेका थिए।
बिहान गस्तीमा गएका उनी खाना खानका लागि पनि घर फर्किएनन्। घर परिवारका सदस्यले रामेश्वरलाई पटक पटक फोन सम्पर्क गरे। सुरूमा फोन लागे पनि उठेन। केही समयपछि फोन स्वीच अफ भयो।
परिवारका सदस्य आत्तिएर खोज तलास सुरू गरे। परियोजना व्यवस्थापनलाई पनि जानकारी गराए। खोज्दै जाने क्रममा प्लट नं.१० कै जंगलमा रहेको वनमाराको झाडीमा शव भेटियो। शरीर रगताम्य अवस्थामा थियो तर टाउको थिएन। घटनाबारे शनिबार साढे २ बजेतिर मात्रै जानकारी पाएको प्रहरी अधिकारीहरू बताउँछन्।
जिल्ला प्रहरी कार्यालय सर्लाही र ईलाका प्रहरी कार्यालय केशरगंज सर्लाहीबाट प्रहरी टोली खटियो। घटनास्थल वरपर सूक्ष्म तरिकाले अवलोकन गर्दै जाँदा घटनास्थलबाट ७७ मिटर पूर्व कालो रंगको एक जोर चप्पल फेला पर्यो।
शव नजिकै रगत लागेको बञ्चरो फेला परेको थियो। प्रहरीले सोधपुछका क्रममा स्थानीयले चप्पल ईश्वरपुर न.पा. वडा नं. २ राईटरखोर टोल कै रामवली महतोकै रहेको पुष्टि गरे। जंगलमा काठ दाउरा काटन जाँदा रामवलीले सोही बञ्चरो बोक्ने गरेका थिए भनेर जानकारी दिए।
प्रहरी रामवलीलाई खोज्दै घर पुग्यो। उनी घर अगाडि नै भेटिए। घर खानतलासी गर्दा रामवली सुत्ने कोठाभित्र काठको हेङ्गरमा ज्याकेट र जिन्स पाइन्ट फेला पर्यो। दुवै कपडाको अगाडिको भागमा रगतको छिटा जस्तो देखिने रातो पदार्थ लागेको दागहरू देखिन्थ्यो।
प्रहरीले रामवलीलाई पक्राउ गर्नुको साथै कपडाहरू बरामद गर्यो। रामवली लागुऔषध गाजाको नसामा रहेको अवस्थामा पक्राउ गरिएको प्रहरी स्रोतले जनाएको छ।
घटनाबारे अनुसन्धानका लागि धनुषाबाट तालिमप्राप्त कुकुर झिकाइएको थियो।
टाउको घटनास्थलदेखि १ सय मिटर उत्तरतर्फ झाडीमा भोलिपल्ट पुस २० आइतबार मध्याह्न १२ः४५ मा टाउको भेटिएको प्रहरी निरीक्षक नितेश कुमार सिंह बताउँछन्।
दाउरा बरामद गरेको रिसइबीका कारण हत्या
घटनाको अनुसन्धान गरिरहेका अधिकृतले दिएको जानकारी अनुसार रामवली र रामेश्वर पटक पटक आमनेसामने भएका थिए। रामवलीले धेरै पटक जंगलमा प्रवेश गरी टिक र मसलाको रूख काटी चोरी गरेका रहेछन्।
रामेश्वरले फेला पारी पटक पटक सम्झाइबुझाइ गरेका थिए। एक पटक काठ काट्दै गर्ने क्रममा रामवलीलाई चौकीदार रामेश्वरले पक्राउ गर्न खोजेका थिए। उनीहरूबीच जङ्गलभित्रै लछारपछार भएको थियो। त्यतिबेला रामवली भाग्न सफल भएका थिए।
घटना हुनुभन्दा ४/५ दिन अघि रामवलीले परियोजनाको जंगलबाट टिकको काठ काटी चोरी गरी दाउरा चिरी बेच्नको लागि राखेको सूचना रामेश्वरले पाएका थिए। रामेश्वरले उक्त दाउरा उठाइ लगेका थिए। त्यतिबेला रामवलीले रामेश्वर महतोलाई मार्छु काट्छु भनी धम्की दिएको तथ्य अनुसन्धानका क्रममा खुलेको जिल्ला प्रहरी कार्यालय सर्लाहीका सूचना अधिकारी प्रहरी नायब उपरीक्षक सरोज राईले जानकारी दिए।
‘चप्पल, बञ्चरो र रगतको टाटा लागेको कपडा रामवलीकै भएको आधारमा उनलाई पक्राउ गरेका हौं,’ उनले भने, ‘पुरानो रिसइबीको कारण हत्या भएको देखिन्छ।’
रगत लागेको कपडा रामवलीकै हो कि होइन? भन्ने यकिन गर्नका लागि केन्द्रीय विधि विज्ञान प्रयोगशाला, सामाखुशीमा परीक्षणका लागि पठाइएको प्रहरीले जनाएको छ।
प्रहरीले हालसम्मको अनुसन्धानबाट घटनामा रामवलीको मात्रै संलग्नता रहेको तथ्य पत्ता लागेको जनाएको छ।
‘घटनास्थलमा शवलाई एक ठाउँबाट अर्को ठाउँ सार्न घिसारिएको देखिन्छ। त्यसले घटनामा धेरै व्यक्तिको संलग्नता छ भन्ने शंका गर्ने ठाउँ दिँदैन,’ डिएसपी सरोज भन्छन्।
रामवलीलाई पुस १९ गते जरूरी पक्राउ पुर्जी दिई पक्राउ गरिएको थियो।
सर्लाही जिल्ला अदालतबाट ज्यान सम्बन्धी कसूरमा पहिलो पटक ६ दिनको म्याद अनुमती लिई ईलाका प्रहरी कार्यालय केशरगंजबाट घटनाबारे थप अनुसन्धान भइरहेको उनले बताए।
-1756446574.jpg)
-1746009348.jpg)
